Слово Твое - светильник ноге моей и свет стезе моей

Библия на финно-угорских языках



Словарь

Выбрать язык

Книги Нового Завета

предыдущая главаследующая глава

ЛБИБЛИЯНЬ ВАЛКС

 

А

Абба – те валось арамеянь келень "тетяй". Истя эйкакшось пшкали тетянстэнь. Иисускак истя пшкалесь Пазонтень озномсто. Марк. 14:36;Рим. 8:15. Рузонь синодальной текстсэ авва.
Авель– Адамонь ды Евань обмоце цёраст. Сон кандсь Пазонтень аноксокс паро казне, ды сельмень сявадоманзо кувалт Каин лелязо маштызесонзэ. 1 Моис. (Чачома) 4:1-16; Матв. 23:35; Евр. 11:4; 12:24. Вант: Адам.
Аволь еврей – Библиясо лия раськень ломань, язычник. Ап.т. 14:27. Те валсонть еврейтне мерильть весе лия раськень ломантненень, конат аволь "Пазонь кочкавт раськестэ". Язычник валось лиясто ютавтозь, кода "виде Пазонь асодыця". Матв. 5:47.
Авраам – евреень кельсэ "Абрахам", евреень раськень ушодыцяпокштя, конань марто Пазось кемекстызе вейсэньлувонть. Авраамненьмерить "кемемань тетя" сонзэ домка кемеманзо кисэ Пазонтень. 1 Моис. (Чачома) 11:31; 12:1-8; 21:2; Лук. 3:8; Ап.т. 7:2-8; Рим.4; Евр. 11:8-12. Вант: Сарра.
Агриппа – Вант: Ирод 4) ды Ирод 5).
Адам – васенце ломань. Сон эрясь Едэмень садпиресэ Ева нинзэ марто. Сынь прасть пежетьс ды Пазонть а кунсоломаст кисэ панезельть тосто. 1 Моис. (Чачома) 2,3; Лук. 3:38; Рим. 5:12-21.
Азорось – те валось кандови Пазонтень ды Иисус Христоснэнь. Азоро Пазось кирди весе менельтнень-мастортнэнь кедензэ ало ды максызе азорксчинть Цёранстэньгак. Матв. 4:7; Марк 12:29; Рим. 10:9; 2Кор. 4:5. Лиясто те валось невти ломань, кона эрси киньгакмезеньгак лангсо покшокс, кирдицякс. Матв. 24:48; 25:19; Господь, господин, хозяин.
Акайя – Римень масторонь пелькс, кона ашти неень Грециянь обед ёнкссо. Сонзэ лангсо аштесть исят ошт: Афина, Коринт ды Кенкрея. 2Кор. 1:1; 9:2.
Алтарь – аноксонь максома тарка, кевень, чувтонь эли кшнинь столь, конань лангсо поптнэ пултыльть Пазонтень кандозь печкезь ракшатды лия анокст; жертвенник. Матв. 5:23-24. Теде башка Пазонь кудосонть ульнесь вишка алтарь, конань лангсо пултыльть ладан, тантейстэ качадиця сувтамопель. Лук. 1:11.
Аминь – валось евреень келень, смустезэ "Те виде!", "Алкукс, истя улияк!", "Улезэ истя!" Те валось сеедьстэ ёвтневи озномань прядовомсто. Рим. 1:25; Гал. 6:18. Иоаннэнь панжозь неявкссонть сон ули Иисусонь вейке лемекс. Апок. 3:14.
Ангел – те грекень келень валонть смустезэ "кулянь кандыця". Библиясо вастневить ангелэнь зярыя группат: архангелтрявтангелт, xерувимть, серафимть ды лият. Лук. 1:26-38; Ап.т. 5:19; 12:7. Библиясо истя жо кортави пежетьс празь ангелдэ, конатнень кедьстэ Пазось саизе азорксчист. 2Петр. 2:4; Иуд. 1:6. (Кой-кона эрзянь велетнесэ ванстовсь эрзянь кезэрень вал "армо", кода ангел.)
Анокс – печкезь ракша (реве, сея эли бука), почт, ой эли кодамояк лия казне, конань евреень поптнэ кандылизь Пазонтень ломантнень пежетест нолдамонь кисэ эли сюкпрянь ёвтамонь кисэ. 3Моис. (Левит) 1-7; Лук. 2:24; Лук. 13:1; Евр. 7-10; жертва.
Антихрист – Христосонь каршо молиця. 1Иоанн 2:18; 4:3; 2Иоанн 7.
Апарось – те Сатананть лия лемезэ. Матв.13:19; Лукавый.
Апостол – грекень келень вал: "кучовт". Те лементь сюлмить Исус Христосонь 12 тонавтницятнень марто, конатнень Сон кочкинзе лия тонавтницятнень ютксто. Васень кемицянь куросонть ульнесть лия апостолткак, сынст эйстэ сехте содавиксэсь – Павол апостолось. Лук. 6:12-16; Гал. 1:1.
Арамеянь кель – те семитэнь раськень кельтнестэ вейкесь, кона малавикс кезэрень евреень ды арабонь кельтненень. Иисусонь эрямо шкасто малав весе еврейтне Палестинасо ды Сонсь Иисус Христос кортасть арамеянь кельсэ.
Арон – Левинь буень поладыця, Моисеень лелязо, Израилень раськенть васенце попозо ды попонь прявтозо. 2Моис. (Лисема) 29; Лук.1:5; Евр. 5:4. Вант: Леви.
Асия – те Вишка Азиянь, неень Турциянть, чивалгома ёнксонь пелькс, кона ульнесь Римень масторонть кедь ало. Прявтошозоль Эфес. Ап.т. 2:9; 2Тим 1:15

наверх

В

Вавилон – те кезэрень мастор, кона аштесь Тигра ды Ефрат лейтнень ютксо, ней – те обед ёнксонь Ирак. Прявт ошонзояк лемезэль Вавилон. Христосонь чачомадо икеле 7-це пингестэ сон изнизе Иудеянть ды 70 иес саинзе полонс сонзэ эрицянзо. Матв. 1:12. Од Вейсэньлувсо "Вавилон" валось вастневи аволь ансяк виде смустесэ, сонзэ ули кекшезь символонь смустезэяк. 1Петр. 5:13; Апок. 14:8; 17:5; 18.
Ваднема – ойсэ/елейсэ ваднема вельде инязорокс, попонь прявтокс эли пазмарицякс путома. Вант: Христос.
Валаам – Ташто Вейсэньлувонь пазмариця, конань икеле Валак инязорось энялдсь сюдомс Израилень ломантнень. 4Моис. (Ловомат) 22-24; 5Моис. (Омб. к.) 23:2-5; 2Петр. 2:15 Апок. 2:14.
Ваньксчи – ваньксчись ульнесь еврейтненень пек эрявикс ёнксокс Коень коряс эрямосост. Аванькс ломанентень а меревиль кандомс Пазонтень анокст ды лия казнеть эли озномс Пазонь кудосо. Моисеень Койсэнть максозь ламо кармавтовкст ваньксэкс прянь кирдемадо. Истя жо ульнесть ламо лият покштянь койтне-кирдатне ваньксчинь коряс. Евреень Койс тонавтыцятне кеместэ аштесть неть ушо ёнксонь ваньксстэ кирдемань кармавтовкстнэнь кисэ. Теньсэ сынь стакалгавтызь эсест раськенть эрямонзо. Иисус жо, мекевланк, ашти ломаненть ойме ёнксонь ваньксчинть кисэ, кона сехте эрявикс. 3Моис. (Левит) 11-15; Марк.7:1-13; Лук. 11:37-42. Вант: Кой.
Ведьгеменце чинь покшчи – Вант: Покшчить.
Вейсэньлув – вейсэнь тевень теема мель, сюлмамо-ладямо, Пазонть ломаненть марто сюлмавомазо; завет, союз, договор. Синай пандо лангсо Пазось тейсь ладямо-сюлмамо, лиякс, вейсэньлув, Израилень ломантнень марто. Тень вельде Сон невтизе тенст Эсензэ вечкеманзо ды чанстензэ. Теке марто Израилень ломантненень эрявсь топавтомс Пазонь максовт кармавтовкстнэнь. Мейле Пазось тейсь Иисус Христос вельде ташто вейсэньлувонть таркас од вейсэньлув масторлангонь весе ломантнень марто. 2Моис. (Лисема) 24; Евр. 7-10; Лук. 22:20; 2Кор. 3. Вант: Ташто Вейсэньлув дыОд Вейсэньлув.
Вейсэньлувонь горобия – чувтосто теезь ды сырнесэ вельтязь горобия, конань потсо кирдевсть кавто кевень лазт, Пазонь максовт кемень кармавтовкстнэнь марто. Вейсэньлувонь горобиясь аштесь ознома коцткудонть, мейле Ерусалимсэ Пазонь кудонть сехте иневанькс пелькссэ; ковчег завета. Евр. 9:3-5, Апок. 11:19. Вант: Ознома коцткудо, Пазонь кудо.
Вельзевул – Сатанань, идемевсень чирязонь, лемтнестэ вейкесь. Матв. 10:25; 12:24.
Велявтомс пежетнеде, кадомс пежетенть, велявтомс Пазонтень – пежетенть чарькодемадо мейле ломанесь эсь олясонзо велявты пежетенть эйстэ ды пежетев эрямодонть. Сон янкси-мелявты теезь пежетнень кувалт ды сы кеме мельс седе тов а тейнемс сынст. Сон бажи эрямс Пазонь мельтнень-превтнень коряс. Матв. 4:17; Марк. 1:15; Ап.т. 2:38; 26:20; покаяться.
Вениамин – Яковонь 12 цёратнень эйстэ веженсесь. Ап.т. 13:21; Рим. 11:1. Вант: Яков.
Винаумарь – тантей ведев умарь, кона касы винаумарькс лангсо ды конасто теить вина; виноград.
Винаумарькс – Израильсэ ломантне кастсть винаумарькст пирязь винаумарь пиресэ, косо, бути эрявсь, ульнесь ванстома латыне ды винаумарень тапамо латкояк. Анокстазь винанть кирдсть сеянь кедьстэ теезь кескавсо эли сёвонень чакшсо. Матв. 9:17; Марк 12:1; Иоанн 15:4-5; виноград (растение).
Вирез – ревень эли сеянь левкс; ягнёнок. Пазонь Вирезэсь – Христосонь лемтнестэ вейкесь; Агнец Божий. Эсь Коест коряс еврейтне сеедьстэ кандтнесть Пазонтень аноксокс вирезт эсь пежетест нолдамонь кисэ. Христоснэнь мерить Пазонь Вирезэсь секс, мекс Сон максызе Эсь эрямонзо крёст лангсо ды сонзэ верезэ валовсь весе ломантнень пежеттест ванськавтомань кисэ. Иоанн 1:29; Апок. 5:6,9,12.

наверх

Г

Галатия – Римень империянь кедь ало аштиця покш тарка, кона ульнесь неень Турциянть куншкасо. Гал. 1:2
Галилея – те евреень масторонь пелькс, кона ашти Генисаретэнь эрькенть ды Модакуншкань иневеденть ютксо. Галилеянь еврейтне эрясть човорязь лия раськень ломантнень марто. Матв.4:15. Иисус Азорось эсь эрямонь пингестэнзэ седе ламо ютавтсь Галилеясо. Лук. 2:39; Иоанн 1:43.
Грекень кельГрекень кель – Римень империянь шкасто грекень келесь ульнесь империянь чилисема ёнксонь прявт келекс. Од Вейсэньлувось сёрмадозь грекень кельсэ.
Греция – Библиянь Од Вейсэньлувонь шкасто ульнесь покш ды содавикс масторокс, конань прявтошокс ульнесь Афина. Вант: Акайя.

наверх

Д

Давид – кезэрень Израилень сехте содавикс инязорось, кона аштесь прявтокс 10-це пингень прядовомсто (малав 1000-961 иетнестэ) Христосонь чачомадо икеле. Сон сёрмадынзе Псалмань книганть ламо озксморотнень. Сон ульнесь Иисусонь, Пазонь кучовт Идицянть, васоло покштязо, секс Иисуснэнь мерильть Давидэнь Цёра – Сын Давидов. 1Иняз. 16:1-13; 2Иняз. 7:12-17; Матв. 9:27; Иоанн 7:42; Ап.т. 13:22. Вант: Иессей.
Давидэнь Цёра – Вант: Давид.
Динар – Римень сиянь ярмак, вейке чинь важодемань питне. Матв. 18:28; динарий.

наверх

Е

Ева – васенце ава ломань, Адамонь низэ, лемензэ смустесь "эрямо". Пазось теизе сонзэ Адамонь ирдезстэ. 1Моис. (Чачома) 2; 3:20; 2Кор. 11:3. Вант: Адам.
Евангелия – грекень келень вал, конань смустезэ эрзякс "кенярксов куля" эли "паро куля". Кенярксов кулянь пачтицянтень мерить евангелист, благовестник. Марк 1:1,15; Ап.т. 21:8; Эф. 4:11; 2 Тим. 4:5.
Евреень кель – Израилень ломантнень кель, конасо ульнесь сёрмадозь малав весе Ташто Вейсэньлувось.
Еврей – Израилень раськень ломань, лиякс иудей. Иоаннонь коряс Евангелиясонть те валось седе сеедьстэ ёвтави евреень прявтнэде, конат мольсть Иисусонь каршо. Иоанн 6:41-42; Рим. 1:16; Фил. 3:5. Вант: Авраам.
Египет – Нил леенть чирева малав 3000 иестэ м.э. (минек эрадонть) икеле чачозь мастор, косо Израилень раськесь ульнесь урексчисэ нилесядт иень перть. Эсь эйкакш шкастонзо Иисус Христоскак аванзо ды Иосиф марто эрясть Египетсэ зярыя иеть. Матв. 2:13-15; Ап.т. 7:9-36.
Еремия – Израилень кезэрень пазмарицятнестэ вейкесь. Сон тердсь ломантнень Пазонтень велявтомо, зярдо сынь эрясть Пазонь апак кунсоло. Сон эрясь 7-це пингестэ Христосонь чачомадо икеле ды икелев ёвтась ламодо, мезе карми улеме Христосонь самсто. Ер. 31:31-34; Матв. 2:17.

наверх

З

Захария – 1) Иоанн Нававтыцянть-Лемдицянть тетязо, Лук. 1:5. 2) Пазмариця, кона эрясь 9-це пингестэ Христосонь чачомадо икеле. 2Иеде и. (2Пар.) 24:20-22; Матв. 23:35.

наверх

И

Идема – Христосонь максовт идема – те идема пежетень урексчистэ ды Идемевсенть кедь алдо ды, окойники, пингеде пингень эрямо Пазонть марто; (вечное) спасение. Иоанн 3:17; Рим. 5:9. Вант: Инечи.
Идемевсень колавт ломаньбесноватый, одержимый бесом/ нечистым духом. Матв. 9:32-33.
Идемевсесь – Сатана, Апарось, дьявол. Грекень кельсэ "диаболос" валонть смустезэ "чумондыця". Ап.т. 10:38; Эф. 6:11. Вант: Сатана.
Идемевсть – чопода вийть, аванькс, апаро оймеялтт, Сатанань важодицят. Марк. 1:34; бесы, демоны.
Идемс-менстемс, идемс-рамамс, олякстомтомс – Христосонь веренть вельде минь идезь-менстезь олячис, лиякс, нолдазь пежетенек. Эф. 1:7; Кол. 1:14; Евр. 9:15; искупить, избавить.
Идемс-рамамс – Вант: Идемс-менстемс.
Идиця – те Христосонь лемтнестэ вейкесь; Спаситель. Лук. 2:11. Вант: Иисус Христос.
Иессей – Давид инязоронть тетязо, а Давид – Иисус Христосонь ине покштязо. Ташто Вейсэньлувонь пазмарицятне кортасть Мессиянть Иессеень ды Давидэнь буестэ самодо. Рим. 15:12. Вант: Давид
Израиль – 1) Пазонь максовт од лем Яковнень, Исаконь ды Ревеккань вейке цёрантень. Лементь смустезэ "Паз марто тюриця". 1Моис. (Чачома) 32:27-28. Вант: Исав сы Яков 1).
2) Те лемсэнть мейле кармасть мереме весе раськентень, кона чачсь Яковонь ды сонзэ 12 цёранзо пельде. Иоанн 3:10; Гал. 6:16.
3) Давид ды Соломон инязортнэде мейле сынст масторось явовсь кавтов. Сестэ пелеве ёнксонть лемезель Израиль ды обед ёнксонть – Иуда. Вант: Иуда 3).
Иисус Навин – Моисейде мейле Израилень раськень ветиця. Сон пачтизе раськенть Пазонь алтавт Xанаанонь масторонтень ды явизе моданть кемгавтово буетнень юткова. Нав. 3,4; Ап.т. 7:45; Евр. 4:8.
Иисус Христос – Иисус лемесь грекекс Иесус, алкуксонь евреень Иешуа (Иехошуа) лементь смустезэ: "Идиця" эли "Азорось иде(сынзе)". Иисусонь лия лемтне: Пазонь Цёра, Ломантнень Цёра, Давидэнь Цёра. Матв. 1:21. Христос; Вант: Христос
Илия – Ташто Вейсэньлувонь пазмариця, кона эрясь малав 9-це пингестэ м.э. икеле. Сон тердсь Израилень ломантнень сюконямс менельсэ эриця Пазонтень. 3Иняз. 17-19; 4Иняз. 1-2; Марк 9:4; Рим. 11:2-5. Израилень ламо ломантне учость Илиянь самонть Мессиядо икеле. Нававтыця Иоанн ульнеськак ламо ёндо Илиянь кондямо. Матв. 11:14; Лук. 1:17.
Иневанькс – 1) пежеттеме, педе пес паро ды ванькс, весе нулгодьксстэнть явозь, кода сонсь Пазось. Марк 1:23-26; Апок.4:8; святой. 2) Святой валось Библиясо кандови истя жо Христоснэнь кемиця эрьва ломанентень. Сон – "Пазонь ломань","Пазонь кочкавт" эли "Пазонтень алтазь". Рим. 15:25; Эф. 1:4; Кол. 1:1-2,26. 3) Святойкс ловови Библиясо истя жо эрьва мезесь, кона алтазь ды башка явозь Пазонтень ды Тензэ сюконямонтень: оршамопель, вакан, ош. Неть таркатнесэ ютавтoви те валось кода "Пазонть", "Пазонтень алтазь/явозь" эли "Пазонь кочкавт". 2Петр. 1:18; Рим. 11:16; Эф. 2:21; Матв. 4:5.
Иневанькс Оймеялт – те Пазонть колмо чачотнестэ вейкесь. Пазось колмонзазь: Тетя Паз, Цёра Паз (Иисус Христос) ды Оймеялт Паз; Святой Дух. Иневанькс Оймеялтось алкукс невти Тетя Пазонть вечкеманзо ды Христосонь седеймарямонзо минек туртов. Сон истя жо велявты Христоснэнь кемиця ломаненть, теи эйсэнзэ Христосонь кондямокс ды максы тензэ вий важодемс Пазонтень. Матв. 1:18; 3:16; 28:19; Иоанн 14:16-17,26; Ап.т. 2; 1Кор. 3:16.
Иневенч – покш венч, конань Ной теизе инечадыденть икеле. Евр.11:7. Вант: Ной.
Инепромкс – евреень раськень ветиця ломанень пурнавкс, кона топавтыль васняяк судямонь тевтнень. Сон аштиль 70 ломаньстэ, косо ульнесть попонь прявтось, попонь покштнэ, раськень прявтнэ, Койс тонавтыцятне, фарисейтне, саддукейтне ды лият. Матв. 5:22; Лук. 22:66; Ап.т. 4:15; 5:21,27,34,41; Синедрион, совет
Инечи – Вант: Покшчить.
Инешке-Теиця – менелень ды масторонь теиця Паз. Те Пазонть лемтнестэ вейкесь. (Сюлмазь "шкамс" валонть марто, конань смустезэ "теемс".) 1Моис. (Чачома) 1-2; Матв. 19:4; Рим. 1:25; 8:18-23; Творец, Создатель.
Инжир чувто – те чувто, кона касы Израильсэ ды лия лембе масторсояк. Сон пек рацяня ды канды тантей инжир умарть. Иоанн 1:48; смоковница, инжир. Вирень инжир чувто – Лук. 19:4.
Иоанн – 1) Иоанн Нававтыця-Лемдиця, Иисусто кода Пазонь Вирездэ пачтиця пазмариця, кона нававтыль ломантнень ведьсэ, зярдо сынь видькстасть пежетест коряс ды велявтсть сынст эйстэ. Иоанн Нававтыця эрясь ды кулось Иисусонь шкасто. Сонзэ куловтызе Ирод инязорось. Матв. 3:1-15; Иоанн Креститель, Иоанн Предтеча.
2) Иисусонь тонавтницятнестэ вейкесь, апостол, Зеведеень цёразо ды Яковонь ялаксозо. Смирнань Поликарп епископонть коряс сон сёрмадынзе Иоаннонь коряс Евангелиянть, Иоаннонь колмо Сёрматнень ды Апокалипсисэнть. Матв. 4:21-22.
3) Иоанн Марк, Павол апостолонть марто вейсэ важодиця, кона Иераполень Папий епископонть коряс сёрмадызе Марконь коряс Евангелиянть. Ап.т. 12:12
Иона – Ташто Вейсэньлувонь пазмариця, кона Пазонь меленть а топавтоманзо кис ульнесь ёртозь иневедьс. Тосо сонзэ нилизе покш кал, конань потсо сон ульнесь колмо чить ды колмо веть. Мейле калось ёртызе сонзэ иневедь чирес. Ансяк сестэ Иона тусь Ниневия ошов Пазонть мелензэ топавтомо. Ионань кунсоломадо мейле Ниневиянь эрицятне янксезевсть пежеттест, велявтсть Пазонтень ды идезь ульнесть ёмамодонть. Ион. 2:1; 3:2; Матв. 12:39-41.
Иосиф – 1) Иосиф, Израилень Яков покштянть кемгавтово цёратнестэ вейкесь. Лелянзо миизь сонзэ урекс Египетэв. Египетэнь инязорось, фараонось, путызе сонзэ покш прявтокс масторонзо лангсо. 1Моис. (Чачома) 37,39-40; Ап.т. 7:9-14
2) Иисусонь Мария аванзо мирде. Матв. 1:16,18-20,24-25
3) Ариматиянь Иосиф, Инепромксонь ломань, кона калмизе Иисусонь. Матв. 27:57-60
4) Иосиф Барсаба, Ап.т. 1:23.
Ирод – 1) Ирод инязор I, Ирод Ине, ульнесь Римень империянь шкань Палестинань прявтокс 37 иестэ м.э. икеле – 4 иес м.э. мейле, Иисусонь чачома шкасто, Вифлеемень эйкакштнэнь маштнемань кармавтыця. Матв. 2:1-22; Лук. 1:5.
2) Ирод Антипа, Ирод I цёразо, ульнесь Галилеянь ды Беройянь прявтокс 4 иестэ м.э. икеле – 39 иес м.э. мейле, се шкастонть, зярдо Иисус тонавтсь тосо. Ирод Антипа маштовтызе Нававтыця Иоаннонь. Крёст лангс вачкодемадо икеле Иисусонь ветякшнызь те Иродонть икелев. Марк 6:14-29; Лук. 23:6-12.
3) Ирод Аркелай, Ирод I цёразо, ульнесь Иудеянь, Самариянь ды Идумеянь прявтокс 4 иестэ м.э. икеле – 6 иес м.э. мейле. Матв. 2:22.
4) Ирод Агриппа I, Ирод I нуцьказо, ульнесь Палестинань прявтокс 41-44 иетнестэ м.э. мейле. Сон маштовтызе Яковонь, Иоаннонь лелянзо, Иисуснэнь кемицятнень пансицяст. Ап.т. 12:1-23.
5) Ирод Агриппа II, Ирод Агриппа I цёразо, ульнесь Палестинань пелеве ёнксонь а покш пельксэнть прявтокс 44-93 иетнестэ м.э. мейле. Сон кевкстнизе-судизе Павол апостолонть ды кучизе сонзэ Римев кесаренть икелев. Ап.т. 25:13-26:2
Исав – Авраамонь цёранзо Исаконь ульнесть кавтаське цёранзо Исав ды Яков. Васенцекс чачсь Исав, конась мейле весть ярсамонь питнесэ миизе Яковнень васенце цёракс улемань тарканзо. Яковнень Исак максызеяк тетянь чанстямонть-баславамонть, ды сонзэ раськезэ кармась улеме Пазонь кочкавт раськекс, аволь Исавонсесь. 1Моис.(Чачома) 25:19-34; Рим. 9:10-13; Евр. 11:20; 12:16-17. Вант: Исак, Яков.
Исайя – пазмариця Ерусалимсэ 8-це пингестэ м.э. икеле. Исайя икелев ёвтась, кода сы ды кодамокс ули Пазонь кучовт Идицясь. Ис. 9:2-7; 11:1-10; 42:1-7; 52:13-15; 53:1-12; Матв. 3:3; Ап.т. 8:30.
Исак – Авраамонь цёразо, конань чачтызе сыре Сарра Пазонть алтамонзо коряс, кувать учомадо мейле. Исаконь никс ульнесь Ревекка, сынст ульнесть кавтаське цёраст, конатнень лемест Исав ды Яков. 1Моис.(Чачома) 21:1-7; Гал. 4:28-31. Вант: Исав, Яков.
Иссоп – сэрей тикше, кона ульнесь эрявиксэкс еврейтнень аноксонь кандтнема ды ванськавтома койтнесэ-кирдатнесэ. Иоанн 19:29; Евр. 9:19
Иуда – 1) Яковонь цёратнестэ ды Израилень 12 буень ушодыцятнестэ вейкесь, Христосонь васоло покштя. 1Моис. (Чачома) 29:35.
2) Израилень раськень вейке буе, конань моданзо совсесть пандов таркань Иудеяс, Ерусалиместэ обед ёнов. Вант: Иудея.
3) Те лемсэнть – Иуда, Иудань мастор – мерильть израиленсетнень масторонь обед ёнксонтень, зярдо Давид ды Соломон инязортнэде мейле масторось явовсь кавтов. Сестэ пелеве ёнксонть лемезель Израиль. Матв. 2:6; Евр. 8:8. Вант: Израиль 3) дыИудея.
4) Иуда Искариот, Исусонь 12 тонавтницятнестэ вейкесь, кона Сонзэ мейле миизе. Матв. 26:47-49; Марк 14:10-11.
5) Яковонь Иуда, теяк Иисусонь тонавтницятнестэ вейкесь. Лук. 6:16
6) Иуда, Иисусонь братозо. Матв. 13:55
7) Дамаск ошонь Иуда, конань кедьсэ ульнесь Павол, зярдо сокороль. Ап.т. 9:11-12.
8) Иуда Барсаба. Ерусалимень кемикуронть кучовтозо. Ап.т. 15:22.
9) Иуда Галилеясто. Ап.т. 5:37
Иудея – Римень империянь шкасто евреень масторонь обед ёнксонть лемезэ. Сонензэ совасть Иуда буень модатне. Иисусонь шкасто тозонь совасть пандо лангонь Иудеясь (Лук. 1:65), Идумеясь (Марк. 3:7-8) ды Самариясь (Ап.т. 1:8). Матв. 2:1,22; Лук. 1:39; 5:17. Вант: Иуда 2) ды Иуда 3).

наверх

К

Каин – Адамонь ды Евань васенце цёраст, кона сельмень сявадоманзо кувалт маштызе Авель ялаксонзо. 1Моис. (Чачома) 4:1-16; 1 Иоанн 3:12. Вант: Адам.
Кармавтовкс – кармавтома эли превспутома, конань Пазось максызе эсь Израилень раськенстэнь. Моисеень вельде максозь Коенть юрсо аштить кемень кармавтовкст; заповедь. Матв. 19:16-22; 22:36-40; Иоанн 13:34. Вант: Кой ды Моисей.
Каявксонь пурныця – рименсетнень туртов налогонь пурныця ломань. Матв. 9:9-13; Лук. 15:1; сборщик налогов и пошлин, мытарь.
Кемикуро, кемицянь куро – 1) Кодамояк вейке таркасо Христоснэнь кемиця ломантнень, христиантнэнь, вейсэндявкс. Ап.т. 9:31; 11:22; Гал. 2:9; 1 Фесс. 1:1; церковь, приход.
2) Масторлангсонть эриця весе христиантнэ. Матв. 16:18; 1Кор 12:12-27; всемирная церковь, община верующих христиан.
Кемикуронь ветиця – те валось грекень келень смустьсэ "ваныця". Ап.т. 20:28; Фил.1:1; Тит. 1:7; епископ
Кемикуронь лездыця – Христоснэнь кемицянь куросо урозтнэнень, дова аватненень ды лия кажов ломантненень лездыця ломань. Ап.т. 6:1-6; Рим. 16:1; Фил. 1:1; 1Тим. 3:8,12; дьякон.
Кемикуронь прявтт – кемицянь куро ветицят, сеедьстэ кемикуросо ульнесь аволь ансяк вейке кемикуронь прявт. Грекень кельсэ те валонть смустезэ "сыре атят". Ап.т. 11:30; 14:23; 15:6; Як. 5:14; 1 Тим. 5:17,19; старейшины, пресвитеры.
Кенере – кувалмонь онкс, пельметрань кувалмо. Матв.6:27; Апок. 21:17.
Кесарь – Римень масторонь инязор. Матв. 22:19-21; Лук. 2:1; император.
Киськепень керявтома – евреень кой, зярдо керяви кавксо чисэ цёрынень киськепе. Истя тешкстыть Израилень раськенть Паз марто сюлмавоманть, вейсэньлувонть. 1Моис. (Чачома) 17:9-14; Ап.т. 7:8; 15; Гал. 5; обрезание.
Книга – Библиянь шкатнестэ книгатне ульнесть теезь ракшань кедьстэ эли папируссто, ды лангс ваномс сынь ульнесть тапарксонь кондят. Апок. 5:1
Кой, Моисеень Кой – Пазонь кой, кона максозь Израилень раськентень. "Коесь" чарькодеви истя: те Моисей вельде максозь кемень кармавтовкстнэ эли Ташто Вейсэньлувонь васенце вете книгатне, Моисеень книгатне (евреень кельсэ "Тора"), лиясто Ташто Вейсэньлувонь весе книгатне. Коесь те кармавтовкстнэнь ды превспутоматнень пурнавкс. Сон невтсь Пазонть мелензэ Эсензэ раськенть кувалт, истя жо сеньгак, кода эряви эрямс Израилень ломантненень; Закон (Моисея). Матв. 5:17-18; Иоанн 1:17; Гал. 2:16. Мейле Койс тонавтыцятне совавтызь Коентень покштянь ламо койтнень-кирдатнень, конатнень топавтомс ульнесь пек стака. Матв. 15:1-20; Марк. 2:23-3:6. Вант: Вейсэньлув.
Койс тонавтыця – Моисеень Коенть ды Пазонь пельде лия Сёрмадовкстнэнь парсте содыця тонавтозь еврей, кона тонавтсь лия ломанть. Матв. 2:4; 5:20; 7:29; законник, книжник.

наверх

Л

Леви – 1) Яковонь цёратнень ютксто вейкесь, Вант: Яков. Левинь буень поладыцятне ульнесть явозь башка Израилень лия ломантнень эйстэ ды алтазь Пазонь важодемантень. Сынст ютксто ансяк Арононь семиясто-кансто, кочилизь поптнэнь. Евр. 7:5. Вант: Арон.
2) Матвей, икелень каявксонь пурныця, конань Иисус тердизе эсь мельганзо молицякс. Сон ульнесь 12 тонавтницятнестэ вейкесь ды Иераполень Папий епископонть коряс Матвеень коряс Евангелиянть сёрмадыця. Матв. 9:9; Марк. 2:14
Левинсетне – 1) Левинь буень ломанть, конат важодсть Пазонь кудосо Ерусалимсэ, ульнесть поптнэнень лездыцякс. Лук. 10:32; Иоанн 1:19; левиты. 2) Весе Левинь буень поладыцятне. Евр. 7:13. Вант: Леви.
Лемдема – Вант: Нававтома.
Ломантнень Цёра – арамеянь кельсэ неть валтнэнь смустест "ломань". Ташто Вейсэньлувонь Даниил пазмарицянь книгасонть (Дан. 7:13-14) те валось сайневи Пазонь чачонть невтемстэ. Евангелиятнесэ Иисус Христос Эсь прянзо ёвтни Ломантнень Цёракс. Тень эйсэ Сон невти: вейке шкасто Сон ули ломанекскак ды Пазокс. Матв. 9:4-7; Марк. 8:31; Ап.т. 7:55-56; Сын Человеческий.
Лот – Авраамонь ялаксонзо цёра, кона эрясь Содом ошсо ды оргодсь тосто, зярдо Пазось пултызе те пежетев ошонть менельстэ празь толсо. Оргодемстэ Лотонь низэ варштась удалов, ошонть ёнов, ды теевсь салонь палманькс. 1Моис. (Чачома) 19:1-30; Лук. 17:28-32.
Лука – грекень ормаменстиця, Павол апостолонть марто якицязо, кона сёрмадызе Лукань коряс Евангелиянть ды Апостолтнэнь тевест. Кол. 4:14; 2Тим. 4:10; Филем. 23-24.

наверх

М

Манна – менельстэ Пазонь кучовт ярсамопель. Пазось максылизе сонзэ Израилень ломантненень сынст чаво модава ютамост шкасто, ниленьгемень иень перть. 2Моис. (Лисема) 16; Иоанн 6:31,49; Евр. 9:4, Апок. 2:17.
Мелькиседек – Салим ошонь инязор ды поп, конанень Авраам максызе кеменце пельксэнть тюремстэ весе саезенть эйстэ. Сон чанстизебаславизе Авраамонь. 1Моис.(Чачома) 14:17-20; Евр. 5:6; 7:1-2.
Менельсэнть Инязорксчизэ – "Менельсэсь" – те Пазось, ды Менельсэнть Инязорксчись – те Пазонть Инязорксчизэ. Матв.4:17; 5:3; 18:1-4; Царство Небесное. Вант: Пазонь Инязорксчись.
Мессия – "Вадевть". Вант: Христос.
Моисей – кезэрень Израилень раськень ветиця ды ине пазмариця, кона ливтизе эсь раськензэ Египетэнь урексчистэ ды конань вельде Пазось максынзе кемень кармавтовкстнэнь ды Коень лия меревкстнэнь-аравтовкстнэнь. 2Моис. (Лисема) 1-4. Вант: Кой ды Вейсэньлув.

наверх

Н

Нававтома – ведьсэ лемдема. Од Вейсэньлувсо кортави кавто нававтомадо-лемдемадо. 1) Иоанн Нававтыцянь нававтомась невтсь пежетте велявтома, лоткамо сынст тейнемадо ды Пазонтень эсь прянь алтамо. Евангелиятнесэ кортави истямо нававтомадо. Матв. 3:1-6.
2) Иисус Христосонь вельмемадо мейле нававтомань смустесь домкалгадсь ды келейгадсь: кода Иисус Христос кулось ды кулозьстэ вельмесь, истя жо нававтомась ней невти ломанень куломанть ды кулозьстэ вельмеманть сень кисэ: эрямс сонензэ Иисуснэнь алтазь эрямосо. Иоанн Нававтыцядонть мейле Од Вейсэньлувсо кортави истямо нававтомадо. Кол. 2:12; Рим. 6:3-5.
Нававтыця ИоаннИоанн Креститель. Вант: Иоанн 1).
Ниневия – кезэрень Ассирия масторонь прявтош, козонь Пазось кучизе Иона пазмарицянть. Матв. 12:41. Вант: Иона
Ной – ломаньраськень вейке покштя, конань Пазось ванстызе инечадынь шкасто. Пазонть кармавтоманзо коряс Ной тейсь покш венч, конасонть сон ды кудораськензэ идевсть инечадыденть. 1Моис. (Чачома) 6:5-9:17; Матв. 24:37-39; 2 Петр. 2:5; Евр. 11:7.

наверх

О

Од Вейсэньлув – те Библиянь омбоце пельксэсь. Од Вейсэньлувось ёвтни Идицядонть, Исус Христосто, кода Сон эрясь ды тонавтсь, кода Сон кулось крёст лангсо ды вельмесь колмоце чистэ. Теде башка Од Вейсэньлувось ёвтни миненек васенце христиантнэнь эрямодост, сыненст сёрмасо кучозь превспутоматнеде ды теде, кода Пазонь мелесьарсемась карми топавтовомо меельце шкастонть. Новый Завет. Вант: Вейсэньлув.
Ознома коцткудо, Пазонь коцткудоскиния. Чаво модасо Моисей ды Израилень ломантне тейсть Пазонть превспутоманзо коряс коцтонь кудо, косо сынь кандтнильть Пазонтень анокст, озныльть ды сюконильть Пазонтень. 2Моис. (Лисема) 25-31; Ап.т. 7:44. Коцткудось ульнесь явозь кавто пельксэв: "иневанькс" ды "сехте иневанькс". Сехте иневанькс пелькссэнть аштесь вейсэньлувонь горобиясь ды тов совсесь попонь прявтось ськамонзо ансяк весть иезэнзэ. Евр. 9:2-7. Ознома коцткудось ульнесь Израилень ломантнень Пазнэнь сюконямо таркакс се шкас, зярс Соломон инязорось эзь путо-стявто Ерусалимсэ кевстэ теезь Пазонь кудо. Вант: Пазонь кудо.
Оймсема чи – те евреень недляютконь сисемеце чись, субутась, Пазнэнь алтазь оймсема чи. Те чистэнть а меревиль важодемс. 2Моис. (Лисема) 20:8-11. Валонть юрокс ашти евреень келень валось "шабат", оймамо. Лук. 6:1-11; суббота.
Ойумарьоливка; ойумарькс, ойумарь чувто – маслина, оливковое дерево. Те чувтонть умартнестэ еврейтне теильть ой ярсамопелекс, ваднемапелекс ды ламо лия тевскак. Ерусалим ошонть чилисема ёнкссо аштесь Ойумарькс пандо (Елеонская гора), конань лангсо кастовсть ойумарь чувтот. Лук. 21:37; Иоанн 18:1; Апок. 11:4.

наверх

П

Пазмариця – Пазонь пельде кортыця ломань, Пазонь мелень пачтиця; пророк. Ташто Вейсэньлувонть шкасто Пазось кучсь ламо пазмарицят, ютксост ульнесть Самуил, Исайя, Еремия. Сынст вельде Пазось пачтясь Эсь мелензэ Израилень раськентень ды ёвтнесь сыця шкадонть. Од Вейсэньлувонь шкасто пазмарицят ульнесть христианонь васенце кемикуротнесэяк. Ап.т. 21:1-16; 1Кор. 12:28; 14:1,3-5; Апок. 22:9.
Пазонь Вирезэсь – Вант: Вирез.
Пазонь Инязорксчись – те истямо лув-лад, косо ломантне ды весе Пазонь теевксэсь эри-теи Сонзэ мелензэ коряс ды максы прянзо Пазонь азорксчинть алов. Иисус Христос ламо тонавтсь Пазонь Инязорксчиденть. Марк. 1:15; 4:30-32; 10:13-25; 14:25; Лук. 6:20; 9:11; 10:8-9; 17:20-21; Царство Божие, Царствие Божие.
Пазонь кудо – Библиянь шкасто Ерусалимсэ, Израилень прявтошсо, Пазнэнь ознома кудо, еврейтнень пурнавома таркаст, косо поптнэ канднесть Пазонтень ракшань эрьва кодат анокст-максовкст ды лия казнеть. Иоанн. 2:13-22; храм Иерусалимский. Вант: Ознома коцткудо ды Вейсэньлувонь горобия.
Пазонь кучовт Идиця – Вант: Христос.
Пазонь ломань – святой. Вант: Иневанькс.
Пазонь Цёра – Иисусонь лия лемезэ. Матв. 3:17; Иоанн 11:27; Сын Божий. Вант: Иисус Христос.
Покшчить1) Пазонь кудонь одс ванськавтомань покшчи (Иоанн 10:22) – сестэ еврейтне ледстнить мельс, кода Иуда Маккавей одс ванськавтызе Пазонь кудонть 165-це иестэ м.э. икеле. Пазонь кудонть ваньксчинзэ колызе Антиок Эпифан. Те покшчись эрси декабрянь ковсто ды сонзэ лия лемезэ евреекс Ханукка эли "Валдонь покшчи".
2) Инечи (Матв. 26:2,5,18-19) – покшчи, конаньсэ тешкстыть Израилень раськенть Египетэнь урексчистэ лисеманзо. Те чистэнть ярсамс анокстыльть инечинь вирез (реве левкс эли сея левкс). Сонзэ верьсэ ваднекшнызь кенкшень палмантнень ды пайметнень, куловтниця ангелэнть те кудонть вакска ютамга (Евр. 11:28). Те покшчинть лемезэ евреень кельсэ "Песах", "вакска ютамо", ды сонзэ тешкстыть март-апрель ковсто (2Моис. 12:1-28). Ней христиантнэ те покшчинть сюлмить Иисусонь, Пазонь Вирезэнть, пиштеманзо, куломанзо ды вельмеманзо марто.
3) Ламбамсто сюкоронь покшчись (Матв. 26:17; Марк 14:1) васенцекс ульнесь тундонь видемань кенярксов покшчикс, сеске Инечиде мейле. Мейле сон теевсь Египетстэ лисемань ледстнема чикс. Египетстэ лисемстэ Израилень ломантне истя капшасть, мик кшинь чапаксонь чапаськадомантькак эзть кенере учомо ды пансть ламбамсто сюкорот. (2Моис. 13:3-10).
4) Ведьгеменце чинь покшчинть (Ап.т. 2:1-4; 20:16) еврейтне тешкстасть ведьгемень чинь топодеманть Инечиде мейле, май ковсто, зярдо кенериль ды пурнавиль сюрост (2Моис. 23:16; 34:22; 4Моис. 28:26). Мейле те покшчистэнть ледстнесть, кода Пазось максызе Израилентень Коенть Синай пандо лангсо. Те покшчинть ютавтомо ламо еврейть яксесть Ерусалим ошов. Ведьгеменце чинь покшчистэнть Пазось кучизе эсь Иневанькс Оймеялтонзо ды валызе виензэ Исуснэнь кемицятнень лангс. Пятидесятница.
5) Тарад латынень стявтнема покшчи (Иоанн. 7:2) – евреень кельсэ Суккот. Васенцекс ульнесь сон сёксня кода винаумарень пурнамонь покшчи, конань шкасто ломантне эрясть тарад латынесэ. Мейле те покшчинть кармасть тешкстамо Израилень раськенть чаво модава ютамонть кувалма, зярдо ломантне эрясть тарад латынетнесэ ды коцткудотнесэ (3Моис. 23:33-43).
Поп – евреень священник, Ерусалимсэ Пазонь кудосо важодиця, Пазонтень аноксонь кандыця ломань. Евреень поптнэ свал ульнесть Арононь семиясто-кансто, Левинь буестэ. Лук. 1:5-8. Вант: Арон, Леви.
Попонь покшт – поптнэнь ютксо иерархиянь прясо ды евреень Инепромксонь сехте покш прявтнэ, конат ульнесть сонзэ тевень ветицякс. Матв. 26:59; Марк 8:31; первосвященники.
Попонь прявт – весе поптнэнь прявт, Пазонь кудосо ознома ды аноксонь кандтнема тевень ветиця ды Инепромксонь ветиця. Иоанн 11:49-51; Лук. 3:2; 22:54; архиерей, первосвященник.
Постовамс, пост кирдемс – зярскак кирдевемс ярсамодо, лиясто мик симемадояк. Библиясо постось сеедьстэ ашти ризнэмань, янксемань ды пежетте велявтомань невтема тешксэкс. Матв. 4:2; Лук. 18:12; Ап.т. 13:2-3.
Проказа – педиця киське орма, конасо сэредицясь Израильсэ лововсь Пазонть икеле аваньксэкс, ды сонзэ панилизь ломань ютксто. Матв. 8:2-3; Марк 1:40-42.
Псалмат, Псалтирь – Ташто Вейсэньлувонь книга. Сонзэ эйсэ 150 озксморот ды моравтомат, конатнестэ сехте ламотнень сёрмадынзе Давид инязорось.

наверх

Р

Равви, раввуни – евреень тонавтыцянь сэрей лем. Иоанн 1:38; 20;16. Вант: Койс тонавтыця.
Рай – те валонть смустезэ "мазый пире", "частязь тарка". Сон ёвтави васняяк Едэмень пиреденть, конань эйс Пазось озавтынзе эрямо Адамонь ды Евань.1Моис. (Чачома) 2:8. Од Вейсэньлувсо Пазнэнь кемиця ломантнень оймсема тарка. Лук. 23:43; 2Кор.12:1-6.
Реве – Израилень ломантненень вельть эрявикс ракша. Библиясо Израилень ломантнеде сеедьстэ ёвтневи кода реветнеде, ды Иисускак корты Эсь реведензэ – сеть ломантнеде, кить кемить Тензэ ды молить Сонзэ мельга. Иоанн 10:1-18.
Рим – 1) Иисусонь шкасто покштояк покш Римень мастор, империя, кона кирдсь кедензэ ало ламо лия масторт, сынст ютксо Израилеськак. Лук. 2:1. 2) Римень империянь прявтош, конань кемикуронтень Павол апостолось сёрмадызе эсензэ вейке сёрманзо. Рим. 1:1; Ап.т. 18:1-2; 19:21. 3) Неень Италиянь прявтош.

наверх

С

Саддукейть – попонь прявтонть раськестэ политикасо ды религиясо истят содавикс еврейть, конат кеместэ кирдсть Моисеень Коенть. Теде башка сынь эзть кеме оймеялтнэнень, ангелтнэнень ды кулозьстэ вельмемантень, ды неть кевкстнематнень коряс сынь сеедьстэ пелькстасть фарисейтнень марто. Матв. 22:23-33. Вант: Фарисейть.
Самария – Ерусалимень пелеве ёно, Иудеянь ды Галилеянь ютксо аштиця мода, конань эрицянзо ульнесть лия раськетнень марто човорявозь еврейть. Сынь сюконясть Пазонтень эсест коест коряс. Иудеянь ды Самариянь ломантнень арасель мелест вастневемс вейкест-вейкест марто. Иоанн 4:9. Вант: Галилея ды Иудея.
Самуил – Ташто Вейсэньлувонь пазмариця ды судия. Сон ульнесь Израилень раськень ине ветицякс ды вадизе инязорокс Пазонь кочкавт Давидэнь. 1Иняз. 1-3; 7:2-13; 15:1-16:13; Ап.т. 3:24; 13:20.
Сарра – Авраамонь низэ, кона ульнесь а чачтниця ды ялатеке Пазонть алтамонзо коряс сыре пингестэ чачтызе Исак цёранзо. Рим. 4:18-19; 9:9; Евр. 11:11. Вант: Авраам.
Сатана – рунговтомо кежей ды аванькс оймеялт, идемевстнень прявт. Сатана валонть смустезэ "каршо молиця". Пазонь ят ды ломанень оймень ёмавтыця душман, лия лемензэ – Идемевсесь, те мирэнтьмасторонть апаро прявтось, Вельзевул. Христос допрок изнизе Сатананть. Матв. 4:10; Рим. 16:20; Сатана, дьявол.
Сёрмадовкст, Пазонь пельде Сёрмадовкст – Пазонь пельде ламо пазмариця ды лия сёрмадыця вельде максозь Сёрмадовкст. Од Вейсэньлувсонть те валонть смустезэ: Ташто Вейсэньлувонь книгатне. Матв. 22:29; Иоанн 5:39; Ап.т. 18:24; 2Тим. 3:16; Священное Писание.
Синагога – эрьва ошсо евреень промксонь ды озномань ютавтома тарка, Коень тонавтома ды судямо кудо, ков пурнавкшныть оймсема чистэ. Матв. 4:23.
Синай – те чаво модасо пандо, конань лангсо Пазось кортась Моисей марто ды сонзэ вельде максынзе Израилень ломантненень кемень кармавтовкстнэнь ды Коень лия путовкстнэнь. 2Моис. (Лисема) 19-31; Ап.т. 7:38.
Сион – те Ерусалим ошонть ды кой-зярдо весе Израиленть лия лемезэ.
Сион тейтерь – истя евреень кезэрень поэзиясо мерильть Ерусалим ошонтень ды сонзэ эрицятненень. Матв. 21:5; Рим 9:33.
Смирна – те чувтонь тантей чине ой, конань еврейтне ютавтнесть тевс калмамсто ды Пазонь кудосо сувтамсто. Матв. 2:11; Иоанн 19:39, Марк.15:23.
Содом ды Гоморра – неть кавто кезэрень оштнэ аштесть Кулозь иневеденть чиресэ. Сынст эрицяст тейнесть пек ламо пежетть. Тень кисэ Пазось пултынзе неть оштнэнь менельстэ кучозь тол марто палыкандалонь пиземесэ. 1Моис. (Чачома) 19:24-25; Матв 10:15; Лук. 17:29; Рим. 9:29. Вант: Лот
Соломон – Давид инязоронть цёразо, кона ульнесь Израилень инязорокс 961-922 иетнестэ Христосонь чачомадо икеле ды теевсь пек содавиксэкс сюпавчинзэ ды домка превейчинзэ коряс. Соломон стявтызе Ерусалимсэ Пазонь васенце кудонть. 3Иняз. 10; Матв. 6:29; 12:42; Ап.т. 7:46-48.
Сувтамопель – ладан эли фимиам, тантей чинень кирдиця чувтонь питней ой, конань пултыть Пазонть икеле сувтамсто. Матв. 2:11; Апок. 8:3-4; 18:13.
Судямо чи – те чи, зярдо Азорось сы ломантнень судямо. Те чистэнть Пазось карми судямо Иисус Христос вельде весе масторлангонть. Те чинтень истя жо мерить "меельце судонь чи". 1Иоанн 4:17; 1Кор. 5:5; 11:32.
Сядонь прявт – римень ушмосо сядо солдатонь-ушманонь лангсо прявт. Матв. 8:5-13; центурион, сотник, офицер.

наверх

Т

Талант – римень сырнень ярмак, конасо ульнесть 6000 сиянь ярмакт, динарт. Се шкастонть вейке талантонть кисэ евреентень эрявсь важодемс 24 иешка. Матв. 18:24; 25:14-30.
Ташто Вейсэньлув – те Библиянь васенце пельксэсь. Ташто Вейсэньлувонь кезэрень историясонть ёвтневи, кода Пазось теизе мирэнтьмасторонть ды кемекстызе вейсэньлувонть Израилень ломантнень марто. Сон максызе сыненст Коенть ды озномалувонть ды алтызе кучомс Идицянть, Мессиянть. Ап.т. 3:25; 7:8; Рим. 9:4; Ветхий Завет. Вант: Вейсэньлув.
Тетрарх – Римень кесарень кедь ало аштиця аволь покш прявт. Лук. 3:1; четвертовластник.
Тоначи – те валонть смустезэ Од Вейсэньлувсо "кулозтнень тарка", грекень кельсэ "адэс". Лук. 16:23; Ап.т. 2:27,31; Апок. 1:18.
Тоначинь тол, тоначинь амадниця тол – те тоначинь тарка, косо Пазнэнь а кемиця, пазтомо ломантне кармить пиштеме пингеде пингес ды косо чинек-венек палы амадниця тол. Истямо толонь лашмось ульнесь анокстазь чумонь пандома таркакс Пазонь каршо молицятненень, Сатанантень ды сонзэ ангелтнэнень. Матв. 23:33; Марк 9:43,47; геенна (огненная).

наверх

Ф

Фараон – кезэрень Египетэнь инязор. Ап.т. 7:9-10,13,21; Рим 9:17
ФарисейтьФарисейть – тонавтозь еврейть, конат аштесть Моисеень Коенть ды эйзэнзэ мейле путозь ламо кармавтовкстнэнь ды меревкстнэнь кеместэ кирдемаст кисэ. Сынь тонавтсть ды кемсть кулозьстэ вельмемантень. Сынст азорксчист Израилень ломантнень ютксо ульнесь пек покш. Матв. 15:1; 21:45; Лук. 11:37-39. Вант: Кой ды Саддукейть.

наверх

Х

Христиан – Пазнэнь кемиця ломань, конань Иисус Христос вельде нолдазь пежетензэ, Пазонь идевть, Христос мельга молиця. Те лемсэнть васенцеде кармасть мереме кемиця ломантненень Антиокия ошсо. Ап.т. 11:26; 26:28; 1Петр. 4:16
Христос – евреень кельсэ Мессия валось ды грекень кельсэ Христос кандыть вейке смусть: "Вадевть". Кезэрень Израильсэ прянь ойсэ/елейсэ ваднемась ульнесь Пазонь кочкамонь невтиця тешксэкс. Христос – Пазонь кочкавт, алтавт ды масторлангс кучовт Инязор-Идиця – масторлангонь ломантнень идемга; Христос, Помазанник, Избранник Бога. Лук. 2:11. Вант: Ваднема.
Косо Христос валось вастневи кода титул, ютавтови сон кода "Пазонь кучовт Идиця". Матв. 16:16. Лия таркасо, косо сон вастневи кода лем, кадови апак полавто. Ап.т. 9:34. Эрзякс те лемесь сеедьстэ ёвтави Кристос.

наверх

Ч

Чансть – Пазонь паро арсемат-мельть, Пазонь ине вечкемазо, конась максови казнекс миненек, пежетев ломантненень, ансяк Христосонь куломанзо ды Сонензэ кемеманок кувалт. Иоанн 1:17; Рим. 6:14; 1Кор. 1:3; Гал. 1:3; 1Фесс. 1:1; благодать.
Чанстямо – Пазонть эрьва кодамо парочизэ, паро мелезэ ды ломанентень вечкемазо (Евр. 6:13-14) эли кинень-бути весе тень вешемазо Пазонть пельде (Рим. 12:14); благословение.
Чанстямс – баславамс, вешемс кинень-бути паро Пазонть пельде. Лук. 2:34; благословить. Чанстямс-баславамс Пазонть – шнамс, инелгавтнемс Пазонть. Эф. 1:3.
Чумовтомокс ловомс – грекень келень те валонть смустезэ "яволявтомс чумовтомокс". Од Вейсэньлувсо те валонть смустезэ истямо: Верепазось нолды ломаненть пежетензэ, яволявты сонзэ чумовтомокс ды лови Эсензэ икеле видечисэкс. Пазось лови ломаненть чумовтомокс ансяк Иисус Христоснэнь кемеманзо кисэ. Рим. 3:26,28; 4:2-5; 5:1; 8:30; дать оправдание, праведность, оправдать.

наверх

Я

Яков – 1) Исаконь ды Ревеккань кавтаське цёратнестэ веженсесь, конанень Пазонть икелев кочкамонзо коряс максозель тетянзо чанстямось-баславамось. Пазось макссь Яковнень од лем – Израиль. Яковонь 12 цёратне кармасть улеме Израилень раськень 12 буень прявтокс. 1Моис. (Чачома) 25:19-34; Матв. 1:2; Лук. 1:33; Ап.т. 7:8. Вант: Израиль, Исак, Исав.
2) Зеведеень цёразо, Иисусонь сехте малавикс колмо тонавтницянзо ютксто вейкесь. Матв. 4:21; 17:1.
3) Иисусонь вейке братозо. Иисусонь куломадо, вельмемадо ды менелев кепедевемадо мейле Ерусалимень васенце кемикуронь прявтнэстэ вейкесь. Ап.т. 12:17; 15:13; 21:18
4) Алфеень цёразо, сонгак Иисусонь 12 тонавтницянзо ютксто вейкесь. Матв. 10:3.

наверх


предыдущая глава словарь 1 следующая глава