Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 9

Пазнэнь озномась ташто вейсэньлувонть коряс

1Васенце вейсэньлувонть, нама, ульнесть эсензэ аравтовксонзо Пазнэнь озноманть коряс, ды ульнесь мода лангонь ознома кудозояк.2Ульнесь стявтозь ознома коцткудо, конань васенце пелькссэнть ульнесть лампа ды столь ды сонзэ лангсо Пазонть икелев путозь кшить, ды мерильть те пельксэнтень “иневанькс”.3Коцткудонть лия пельксэсь явозель васенценть эйстэ коцтонь омбоце пирявкссо ды лемезэль “сехте иневанькс”.4Тосо ульнесть ладанонь сувтамо сырнень алтарь ды вейсэньлувонь горобия, кона весеме ёндо оложазель сырнесэ. Горобиянть эйсэ кирдевсть манна марто сырнень кедьге, истя жо Арононь мандозо-палказо, кона нолдакшнось пургондавкст, ды кевень кавто лазнэть, конатнень лангсо сёрмадозельть Пазонь кармавтовкстнэ.5Горобиянть лангсольть херувимть-ангелт, конатне ульнесть Пазонть инексчинзэ невтицякс. Сынст сёлмост келейгавтозь пежетень нолдамо тарканть велькссэ. Весе тень эйстэ миненек ней а эряви кортамс эрьва ёндо.

6Вана истя весемесь ульнесь теезь ознома коцткудосонть. Поптнэ эрьва чистэ совсить васенце пельксэнтень ютавтомо эсь важодема-ознома тевест.7А вана омбоце пельксэнтень ансяк весть иезэнзэ совси ськамонзо попонь прявтось ды свал верь марто. Те веренть сон кандсы эсензэ кисэ ды ломантнень пежетест кисэ, конатнень теизь чоподачист кувалт.8Истямо ладсо Иневанькс Оймеялтось теньсэ невти: зярс ашти стайсэнзэ ташто масторлангонь ознома коцткудось, сестэ а ули панжозь кись алкуксонь менелень ознома кудонтень.9Те весе кода тешкс, кона невти неень шканть лангс. Лисни: казнеть ды анокст кандтнить Пазонтень, ансяк сынст вельде а тееви ваньксэкс-асатыкстэмекс сень оймеёжозо, кие озны-сюкони Пазонтень.10Эдь сынст юрсо аштить аравтовкст ярсамодо, симемадо ды эрьва кодамо ладсо шлякшномадо. Весе неть ансяк ушо ёнксонь койть-кирдат, конатнень виест ансяк од лувонь-ладонь теема шкас.

Пазнэнь озномась од вейсэньлувонть коряс

11Ней вана сась Христос, Попонь прявтось, конань вельде карми улеме максозь миненек Пазонь весе парось. Сон ютась седе ине ды седе асатыкстэме ознома коцткудованть, кона теезь аволь ломанень кедьсэ, лиякс, аволь те масторлангонть теевкс.12Сон совась сехте иневанькс пельксэнтень аволь сеянь эли букань верь вельде. Мекевланк, Сон совась тозонь Эсензэ верензэ вельде, весть ды свалшкас ды кандсь ломантненень пингеде пингень идема-менстема!13Бути уш сеянь ды букань вересь эли ведрекшень куловось пургсемстэ ванськавтыть аванькстнэнь ды максыть ансяк ушо ёнксонь ваньксчи коень-кирдань топавтомас,14сестэ зяроксть седе пек виев Христосонь вересь! Иневанькс Оймеялтонть вельде Сон максызе Эсь ванькстэяк ванькс прянзо Пазонтень аноксокс. Сонзэ верезэ ванськавтсы минек оймеёжонть куломань кандыця тевтнеде ды тейсамизь маштовиксэкс эриця ды алкуксонь Пазонтень важодемас.

15Истя Христос ули од вейсэньлувонть кемекстыцякс. Сонзэ куломась ульсь идема-рамамо питнекс, кона олякстомты ташто вейсэньлувонть шкасто теезь пежетнеде. Секс Пазонь тердевтненень максови Сонзэ алтавт пингеде пингес чанстязь парочи.16Вейсэньлувось – кода уличинь коряс кармавтома, кона свал веши кармавтыцянть куломанзо кемекстамо.17Эдь уличинь коряс кармавтомась сови вийс ансяк кармавтыцянть куломадо мейле. Сонзэ зярдояк арась виезэ, бути кармавтыцясь эриця.18Секс васенце вейсэньлувоськак кемекстазель ансяк верь вельде.19Истя, васенцекс Моисей яволявтынзе весе ломантненень Коень весе кармавтовкстнэнь. Мейле сон сайсь букань ды сеянь верь, човоринзе ведь марто ды якстере понасо сюлмазь иссопонь тарадсо пурксизе кода Коень книганть сонсензэ, истя жо весе ломантненьгак.20Сон мерсь: «Те вересь кемексты вейсэньлувонть, конань Пазось мерсь тенк топавтомс».21Моисей истя жо пурксизе верьсэнть Пазнэнь ознома коцткудонть ды весе сень, мезесь ютавтневиль тевс Пазонтень озномсто.22Истямо ладсо, Коень коряс малав весемесь ванськавтови верь вельде, ды верень апак вало а эрси чумонь нолдамо.

Христосонь аноксось нарды-саи ломантнень пежетест

23Вана истя эрявсь ванськавтовомс менеленсенть ёнов молицятненень. Сынсь жо, менеленсетне, вешить сехте паро анокссо ванськавтома.24Христоскак эзь сова ломанень кедьсэ теезь ознома кудонтень, кона ансяк моли алкуксонсенть ёнов. Сон совась менеленть сонсензэ эйс, косо ней стясь Пазонть чаманзо икелев озномо минек кисэ.25Сон истя жо а кандтни Эсь прянзо аноксокс ламоксть, кода эрьва попонь прявтось совси иезэнзэ весть сехте иневанькс пельксэнтень, ды свал ракшань верь марто.26Бути Христос теевель сынст ладсо, сестэ Сонензэ ламоксть саволь пиштемс-куломс менельтнень-мастортнэнь теевема шкастонть саезь. Мекевланк, ней, пингетнень прядовома малав, Сон сась весть ды максызе аноксокс Эсь прянзо пежетенть ёмавтоманзо кисэ.27Эрьва ломанентень сави куломс весть, ды мейле стямс Пазонь судонть икелев.28Истя жо Христоскак весть максызе прянзо аноксокс, весе ломантнень пежетест нардамонь-саемань кисэ. Сон, нама, сы омбоцеде – идеме сетнень, кить учить Сонзэ самонть, Сон сы аволь уш пежетте ванськавтомань кисэ.


*а 9:16 уличинь коряс кармавтома – завещание; уличинь коряс кармавтыця – завещатель


предыдущая глава Глава 9 следующая глава