Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ФИЛИППА ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 1

1Павол ды Тимофей, Христос Иисусонь важотне, кучить шумбракстнемат Пазонь весе ломантненень, конат вейсэндязь Христос Иисус марто ды эрить Филиппасо, кемикуронь ветицятненень ды кемикуронь лездыцятненень.2Улезэ тенк чансть ды седейоймамо Пазонть, минек Тетянть, ды Иисус Христос Азоронть пельде.

Паволонь озномазо

3Мон ёвтан тынк кисэ сюкпря монь Пазонтень эрьваксть, зярдо ледстнян эйсэнк.4Ды свал, зярдо мон ознан весень тынк кисэ, мон ознан кеняркс марто,5секс мекс тынь кармиде лездамо монень пачтямс Кенярксов кулянть васенце чистэнть саезь ды течинь чис.6Монь ули покш кемемачим: Пазось, кие ушодызе тыньсэнк Эсь паро тевензэ, прядсы сонзэ Христос Иисусонь само чинтень.7Монь ули паро тувталом истя арсемс весе тынк эйстэ, секс мекс тынь свал аштетядо монь седейсэ! Тынь ульниде мартон монь чанстев важодемасонть, конась тень максозь Пазонть пельде, – аволь ансяк ней, зярдо мон пекстазян тюрьмас, сестэяк, зярдо мон кеместэ ванстынь ды апак кавтолдо невтинь Кенярксов кулянть видечинзэ.8Пазось тень неи-соды, кодамо монь покш мелем неемс тынк ды кодамо пси вечкемасо Иисус Христос ладсо палы монь седеем тыненк.9Мон ознан вана мезень кисэ: кадык тынк вечкемась касы яла седе покшсто ды покшсто, кадык максы тенк алкуксонь содамочить ды эрьва мезде домка чарькодемат,10ды истя жо колчи кочксемс сень, мезесь алкукс сехте вадря. Ды сестэ тынь Христосонь само чинтень карматадо улеме ванькст ды ачумондовицят11ды кандтадо ламо паро нуевкс-раштавкс, конась тееви Иисус Христосонь вийсэ Пазонть шнамос ды инексчис.

Монь эрямонть смустезэ – те Христос

12Кемиця ялган, монь мелем, содавлиде тынь вана мезде: весе, мезе монь марто лиссь, натой лездась Кенярксов кулянь эрьва ков пачкодемантень.13Истямо ладсо, Римень инязоронь кудонь ванстыцятне ды истя жо весе лиятнеяк кармасть парсте содамо: мон пекстазян Христоснэнь важодеманть кисэ.14Ды те монь пекстамось кемекстынзе пек ламот кемиця ялгатнень Азоронть лангс седейнежедьксэст ды сыремтинзе сынст седеяк смелстэ ды апак пеле пачтямс Пазонь валонть.

15Нама, конат-конат пачтить Христосто кулянть сельмень сявадомаст кувалт ды пелькстамонь мелест кувалт, а вана лиятне теить тень седейшкава.16Васенцетне пачтить Христосто кулянть эсест лезэс, аволь седейшкава, ды теньсэ сынь арсить седеяк стакалгавтомс монь, пекстазенть, мелявксонзо.17Омбонстнэ истя теить вечкеманть кувалт. Сынь содыть: Пазось монь путымим Кенярксов кулянть ванстомо.18Монень те ялатеке! Кода авольть пачтя Христосто кулянть, кекшезь арсема марто эли ванькс седейстэ, мон ялатеке кенярдан тенень!

Ды седе товгак карман кенярдомо!19Мон содан: тынк озноманк коряс ды Иисус Христосонь Оймеялтонть лездамонзо вельде монь нолдасамизь оляс.20Мон пек учан ды кеман: монень а сави якстерьгалемс визьксэнть эйстэ. Мекевланк, мон нейгак, кода свал, карман пачтямо Кулянть смелстэ ды Христосонь шнамо-инелгавтнеме весемесэ, эрямосон эли куломасон.21Эдь монень эрямось – те Христос, ды куломаськак – изнямо.22А бути эрямо шкастон ули вием седе тов лезэвстэ важодемс, сестэ а содан, мезе тень кочкамс.23Сезневан кавто ёнов: ули мелем туемс те масторлангстонть ды улемс Христос марто, эдь те улевель пек седе паро!24А вана кадовомс монень эрямо – те седе эрявикс тыненк.25Мон теньсэ пек кемекставинь. Секскак ней содан: кадован эрямо, карман улеме весеменк марто ды лездан тенк кастомс-домкалгавтомс Пазонтень кемеманк ды се кенярксонть, конань сон канды.26Ды зярдо мон таго сан тенк, сестэ тынк, Христос Иисус марто вейсэндязь эрямосонк, кармить улеме седеяк ламо тувталонк каштангалемс монь эйсэ.

27Уледе эсь эрямо лувсонк Христосто Кенярксов кулянть сэрейчинзэ аштицякс! Сень лангс апак вано, саван мон тенк эли а саван, ялатеке мон неевлинь-марявлинь ды содавлинь эйстэнк: тынь аштетядо лавтовдо лавтовс ды весе вейсэ тюртядо-важодтядо се кемеманть кисэ, конань юрокс ашти Кенярксов кулясь.28Ды киненьгак каршо молицятнень эйстэ илинк максо эсь прянк тандавтнемс. Истямо тынк смелчись ули сыненст ёмамонь тешксэкс, тыненк жо – идемань тешксэкс, кона сы Пазонть пельде.29Эдь тыненк максозь чансть аволь ансяк кемемс Христоснэнь, а вана натой кисэнзэ пиштемскак.30Эдь истя тыньгак ветятадо секе жо важодеманть-тюреманть, конань зярдо-бути мон ветинь тынк сельменк икеле. Кода тынь марятадо, мон ветян сонзэ нейгак.


предыдущая глава Глава 1 следующая глава