Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКОНЬ КОРЯС ЕВАНГЕЛИЯ

Глава 3

Иисус оймсема чистэ шумбралгавты коське кедь ломань

1Иисус таго сась синагогав. Тосо ульнесь цёра, конань кедезэ коськезель.2Фарисейтне тосо пек вансть Иисус мельга, шумбралгавтсы-арась цёранть оймсема чистэ. Сынь вешнесть Сонзэ чумондомань тувтал.3Сон мерсь коське кедь ломанентень: «Стяк ды арак икелев».4Мейле кевкстинзе: «Мезе теема оймсема чине, паро эли берянь? Идемс эрямонть эли ёмавтомс?» Сынь чатьмонсть.5Сестэ Сон кежевстэ варштась лангозост, пек ризнэзевсь калгодо седеест кувалт ды мерсь се ломанентень: «Венстик кедеть». Сон венстизе, ды кедезэ теевсь таго шумбракс, омбоценть кондямокс.6Тосто лисемадо мейле, фарисейтне вейсэ Иродонь ломантнень марто сеске пурнасть промкс, кармасть арсеме, кода маштомс Иисусонь.

Иисусто кулясь келейстэ срали

7Иисус тусь эсь тонавтницянзо марто эрьке чирес. Мельганзо мольсть ламо ломанть Галилеясто, Иудеясто,8Ерусалимстэ, Идумеясто ды Иордан леень тона пельдеяк, натой Тир марто Сидононь ёнкстнэстэяк. Кулясь сонзэ тевтнеде срадсь эрьва кува, ламо ломантне пертьпельде ютасть тензэ.9-10Сон ламотнень се чистэнть шумбракс теинзе, секс сэредицятне ансяк сонзэ эйс токадевемань кисэ пек эцесть ёнонзо. Сон мерсь тонавтницянстэнь кирдемс аноксто тензэ венченть сень кисэ, иляст карма ломантне ваксозонзо пек эцеме.11Аванькс оймеялтнэяк, сонзэ неезь, пракшность икелензэ ды пижнесть: «Тон Пазонть Цёразо!»12Иисус эйсэст кежевстэ кардась, иляст ёвтне, кие сон.

Иисус кочки кемгавтово апостолт

13Мейле Иисус кузсь пандо пряс, тердинзе Эстензэ кочказь кемгавтовотнень. Сынь тусть мартонзо.14Сон путынзе неть кемгавтовотнень улемс свал мартонзо, кучнемс сынст Кенярксов кулянть ёвтнеме15ды максомс тенст азорксчи шумбралгавтнемс ормадо ды пансемс идемевстнень.16Вана неть кемгавтовотнень лемест: Симон, конанень Иисус путсь лем Петра,17Зеведеень Яков ды Иоанн ялаксозо, – сыненст Сон путсь лем Боанергес, лиякс: Пурьгинень зэрть цёрат, –18Андрей, Филип, Бартоломей, Матвей, Фома, Алфеень цёразо Яков, Таддей, Симон Кананит19ды Искариотонь Иуда, кона мейле миизе Иисусонь.

Иисусонь чумондыть Сатанань виень тевс нолдамосо

20Зярдо Иисус ды тонавтницятне састь кудов, тозо таго промсть ламо ломанть, секс Сонензэ тонавтницянзо марто натой ярсамскак а зярдоль.21Кода теде марясть малавикс инеськензэ, састь тов Иисусонь саеме. Сынь кортасть, Сон, нать, превстэ лиссь.

22Вана Ерусалимстэ сазь Койс тонавтыцятне кортасть: «Сонзэ эйсэ Вельзевул, Сон идемевстнень прявтост вийсэ панси идемевсть».23Сестэ Иисус сынст тердинзе Эстензэ ды кортась тенст валвелявкссо: «Кода истя Сатанантень паневи эсь прязо?24Вана мастороськак а ванстови, явовиндеряй пельксэнь пелькс ды тюрьгадындеряй эсь юткованзо.25Кудораськеськак, конасонть свал шкань пелькстамот, а ванстови.26Истя Сатанаськак стиндеряй эсензэ каршо ды виезэ явовиндеряй кавтов, кодаяк сестэ сон а кирдеви, сонензэ сась пе.27Кияк виев ломанень кудоскак а эцеви ды киненьгак сонзэ ули-парозо а нельгеви, бути васняяк виевенть а сюлмсесы. Мейле ансяк сон саласы весе ули-паронзо.28Видестэ кортан тенк: эрьва кодамо пежетть ды Пазонь сялдомат-покордамот, кода ансяк авольть сялдо-покорда, нолдавить ломантненень.29Бути вана кияк ёвты сялдома-покордамо вал Пазонь Оймеялтонть лангс, сень пежетесь зярдояк а нолдави. Се ломаненть лангс кадови пингеде пингень чумондома».30Сон истя мерсь тенст секс, мекс сынь кортасть, келя Сонзэ потсо аванькс оймеялт.

Иисусонь авазо ды братонзо

31Тов састь Иисусонь авазо, братонзо. Кудонтень эзть соваво, кучсть Сонзэ тердеме.32Сонзэ перька озадо аштесть ломанть, сынь ёвтасть Тензэ: «Вана Тонь ават, братот ды сазорот ушосо вешнить Эйсэть».33Сон мерсь каршост: «Кие Монень ава, кить Монень братт?»34Сестэ варштась перьканзо озадо аштицятнень лангс, мерсь: «Вана Монь авам ды братон!35Кие топавты Пазонть мелензэ, се Монь братом, сазором ды авам».


*а 3:21 инеське – малавикс раське; родственник


предыдущая глава Глава 3 следующая глава