Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 14

Павол ды Варнава Икониясо

1Икониясо Павол ды Варнава совасть, кода свал, евреень синагогас ды кортасть истя псистэ, ды секскак кемезевсть Иисуснэнь пек ламо еврейть ды гректькак.2Теке марто сеть еврейтне, кинь арасель мелест кемемс, кирвазтизь лия раськенсетнень кежест кемицятнень каршо.3Павол ды Варнава кадовкшность тозо талайс ды апак пеле ёвтнесть Азоронть эйстэ. Азорось максыль апостолтнэнень вий тейнемс дивань тевть ды тамашат, ды теньсэ невтсь: сынст кортамост Сонзэ седеймарямодонть виде.4Ошонь эрицятне явовсть. Веенстнэ арасть еврейтнень пелев, лиятне – апостолтнэнь пелев.5Лия раськенсетне ды еврейтне прявтост марто састь ве мельс совавтомс визьксчамас ды чавомс кевсэ апостолтнэнь.6Ансяк апостолтнэ марясть теде ды тусть Ликаониянь Листра ды Дербе оштнэс ды сынст пертьпельга велетнес,7косо таго ёвтнесть Кенярксов кулядонть.

Листрасо ды Дербесэ

8Листрасо эрясь ломань, конань пильгензэ а маштовильть, сон чамордыцяль чачомастонзо саезь ды зярдояк эзь яка.9Те ломанеськак кунсолось, кода Павол кортась. Тонавтомань валонть ёвтамсто Павол варштась видьстэ чамордыцянть лангс ды неизе: тонань эйсэ ули кемема шумбралгадомс.10«Кортан теть Иисус Христос Азоронть лемсэ: Стяк видьстэ пильгеть лангс!» – верьга вайгельсэ серьгедсь Павол чамордыцянтень. Ломанесь кирнявтсь ды кармась якамо!11Ломантне неизь, мезе тейсь Павол, ды кармасть пижнеме ликаониянь кельсэ: «Ломанень чачосо пазт валгсть миненек!»12Сынь Варнавань лемдизь Зевсэкс, Паволонь – Гермесэкс, мекс Павол седе ламо кортась.13Ошонь ортанть икеле ульнесь Зевсэнь озкскудозо. Сонзэ озатянть мелезэ ульнесь ломантнень марто максомс казнеть-анокст апостолтнэнень. Секскак сон ветясь печкемс букат ды кандсь цецянь каштазт ортанть ваксс.14Ансяк зярдо Варнава ды Павол апостолтнэ теде марясть, сынь сезнизь эсест оршамопелест, чийсть ломантнень юткс ды кармасть пижнеме:15«Цёрат, мезе тынь тейтядо? Минь, кода тыньгак, ломантяно! Минь кандынек тенк Кенярксов куля. Кадынк неть аволь алкуксонь пазтнэнь ды велявтодо эриця Пазонтень, кона теизе менеленть ды масторонть, иневедентькак ды весементь, мезе эйсэст.16Икелень шкатнестэ Пазось эзь карда ломантнень эсест киява якамодонть.17Ансяк сестэяк Сон эзь лотксе Эсензэ эйстэ ёвтнемеде паро тевензэ вельде. Эрявикс шкасто Сон кучни миненек пиземе ды сюпав сюронь чачома, Сон максы ярсамопель, седеенек пештясынзе кеняркссо».18Неть валтнэ эль-эль лоткавтызь ломантнень апостолтнэнь туртов казнень-аноксонь максомадонть. Сынь макссть превть эрьвантень туемс кудов. Теке шкастонть сынь кадовсть тоско ды тонавтсть.

19Мейле Антиокиясто ды Икониясто Листрав састь еврейть, конат кепедизь лиятнень Паволонь каршо. Ды зярдо апостолтнэ смелстэ пачтясть куля, кепедизь ломантнень сынст каршо, истя кортазь: «Сынь мезеяк а ёвтыть алкуксонь, ансяк кенгелить». Ломантне лажнозевсть, кармасть кевсэ ёртнеме Павол лангс. Меельцекс сынь ускизь Паволонь ош ушов ды ёртызь тов. Арсесть, Павол кулось.20Ансяк зярдо кемицятне пурнавсть перьканзо, сон стясь ды совась мекев ошс. Валске сынь Варнава марто тусть Дербе ошов.

Апостолтнэнь велявтомаст Сириянь Антиокияв

21Павол ды Варнава ёвтнесть Кенярксов кулядонть Дербесэ ды пурнасть Иисус мельга ламо молицят. Мейле Павол ды Варнава мекев састь Листрав, Иконияв ды Антиокияв.22Тосо сынь кемекстасть Иисусонь мельга молицятнень оймест, тердсть сынст эрямс-аштемс кемемасонть. «Пазонь Инязорксчинтень совамодонок икеле миненек сави кирдемс ламо майсемат», – кортасть сынь.23Весе кемицянь куротнева Павол ды Варнава аравтсть кемикуронь прявтт. Сестэ сынь постонь кирдемасо ды озномасо максызь сынст трямс-ваномс Азоронтень, конанень кармасть кемеме.24Апостолтнэ ютызь Писидиянть ды састь Памфилияв.25Пергесэ Азоронь валонть пачтямодонзо мейле сынь састь Атталияв.26Атталиясто венчсэ таго велявтсть мекев Антиокияв, косто Пазонь седейшкавань ванстома марто икеле кучозельть теемс се тевенть, конань ней топавтызь.27Мекев самодост мейле сынь пурнызь кемицянь куронть ды ёвтнизь весементь, мезе Пазось топавтсь вельдест ды кода Сон панжизе кемемас кенкшенть аволь еврейтнененьгак.28Тосо сынь Иисусонь мельга молицятнень марто кадновсть талайс.


предыдущая глава Глава 14 следующая глава