Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 1

1Иисус Христосонь важозо Павол, конань Пазось тердизе апостолокс ды кочкизе Эсь Кенярксов кулянзо пачтицякс, кучи шумбракстнемат весе тыненк, Рименсетненень, конатне вечкевить Пазонтень ды конатнень Пазось тердинзе улеме Сонензэ алтазь ломанекс.2Пазось те Кенярксов кулянть алтызе умок Эсь пазмарицянзо вельде Пазонь пельде Сёрмадовкссонть.3Те кулясь Сонзэ Цёрадонзо, кона кода ломань чачсь-лиссь Давид инязоронть буестэ-раськестэ.4Ансяк иневаньксчинь Оймеялтонзо коряс Сон ульнесь аравтозь Пазонь пек виев Цёракс, мезенть Пазось невтизе кулозьстэ Сонзэ вельмемасонть. Те – Иисус Христос, минек Азорось.5Сонзэ вельде Пазось макссь миненек апостолокс улемань чансть: секскак Сонзэ лементь инексчинзэ кисэ минь ветятано весе раськетнень Сонензэ кемемас ды кунсоломас.6Сынст ютксо тыньгак, конат тердезь улеме Иисус Христосонь ломанекс.7Улезэ тенк чансть ды седейоймамо Пазонть, минек Тетянть, пельде ды Иисус Христос Азоронть пельде.

Павол ёвты сюкпря Пазонтень

8Васняяк ёвтан сюкпря Иисус Христос вельде монь Пазонтень весень тынк кисэ, секс мекс тынк кемемадонть кармасть содамо весе масторлангонть келес.9Пазось, конанень мон весе седейсэнь важодян, зярдо пачтян Кенярксов кулянть Сонзэ Цёрадонть, Сонсь тень неиця-содыця, кода мон апак лотксе ледстнян тынк10эсь озномасон. Мон свал вешан: паряк, окойники, монень мереви самс тынк содавтомо, бути тенень ули Пазонть мелезэ.11Эдь мон пек бажан неемс тынк: мелем ули максомс тенк оймеялтонь кодамояк казне ды теньсэ виевгавтомс тынк ойменк.12Истя арсян кемекстамс-ливчакавтомс прянок минек вейсэнь кемеманть вельде: монень – тынк кемеманть вельде, тыненк – монсенть вельде.

Павол ды Римень кемикурось

13Содадо, кемиця ялгат, эдь мон ламоксть пурнакшнынь самс тыненк, ансяк те шкас кодат-бути тувталт кирдевтсть монь. Монь мелем тынк ютксояк теемс седе ламо Христос мельга молицят, кода мон тейнекшнинь лия таркатневаяк.14Мон прок долксан весе ломантнень икеле: гректнень ды варвартнэнь икеле, превейтнень ды асодыцятнень икелеяк.15Секскак, мезесь ашти монь эйстэ, мон анокан ёвтнемс Кенярксов кулянть тыненккак, Рименсетне.

Кенярксов кулянть виезэ

16Мон а виздян Христосто Кенярксов кулядонть: сон – Пазонь вий, кона иди весень Сонензэ кемицятнень, васняяк еврейтнень ды мейле лия раськенсетненьгак.17Эдь те Кулясонть панжови, кода Пазось ломантнень лови чумовтомокс: ансяк педе пес кемемань кисэ. Сёрмадовкссо ёвтазь: «Ломанесь, кона кемемань кисэ ловозь чумовтомокс, карми эрямо».

Весе ломантне чумовт

18Пазонь кежень пандомась валги менельстэ эрьва кодамо пежетень ды зыянонь теицятнень лангс, конатне эсь зыяновчисэст кекшить-вельтить ломантнень эйстэ видечинть.19Эдь весе, мезе ломаненть вийсэ содамс Пазонть эйстэ, те сыненст максозь чарькодевиксстэ: Сонсь Пазось тень панжизе сыненст.20Менельтнень-мастортнэнь теемасто саезь Пазонь анеявикс ёнкстнэ – Сонзэ пингеде пингень виезэ ды пазоксчизэ – парсте неявить ломантненень сеть тевтнесэ, конатнень Сон теинзе. Секс сынст лангсто мейсэяк а саеви чумост.21Куш сынь Паздонть содыть, ялатеке Сонзэ кода Пазонть а шныть ды а ёвтыть сюкпря Тензэ. Мекевланк, сынст мелест-арсемаст кармасть улеме чавот-стякот, ды ачарькодиця седеест чополгадсть.22Сынь ловить эсь пряст превеекс, алкукс жо лиссть превстэ.23Ине Пазонть таркас, кона эри пингеде пингес, сынь сюконить кедьсэст теевкстнэнень-идолтнэнень, конат молить кулыця-наксадыця ломань ёнов, нармунь, ниле пильгсэ якиця ракша ды ёзмолдыця ёнов.

24Тень кисэ Пазось кадынзе сынст аванькс ды визькс седей мелест топавтомас. Секскак сынь вейкест-вейкест марто нулгодьксэкс тейнить эсь рунгост.25Сынь Паздо видечинть полавтызь манчемасо. Сынь сюконить ды важодить Пазонь теевксэнтень Инешке-Теицянть таркас. Улезэ Сон шназь-чанстязь пингеде пингес! Аминь.26Секс Пазось кадынзе сынст визькс мелест топавтнеме. Аватне полавтызь мирде марто эрямо коенть тень каршо молицясо: ава ава марто визькс тевень тейнемасо.27Истя жо цёратнеяк кадызь ава марто эрямонть ды кирвазсть визькс мельсэ вейкест-вейкест туртов. Цёра цёра марто тейнить визькс тевть, ды тень кисэ максозь тенст эсест эйсэ чумонь пандома, кона эрявськак истя беряньстэ пряст ветямонть кисэ.

28Сень кувалма, мекс сынст арасель мелест ловомс-содамс Пазонть, Сон кадынзе сынст колазь превест алов, тейнеме сень, мезе а эряви тейнемс.29Сынь пештязь эрьва кодамо авидечисэ, ускурямосо-усксевемасо, апаросо, жаднойчисэ, зыянчисэ ды колазь прясто пильгс. Сынь сельмень сявадыцят, маштницят-чавныцят, сёвныцят, манчицят, зыянонь арсицят, берянь кулянь сравтницят.30Сынь кенгелицят, Пазонь авечкицят, покордыцят, каштант-покшкавтницят, прянь шныцят, зыянонь сыргавтыцят, тетянь-авань ломанькс апутыцят,31ачарькодицят, аволь кемевикст, авечкицят, аладицят, казямо седейть.32Сынь содыть: сетне, кить теить истя, Пазонь виде Коенть коряс максовить куломас. Сынь ялатеке аволь ансяк сынсь тейнить тень, мик шныть сетненьгак, кить теинить сынст ладсо.


*а 1:1 Смустенть чарькодевтеманзо кисэ сисемеце валрисьменть ушодксонзо («кучи шумбракстнемат...») кандынек васенце валрисьменть пес.

*б 1:7 Вант: 1:1


предыдущая глава Глава 1 следующая глава