Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 2

Иневанькс Оймеялтонь самось

1Сась Ведьгеменце чинь покшчись. Весе тонавтницятне ве мельсэ пурнавсть вейсэ.2Апак учо менельстэ каятотсь шалт, кона мольсь давол вармань увт ёнов, ды пештизе весе кудонть, косо сынь ульнесть.3Мейле сынь несть мезть-бути толгелень кондямот, конат явшевсть ды валгонесть вейкень-вейкень эрьванть вельксэс.4Сеске весе пештявсть Иневанькс Оймеялтсо ды кармасть кортамо эрьва кодамо лия кельсэ, конатнесэ кортамонть максызе тенст Оймеялтось.

5Ерусалимсэ эрясть Пазнэнь кемиця ломанть, еврейть, конат састь масторлангонь эрьва кодамо раськетнень ютксто.6Зярдо марязевсь те шалтось, пурнавсть ламо ломанть, ды весе абунгадсть. Эдь эрьвась эйстэст марясь, кода кортасть сонзэ тиринь кельсэнзэ!7Весе прасть дивас ды талнозь кевкстнесть вейкест-вейкест: «Нать весе неть ломантне аволь Галилеянь эрицят?8Кода эно истя эрьвась эйстэнек марясынзе сынст минек тиринь кельтнесэ кортамсто?9Минь, конат Парфиясто, Мидиясто ды Эламсто, Месопотамиясто, Иудеясто ды Каппадокиясто, Понтосто ды Асиясто,10Фригиясто ды Памфилиясто, Египетстэ ды Ливиянь Киринея ёнкссто, конат састь Римстэ, еврейть ды евреень кемемас совавтозь лия раськень ломанть,11Критэнь ды Аравиянь эрицят – весе минь марятано, кода сынь ёвтнить Пазонь ине тевтнеде минек тиринь кельтнесэ!»12Дивазь ды талнозь, сынь кевкстнесть вейкест-вейкест: «Кода тень чарькодемс?»13Лиятне, пеедькшнезь, кортасть: «Сынь иредсть ламбамо винадо».

Ведьгеменце чинь покшчистэ Петрань кортамозо

14Сестэ Петра, кевейкее апостолтнэнь марто вейсэ, стясь ды гайтев вайгельсэ мерсь ломантненень: «Еврейть ды весе, кить эрить Ерусалимсэ! Мон панжса тенк, кода тень чарькодемс. Кунсоломизь мелень явозь.15Неть ломантне а иредьстэть, кода тыненк маряви. Шказо ней ансяк валскень вейксэце час.16Аволь истя! Те истя топавтовсть Иоиль пазмарицянть валонзо:17
“Меельце читнестэ, – корты Пазось, –
Мон валса Эсень Оймеялтонть эрьва ломаненть лангс.
Тынк цёранк ды тейтеренк кармить пазмарицякс кортамо,
од ломантне кармить нееме чартть-неявкст,
тынк сыре атятне кармить нееме онт.
18Истя жо Эсень важотнень-уретнень лангс,
кода цёратнень, истя аватнень лангскак,
Мон валса Оймеялтом сеть читнестэ,
ды сынь кармить пазмарицякс кортамо.
19Мон невтян тамашат менель прясо
ды эрьва кодат тешкст мода лангсо:
верь, тол ды тусто качамо.
20Чипаесь чополгады, ковось верии
Азоронть Чинть самодонзо икеле,
покш ды иневалдо Чиденть икеле.
21Теке марто эрьвась, кие тердьсы Азоронть лездыцякс, – идеви”.

22Израилень ломанть! Кунсоломизь: Назаретэнь Иисус тыненк кучозель Пазонть пельде. Пазось тень невтизе-кемекстызе виевдеяк виев тевсэ, ине тамашасо ды дивань тешкссэ. Сынст Сон теинзе Иисусонь вельде тынк сельменк икеле, кода тынськак содатадо.23Те Иисусонть тынь маштынк. Сон максозель тынк кедь алов Пазонть арсевксэнзэ ды икелев ваноманзо коряс. Тынь эскесэ вачкодинк Сонзэ крёст лангс Коень а содыця лия раськенсетнень кедьсэ.24Ансяк Пазось Сонзэ вельмевтизе, олякстомтызе куломань вийденть. Куломанть арасель виезэ кирдемс Сонзэ.25Вана мезе Давид кортась Сонзэ эйстэ:
“Мон свал эсень икеле неса Азоронть.
Сон вить кедь ёно монь эйстэ,
ды те максы монень вий кеместэ аштемс.
26Секскак монь седеем кенярды, келем корты моронь валсо.
Натой рунгомгак карми оймсеме Пазонть лангс кемезь:
27Тон а кадсак оймем кулозтнень юткс, тоначис,
Тон а макссак Эсеть Иневаньксэнть рунгонзо наксадомас!
28Тон невтят монень эрямонь кинть,
ды пештясамак кеняркссо Тонь чамат икеле!”

29Ялгат-оят, мереде видьстэ ёвтамс тенк Давид покштядонок: сон кулось ды калмазель, калмозояк течис ванстовсь тесэ.30Давид ульнесь пазмарицякс ды содась: Пазось божазь-пежетькстазь алтась кепедемс сонзэ раськень ломантнень ютксто ломанень рунгосо Христосонь ды озавтомс сонзэ инязоронь озамо таркантень.31Давид икелев неизе Пазонь кучовт Идицянть вельмеманзо ды кортась: Сонзэ оймезэ а кадови кулозтнень юткс, тоначис, ды рунгозо а наксады.32Вана самай те Иисусонть вельмевтизе Пазось, ды тень минь весе неинек!33Тетя Пазось кепедизе Иисусонь Эсь вить кедензэ ёнов ды максызе Тензэ Эсь Оймеялтонзо, кода алтакшноськак. Те Оймеялтонть Иисус валызе минек лангс. Тень тынь тынсь ней марятадо ды нетядо.34Давид эзь кепедевкшне менельс, ялатеке сон мерсь:
«Азорось мерсь монь Азоронтень:
озак Монь вить кедь ёнов,
35зярс Мон а тейсынь Тонь душманот
пильгеть путома таркакс».
36Секскак, Израилень раське, кеместэ содак: Пазось теизе Иисусонь Азорокс ды Эсензэ кучовт Идицякс – те Иисусонть, конань тынь эскесэ вачкодинк крёст лангс».

37Зярдо ломантне маризь тень, сынст седеест пек ризнэзевсть. Сынь кевкстнесть Петрань ды лия апостолтнэнь: «Ялгат-оят, ней мезе миненек теема?»38Петра тень каршо мерсь: «Эрьвась эйстэнк велявтозо Пазонтень, нававтовозо Иисус Христосонь лемс, пежетензэ нолдамга, – ды максови тенк казнекс Иневанькс Оймеялтось.39Эдь те алтамонть Пазось максызе тыненк, тынк эйкакштнэнень ды весе сетнененьгак, конат васолот Пазонть эйстэ, весенень, кинь тердьсы Азорось, минек Пазось».40Ламо лия валсояк Петра кортась ды энялдсь сынст икеле: «Идеде эсь прянк зыяндонть, кона пры неень пингень колазь ломантнень лангс».41Сеть, конат мельспаросо кемсть сонзэ валтнэнень, нававтовтсть пряст. Се чистэнть кемицятненень вейсэндявсть колмо тёжашка ломанть.42Весе сынь свал эрясть-аштесть апостолтнэнь тонавтомасо, эсь ютковаст ялгаксчисэ, кшинь синдемасо ды озномасо.

Кемицятнень эрямост

43Ерусалимсэ апостолтнэнь вельде тейневсть ламо тамашат ды дивань тевть, секскак эрьванть седейсэ эрясь сорнома ды пелема.44Весе кемицятне свал эрясть-аштесть велувсо; весе, мезест ульнесь, ульнесь вейсэнь.45Сынь микшнесть кудост-чист, ули-парост ды явшесть ярмакост лия кемицятнень ланга, эрьвантень арасьчинзэ коряс.46Эрьва чине сынь пуромильть Пазонь кудонь пирявкс потс, эсест кудовасткак пурнавильть вейсэ кшинь синтреме, ярснесть кецнезь, ванькс седейсэ47ды Пазонть шназь. Весе ломантне вечксть кемицятнень, ды чистэ чис Азорось вейсэндясь идезтнень кемицянь куронтень.


предыдущая глава Глава 2 следующая глава