Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 5

Вирез ды пекстазь книга

1Сестэ мон неинь инязоронь таркасо Озадонть вить кедьстэ тапарксонь кондямо книга. Сон сёрмадозель кавто пельга ды пекстазель сисем пекстамо тешкссэ.2Ды мон неинь пек виев ангел, кона кевкстнесь верьга вайгельть: «Кинень сэрейчинзэ-покшчинзэ коряс яжавить пекстамо тешкстнэ ды панжови книгась?»3Ансяк арасель вейкеяк истямо, менель лангсояк, мода лангсояк, мода потсояк, кие панжовлизе книганть ды варштаволь эйзэнзэ.4Сестэ мон ниреждезь карминь авардеме, мекс эзь муеве кияк, кона сэрейчинзэ-покшчинзэ коряс панжовлизе книганть ды варштаволь эйзэнзэ.5Сестэ сыре атятнестэ вейкесь пшкадсь монень: «Иля аварде. Кунсолок, изнясь Иудань буестэ-раськестэ Левесь, Давидэнь юрсто-корёнсто Лисевксэсь! Сонензэ яжавить сисем пекстамо тешкстнэ ды панжови книгась».

6Ды инязоронь озамо тарканть икельде, ниле ракшань-ломанень кондямотнень куншкасто, сыре атятнень ютксто, мон неия стядо аштиця Вирезэнть, конань рунгонзо лангсо неявсть печкемань аржот. Сонзэ ульнесть сисем сюронзо ды сисем сельмензэ. Неть сельметне – Пазонь сисем оймеялтт, конат кучозь весе масторланганть.7Вирезэсь шаштсь инязоронь таркасо Озадо аштицянтень ды саизе Сонзэ вить кедьстэнзэ конёв тапарксонть.8Зярдо Сон саизе книганть, ниле ракшань-ломанень кондятнэ ды комснилее сыре атятне прасть кумажа лангс Вирезэнть икелев. Эрьванть кедьсэ ульнесь кайга ды сырнень ваканнэ, конась пештязель ладансо – Пазонь ломантнень озномасо.9Ды сынь серьгедсть од шнамо моро:
«Тонеть сэрейчить-покшчить коряс саеви книгась
ды панжовить пекстамо тешкстнэ.
Эдь Тон печкезелить
ды Эсеть верьсэнть рамить-идить Пазонть туртов ломантнень
эрьва буестэ, раськестэ, масторсто ды кельстэ.
10Тон теимизь минек инязорокс
ды минек Пазонтень важодиця попокс,
ды минь карматано улеме масторлангсо прявтокс».

11Сестэ мон варштынь ды маринь ангелэнь вайгельть. Ангелтнэде ульнесть ламодояк-ламо, тёжат ды тёжань тёжат! Сынь пурнавсть инязоронь озамо тарканть перька, ниле ракшань-ломанень кондямотнень ды сыре атятнень перька.12Сынь морасть виев вайгельсэ:
«Вирезэнтень, конань печкизь,
сэрейчинзэ-покшчинзэ коряс максови вий,
сюпавчи, ине превть ды нарде!
Шнамо, инексчи ды чанстямо-баславамо Тензэ!»
13Сестэ мон таго маринь, кода весе Пазонь кедьсэ теезесь менель лангсо ды мода лангсо, мода потсо ды иневедьсэ, весемесь, мезесь эйсэст, морась:
«Инязоронь таркасо Озадонтень ды Вирезэнтень
улезэ чанстямо-баславамо, шнамо ды азорксчи
пингеде пингес!»
14Ниле ракшань-ломанень кондямотне мерсть: «Аминь, улезэ истя!» Ды комснилее сыре атятне прасть кумажа лангс ды кармасть сюконякшномо пингеде пингес Эрицянтень.


предыдущая глава Глава 5 следующая глава