Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 12

Паволнэнь панжозь чартне ды неявкстнэ

1Арась монень кодамояк лезэ прянь шнамонть эйстэ. Ней карман ёвтнеме неявкстнэде ды панжозь чартнеде, конатнень максынзе-невтинзе монень Азорось.2Мон содан Христоснэнь вейке кемиця, кона кемнилее иеде теде икеле кандозель-кепедезель колмоце менеленть лангс. А содан, кода сон тосо ульнесь, рунгосо эли аволь рунгосо, тень эйстэ соды ансяк Пазось.3Мон содаса те ломаненть, сон жо кандозель-кепедезель райс. Ансяк а содан, кода, рунгосонзо эли аволь рунгосо, соды ансяк Пазось.4Тосо сон марясь истят валт, конатнень ломаннень а ёвтавить ды а мереви ёвтнемскак.5Вана те ломаньсэнть шнаса прям, эсь прям шнамо мейсэяк а карман, эсь лавшочидень башка.

6Бути мон шнавлияяк прям, сестэ аволинь уле превтемекс, эдь мон ёвтан ансяк ванькс видечи. Ялатеке тень а тейса: кадык кияк а арси монь кувалма седе ламо, мезе сон неи монь эйсэ ды мари монь пельде.7Нама, Пазось максынзе монень а эрсиця ине неявкстнэнь. Ды секс, прям верьга а кандомга, Сон пезнавтсь монь рунгос сардо* – Сатанань ангел, кона монь сорновтни-чави, илязан кандо верьга прям.8Мон колмоксть энялдынь-ознынь Азоронтень таргамс эйстэнь те сардонть.9Сестэ Сон монь каршо ёвтась: «Тонеть саты Монь чанстесь. Монь виесь седе пек неяви лавшочинть эйсэ». Секскак мон истямо кеняркс марто шнан прям эсь лавшочисэнь: свал улезэ-эрязо эйсэнь Христосонь виесь.10Секс монь мелем витеви лавшочисэяк, покордамосояк, стакачисэяк, пансемасояк, лепштямосояк, конатне монень максовить Христосонь кисэ. Эдь зярдо мон лавшан, сестэ виеван.

Павол кода апостол Коринфень ломантненень

11Ней мон эсь прям шнамосо пачкодинь допрок превстэ лисемас! Тынь монь тенень кармавтымизь! Те тыненк эряволь монь шнамс! Эдь мон кодаяк аволь седе берянян неть “покш апостолтнэде”, куш мон сыненст улянгак чаво таркакс.12Мон покш цидярдома марто тейнинь тынк ютксо ламо дивань чартть, тамашат ды виев тевть, конат невтить монь алкуксонь апостолокс улемам.13Мезе жо тыненк арасель максозь лия кемикуротнень коряс? Паряк, ансяк се: мон араселинь тыненк стака канстокс. Нолдынк, инеськеть, тень кисэ монь чумом!

14Ванодоя, мон пурнан тыненк уш колмоцеде, ды нейгак стака канстокс мон тенк а улян. Монень эрявтадо тынсь, аволь тынк ярмаконк! Эдь аволь эйкакштнэнень эряви таштамс тетяст-аваст туртов, мекевланк, тетятненень-аватненень – эйкакшост туртов.15Тынк кисэ мон кецязь максса весементь, мезем ули, натой эсь прямгак. Бути мон тынк вечктядызь истя пек, мекс сестэ тынь монь вечксамизь аволь истя пек?16Истя тынь кортатадо: мон тыненк араселинь стака канстокс. Паряк, кой-кить ялатеке кортыть: мон, келя, эсь ёжовчисэнь, манязь саидизь тынк эсь кедень алов?17Арази мон эстень саинь лезэ се ломантнень вельде, конатнень тыненк кучнынь?18Мон энялдынь Титнэнь молемс тыненк ды мартонзо саемс се лия кемиця ялганть. Паряк, Тит сайсь пельденк кодамояк лезэ? Арази минь сонзэ марто эсь тевенек теинек аволь вейке мельсэ-превсэ? Арази якатано аволь вейке киява?

19Тынь, паряк, яла арсетядояк: минь те сёрмасонть тынк икеле ансяк идетяно прянок? Арась! Минь кортатано, кода Христосонь важот, Пазонть сельмензэ икеле. Ды весе, мезе минь тейтяно, – те ансяк тынк кастоманк-кемекстамонк кисэ, монь вечкевиксэнь.20Тыненк самсто пелян неемс тынк аволь истямокс, кодамокс мелем неемс. Ды, паряк, тыньгак монь несамизь аволь истямокс, кодамокс меленк неемс монь. Истя жо пелян вастомс тынк ютксо сёвномат-пелькстамот, сельмень сявадома, кежть, эсь прянь вечкема, кенгелемат, тошксемат-кортавтомат, верьга прянь кандома, лувтомочи.21Мон пелян, зярдо таго сан тыненк, Пазом илязамам покорда тынк кисэ. Пелян, сестэ сави монень авардемс тынк эйстэ ламонь кисэ – сетнень кисэ, кить икелеяк совсесть пежетьс ды нейгак эзть велявто истямо пежетест эйстэ: аванькс бажамодост, усксевемадост-ускурямодост ды лия визьксэнь тевдест.


предыдущая глава Глава 12 следующая глава