Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 23

Иисус Пилатонь икеле

1Сестэ весе сынст промксось стясь ды ветизе Иисусонь Пилатонь икелев.2Тосо кармасть сынь чумондомо Сонзэ: «Минь чарькодинек: те ломанесь аравты минек раськенть а виде ки лангс, кармавты а пандомс каявкс Римень кесарентень ды яволявты Эсь прянзо Пазонь кучовт Идицякс, лиякс меремс, Инязорокс».3«Тон – евреень Инязорось?» – кевкстизе Сонзэ Пилат. Иисус каршонзо мерсь: «Те тон истя кортат».4Сестэ Пилат мерсь попонь покштнэнень ды весе ломантненень: «Мон кодамояк чумо те ломаньстэнть а неян».5Сынь ялатеке аштесть эсест валост лангсо: «Эсензэ тонавтомасонть Сон азаргавты ломантнень Иудеянь келес. Ушодсь Сон Галилеясто ды ней вана сась тейгак».


Иисус Иродонь икеле

6Галилеядо марязь, Пилат кевкстсь: «Арази Сон Галилеянь эриця?»7Зярдо Пилат кармась содамо: Иисус се масторстонть, кона максозь Иродонь кедь алов, кучизе Иисусонь Ироднэнь. Неть читнестэ Иродгак ульнесь Ерусалимсэ.8Иисусонь неезь, Ирод пек кецязевсь: сон умок неиксэлизе Иисусонь. Сон ламо марсесь Эйстэнзэ ды пек учось неемс Сонзэ пельде кодамояк тамаша.9Ирод макснесь Иисуснэнь ламо кевкстемат, ансяк Сон каршонзо мезеяк эзь ёвта.10Попонь покштнэ ды Койс тонавтыцятне, конат ульнесть тосо, кежейстэ кармасть Иисусонь чумондомо.11Ирод эсензэ ушмантнэнь марто покорясь Иисусонь ды нарьгась Сонзэ лангсо. Сон оршавтсь Иисусонь лангс инязоронь оршамот ды кучизе Сонзэ мекев Пилатнэнь.12Ирод ды Пилат те шкас кирдсть кеж вейкест-вейкест лангс, те чистэнть саезь жо теевсть оякс.


Иисуснэнь – кулома

13Сестэ Пилат пурнынзе попонь покштнэнь, прявтнэнь ды весе ломантнень.14Сон мерсь тенст: «Тынь ветинк монень те ломаненть, кона, валонк коряс, аравты раськенть авиде ки лангс. Вана тынк сельме икеле мон кевкстния ды эзия муе те ломаненть чумонзо мейсэяк, мейсэ тынь Сонзэ чумондтадо.15Иродгак эзь муе кодамояк чумо, эдь мон кучокшныя Сонзэ тензэ. Кода нетядо, Сон эзь тее мезеяк истямо, конань кисэ Сон судямаль куломас.16Секс мон кармавтан чавомс Сонзэ локшосо, мейле – нолдаса».17Раськенть мелензэ коряс евреень эрьва Инечинтень Пилатнэнь эрявсь нолдамс пекстазтнень эйстэ вейкень.18Ансяк весе пуромозтне ве вайгельсэ кармасть рангомо: «Кулома Сонензэ! Нолдык миненек Вараввань!»19Варавва пекстазель ошсо ломантнень кепедевтемаст кисэ ды ломанень маштомань кисэ.20Пилат арсесь олякстомтомс Иисусонь, секс таго кортазевсь пуромозтнень марто.21Ансяк сынь рангсть каршонзо: «Крёст лангс, крёст лангс вачкодик Сонзэ!»22Колмоцеде пшкадсь тенст Пилат: «Эно кодамо зыянонть Сон тейсь? Мон а неян Сонзэ эйстэ истямо чумо, конань кисэ саволь куловтомс. Секс мон кармавтан чавомс Сонзэ локшосо, мейле – нолдаса».23Ялатеке сынь верьга вайгельть пижнесть ды вешсть вачкодемс Иисусонь крёст лангс. Сынст ды попонь покштнэнь сеерематне окойники изнизь Пилатонь меленть.24Ды Пилат теизе сень, мезенть вешсть.25Сон олякстомтызе сыненст сень, кона пекстазель масторонь прявтнэнь каршо кепедевеманть кисэ ды ломанень маштоманть кисэ – сень, конань кисэ вешсть. Иисусонь марто Пилат тейсь истя, кода вешсть ломантне.


Крёст лангс вачкодема

26Зярдо Иисусонь ветясть крёст лангс вачкодема таркантень, ушмантнэ лоткавтызь кодамо-бути Симононь, киринеянь ломаненть, кона те шкане сыль паксясто, ды кармавтызь сонзэ Иисус мельга крёстонь кандомо.27Иисусонь мельга мольсть ламо ломанть, конатнень ютксо ульнесть аваткак. Сынь авардсть ды лайшесть Сонзэ кисэ.28Сынст пелев велявтозь, Иисус мерсь: «Ерусалимень ават! Илядо аварде Монь кисэ! Авардеде эсенк ды эйкакшонк кисэ!29Эдь сы истямо шка, зярдо кармить кортамо: “Уцяскавт а чачтницятне, эйкакштомотне ды зярдояк потесэ а андыцятне!”

30Сестэ ломантне кармить вешеме пандтнэнь: “Прадо минек лангс!” – ды шушмотнень: “Вельтямизь минек!”31Бути пиже чувтонть марто теить истя беряньстэ, сестэ седеяк берянь ули коське чувтонть марто!»

32Иисус марто вейсэ ветясть крёст лангс эскесэ вачкодемс зыянонь теиця кавто ломантькак.33Зярдо сынь пачкодсть се таркантень, конанень мерильть Пряловажа, тосо вачкодизь Иисусонь крёст лангс. Зыянонь теицятненьгак вачкодизь: вейкенть Иисусонь эйстэ вить пелев, омбоценть – керш пелев.34Иисус мерсь: «Тетяй! Нолдыть пежетест: эдь сынь а содыть, мезе теить». Ушмантнэ, жеребейсэ каязь, явшизь эсь ютковаст Иисусонь оршамонзо.35Ломантне аштесть ды вансть. Сынст марто прявтнэяк вансть ды згилясть Сонзэ лангсо истямо валсо: «Те ломанесь идесь лиятнень! Кадык ней идесы Эсь прянзо, бути Сон Пазонь кучовт Идиця, Пазонь кочкавт!»36Ушмантнэяк нарьгасть Иисусонь лангсо: сынь шаштнесть малазонзо, макснесть Тензэ чапамо вина37ды кортасть: «Бути Тон евреень Инязоро, идик ней Эсь прят!»38Иисусонь велькссэ сёрмадозель грекень, римень ды евреень кельсэ: «Те евреень Инязоро».

39Вейкесь эскесэ вачкодезь зыянонь теицятнестэ згилясь Иисусонь лангсо: «Бути Тон Пазонь кучовт Идицят, сестэ идик Эсь прят ды минеккак идимизь!»40Омбоцесь кардась васенценть: «Нать тон Паздо а пелят? Тон тонськак истя жо крёст лангсат!41Минь судязтяно видестэ, секс истя пандтано эсь тевенек кисэ. А те ломанесь мезе тейсь беряненть?»42Ды сон пшкадсь Иисуснэнь: «Азоро, монь ледстямак, зярдо сат Инязорксчизэть».43Иисус тень каршо мерсь: «Алкукс кортан теть: те чистэнть саезь кармат улеме Монь марто райсэ».


Иисусонь куломазо

44-45Ульнесь чинь куншка, зярдо апак учо чись кекшсь. Весе масторось копачавсь чоподасо, ды истя ульнесь колмо часонь перть. Пазонь кудосо коцтонь пирявксось сезевсь куншкава кавтов,46ды Иисус серьгедсь виев вайгельсэ: «Тетяй! Тонь кедьс максса Мон Эсень оймем!» Ды неть валтнэнь марто лиссь Иисусонь оймезэ.47Зярдо сядонь прявтось тень неизе, сон ёвтась шнамо вал Пазонтень ды мерсь: «Алкукскак Те Ломанесь ульнесь а чумо!»48Ломантне, конат тов пурнавкшность ваномо, весе тень неемадо мейле мелявтозь рукштяесть кедьсэст, сралесть эсест кудова.49Сетне, конат содылизь Иисусонь, аштесть ве пеле ды вансть весементь лангс. Сынст ютксо ульнесть аватнеяк, конат састь мартонзо Галилеясто.


Иисусонь калмамозо

50Инепромксонь важодицятнень ютксо ульнесь Иосиф лемсэ ломань, кона ульнесь виде ды чевте седей.51Сон эзь шна сень, мезе арсекшнесь ды теекшнесь Инепромксось. Иосиф чачозель евреень Ариматея ошсо ды учось Пазонь Инязорксчинть.52Иосиф сась Пилатнэнь ды вешизе Иисусонь уловонть.53Сон валгстызе уловонть крёстстонть, тапардызе лияназонь коцтсо ды путызе пандс керязь калмос, козо те шкас киньгак эзть калмсе.54Те ульнесь пеця, оймсема чинь анокстамо чи. Оймсема чись эль-эль устави.55Галилеясто Иисус марто сыця аватне мольсть Иосиф мельга ды весементь неизь: калмонть ды кода калмизь Сонзэ уловонть.56Кудов сазь, сынь анокстасть тантейстэ качадыця ойть ды калмамо коень лия ваднемат. Оймсема чистэ аватне оймсесть, кода кармавтсь Коесь.



предыдущая глава Глава 23 следующая глава