Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 6

1Секс а карматано аштеме Христосто тонавтомань ушодкстнэнь лангсо, ютатано седе тов, домка чарькодемантень! Миненек а эряви одс путнемс тонавтомань юр неть тевтнеде: куломас ветиця тевтнень кадома, Пазонтень кемема2ды тонавтома эрьва кодамо нававтомадо, кемиця лангс кедень путомадо, кулозьстэ вельмемадо ды пингеде пингень судто.3Эрьга, сыргатано седе тов, ды истя минь арсетяно теемеяк, бути тенень карми улеме Пазонть мелезэ.

4Эдь кодаяк а путовить мекев янксема-видькстамо ки лангс сетне, кить тусть-потасть кемеманть эйстэ. Сынь уш весть ульнесть валдочисэ, варчнизь менелень казнень танстенть, ды минек марто вейсэ максозель сыненсткак Иневанькс Оймеялт.5Сынь варчнизь Пазонь паро валонть танстензэ ды Пазонть икелепелень инязорксчинть виензэ.6А вана мейле сынь тусть-потасть ве ёнов кемеманть эйстэ! Ней уш сынь кодаяк мекев а велявтовить янксема-видькстамо ки лангс, секс мекс сынь эсест оймесэст одс вачкодить крёст лангс Пазонь Цёранть ды весень сельме икеле сёвныть-позорить Эйсэнзэ.

7Паксясь, кона ламоксть валнови ды симдеви пиземень ведьсэ, максы ламо сюро сенень, кие сонзэ мельга яки, ды чанстяви Пазонть пельде.8Мекевланк, паксясь, кона касты пупиця тикше ды кирмалавт, мезекскак амаштовикс. Сон маласо Пазонь сюдомантень, ды, окойники, сонзэ пултасы тол.

9Вечкевикс ялган, куш минь истя кортатанояк, ялатеке виевстэ кемтяно: тынк тевенк ютыть седе парсте, ды тынк икелепелев учи идема.10Эдь Пазось авиде а эрси. Сон а стувтсы тынк важодеманк ды вечкемань тевенк, конань тынь невтинк Сонензэ, зярдо лездыде ды лездатадо Сонзэ ломантненень.11Минек меленек: невтевлиде тынь истямо покш важодемань мель пензэ самс, зярс а топавтови тынк седейнежедьксэнк.12Минек бажамонок: илядо уле нузяксокс, мекевланк, тееде сетнень ладсо, конатненень эсь кемемаст ды цидярдомаст кисэ максови се, мезенть алтызе Пазось.

Пазонь алтамось кемевикс

13Зярдо Пазось макссь алтамо Авраамнень, Сон кемекстызе алтамонть Эсь прясонзо божазь-пежетькстазь, секс мекс арасель кияк Сондензэ ине, конань лемсэ Сон пежетькставоль.14Сон мерсь: «Алкукс-алкукс, Мон сюпавсто тонь чанстятан, ды пек ламолгавтсынь тонь эйкакшот-нуцькат».15Ды истя Авраамнень кувать цидярдоманзо кисэ максозель Пазонь алтавксось.

16Ломантне свал пежетькстыть эстедест покшонть лемсэ, ды те пежетькстамось кемексты ёвтазенть ды путы пе весе спорямотненень-пелькстамотненень.17Вана мекс Пазоськак Эсь алтамонзо кемекстызе пежетькстамосо. Теньсэ Сонзэ ульнесь мелезэ седеяк чарькодевиксстэ невтемс сетненень, кинень максозь алтамось: Сонзэ мелезэ зярдояк а полавтневи.18Ды ней минек улить неть кавто аполавтневиця тевтне, Пазонь пежетькстамось ды алтамось, конатнесэ Пазось кодаяк зярдояк а кенгели. Сынь аштить миненек, конат састь идема мельга Сонзэ кедь алов, ине кемексчинь лисьмапрякс. Истя жо сынь лездыть тенек виевстэ кирдевемс се седейнежедькссэнть, кона минек икеле.19Те седейнежедьксэсь минек ойментень теке якорь, виев ды кемевикс сюлмамонок, кона сови менельсэ Пазонь кудонть потс, коцтонь пирявксонть удалов.20Миненек лездамга, тов, минденек икеле, совась Иисус, кинь невтицянок, зярдо Сон кармась улеме Попонь прявтокс пингеде пингес, Мелькиседек ладсо.


предыдущая глава Глава 6 следующая глава