Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 15

Ёмазь реведе ды ёмавтозь ярмакто валвелявкст

1Иисусонь перька пуромкшность кунсоломонзо налогонь-каявксонь пурныцятне ды лия пежетев ломантне.2Фарисейтне ды Койс тонавтыцятне музгордсть: «Те ломанесь тейневи ялгакс ды ярснияк пежетевтнень марто».3Сестэ Иисус ёвтнесь тенст истямо валвелявкс:4«Мерьсынек, тынк эйстэ кинь-бути улить сядо ревензэ, ды вейкесь эйстэст ёмась. Мезе карми тееме азорось? Сон кадсынзе вейксэньгемень вейксэтнень ванома таркас ды карми ёмазенть вешнеме се шкас, зярс сонзэ а мусы.5Зярдо мусы, сайсы покш кеняркс марто эсензэ лавтовонзо лангс6ды кудов самодо мейле тердьсынзе весе ялганзо, шабранзо ды мери тенст: “Кенярдодо мартон, мон муия ёмазь ревем!”7Ёвтан тенк: менель лангсояк истя эрси. Тосо, нама, кецить вейксэньгемень вейксэ видекойсэ эрицятненень, конатненень, келя, а эряви эрямонть полавтома. Ансяк седеяк покш кеняркс ули сестэ, зярдо вейке пежетев ломань велявтови Пазонть пелев.

8Мерьсынек, кодамо-бути авань ульнесть кемень сиянь ярмаконзо, ды вейкенть эйстэст ёмавтызе. Нать сон а кирвазти тол, а карми кудонь тенсеме ды вадрясто вешнеме, зярс а мусы?9Ды зярдо сон мусы, тердьсынзе ава ялганзо, шабра аватнень ды мери тенст: “Кенярдодо монь марто: мон муия ёмазь ярмаком”.10Мерян тыненк: Пазонь ангелтнэяк истя жо кецить, зярдо велявты Пазонть пелев вейке пежетев ломань!»


Валвелявкс тетядо ды ёмазь цёрадо

11Иисус поладсь: «Вейке ломаненть ульнесть кавто цёранзо.12Веженсесь мерсь тетянстэнь: “Тетяй, максык монень кудонь-чинь пельксэм”. Тетясь явизе кавтост юткова кудонь-чинь ули-паронть.13Зярыя чинь ютазь, веженсь цёрась микшнизе эсензэ ули-паронь пельксэнть, пурнась-сэрнясь ды тусь васоло масторов. Сон ветясь тосо нулгодькс ломанень эрямо кой, ды секскак ёмавтнизе весе ули-паронзо.14Ды зярдо сон весе ули-паронть нолдызе варма мельга, сась се масторонтень покш вачочи, ды цёраськак кармась пек майсеме-пиштеме.15Цёрась мольсь се масторонь вейке эрицянтень, ды тона сиведизе сонзэ тувонь ваномо эсензэ паксясо.16Сон покш мельспаросо пештявлизе пекензэ тувонь андомс кувтёлдо, ансяк сеньгак тензэ кияк эзь максне.

17Сестэ, эсь эрямонь чарькодезь, цёрась арсезевсь: “Зяро сиведезь ломанть тетянь кедьсэ, ды весе сынь ярсыть кшиде пекень пештемазост, мон вана тесэ эль кулан вачодо!18Туян тестэ, молян эсень тетянень ды мерян: Тетяй, мон чуман Менельсэнть икеле ды тонь икелеяк.19Ней мон тонь цёракскак ловомс а маштован, саемак куш сиведезь ломанеть юткс”.20Ды сон седе курок тусь эсензэ тетянстэнь.

Цёранть васолдо неезь, тетянзо седеесь ризнэзевсь. Тетясь чийсь каршонзо, кутмордызе ды кармась палсемензэ.21Цёрась мерсь: “Тетяй, мон чуман Менельсэнть икеле ды тонь икелеяк. Ней мон тонь цёракскак ловомс а маштован”.22Тетясь мерсь эсензэ важотненень: “Кандодо тей сехте паро оршамопельть ды оршавтынк сонзэ. Тонгодо суркс сурозонзо ды карсемапельть – пильгезэнзэ.23Ветядо парсте андозь ваз, печкинк: карматано ярсамо ды весёлгалеме!24Эдь те монь цёрась кулокшнось – ней вельмесь, ёмакшнось – ды муевсь”. Ды кармасть сынь кецямо ды эрьгелеме.

25Покш цёразо те шкане ульнесь паксясо. Зярдо сон кармась пачкодеме кудов, марясь седямонь, морамонь ды киштемань вайгельть.26Сон тердсь вейке важо ды кевкстизе сонзэ: “Те тосо мезе?”27Тона ёвтась: “Тонь ялаксот сась, тетят печкевтсь парсте андозь ваз, эдь цёрась велявтсь тетянстэнь шумбракс”.28Покш цёрась кежиявтсь ды кудовгак а совиксэль. Сестэ тетязо лиссь ды кармась икелензэ энялдомо.29Цёрась мерсь тетянстэнь: “Мон зяро иеть важодян тонеть теке уре, ды зярдояк вейкеяк меремат трокс эзинь аракшно. Ялатеке монь туртов тон эзить мере печкемс сея левкскеяк ялгань марто весёлгалеманть туртов!30Зярдо вана сась те тонь цёрась, кона ули-паронзо ёмавтызе-юводизе усксевиця аватнень марто, тон сонензэ печкевтить парсте андозь ваз!”31Сестэ тетясь мерсь: “Цёрам, тон свал монь марто, ды весе, мезем ули, те тонь.32Ней вана миненек эряви кецямс ды эрьгелемс тенень: тонь ялаксот кулокшнось – ней вельмесь, ёмакшнось – ды муевсь!”»



предыдущая глава Глава 15 следующая глава