Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 4

Авраамонь кемемазо

1Сестэ мезе минь ёвтатано Авраамдо, минек раськень кезэрень пингень тетядонть? Мейсэ сонзэ муевксэзэ?2Бути Авраам ловозель чумовтомокс эсь тевензэ кисэ, сестэ сонензэ, нама, улевель мейсэ каштангалемс – ансяк аволь Пазонть икеле.3Вана кода теде кортави Сёрмадовкссонть: «Авраам кемезевсь Пазонтень, ды тень кисэ Пазось ловизе сонзэ чумовтомокс».4Важодицянтень питнень пандомась ули се, мезе тензэ эряви тевензэ кисэ, аволь казне.5Мекевланк, бути ломанесь кеми-нежеди аволь эсь тевензэ лангс, ансяк Пазонть лангс, кона пежетев ломаненть лови чумовтомокс, сестэ те кемеманть кисэ Пазось ловсы сонзэ чумовтомокс.6Текеде арсесь Давид инязороськак, зярдо кортась, кодамо уцяскав се ломанесь, конань Пазось лови чумовтомокс тевензэ лангс апак вано:7
«Кодат уцяскавт сеть, конатнень зыянов тевест нолдазь-простязь
ды конатнень пежетест нардазь!
8Кодамо уцяскав се ломанесь,
кинень Пазось а путсы чумокс пежетензэ!»

9Арази те уцяскась максови ансяк сетненень, кить керявтозь, эли истя жо апак керявтозтнененьгак? Эдь минь Сёрмадовкссто ловнотано: «Пазось ловизе Авраамонь чумовтомокс кемеманзо кисэ».10Зярдо эно сон ульнесь истямокс ловозь? Керявтомадо икеле эли керявтомадо мейле? Нама, керявтомадо икеле, аволь мейле.11Ансяк мейле сон керявтозель. Те керявтомась ульнесь кода тешкс, кона невтизе чумовтомочинзэ, кона максозель тензэ кемеманзо кисэ керявтомадо икеле. Истямо ладсо Авраам кармась улеме тетякс весе сетненень, конатнень Пазось лови чумовтомокс кемемаст кисэ, куш сынь апак керявтояк.12Истя жо Авраам кармась улеме тетякс керявтозтнененьгак, конат молить сонзэ мельга аволь ансяк керявтомань коряс, истя жо се кемеманть коряскак, кона ульнесь Авраамонь, минек тетянть, уш керявтомадо икеле.

Пазонь алтамось весе кемицятненень

13Пазось алтась мирэнть-масторонть максомс Авраамонь ды эйкакшонзо-нуцьканзо кедьс. Те алтамось максозель Авраамнень кемеманзо кисэ, конань коряс Пазось ловизе сонзэ чумовтомокс, аволь сень кисэ, мекс топавтсь Коень вешематнень.14Бути те алтамось максоволь ансяк сетненень, кить топавтыть Коенть, сестэ ломантнень кемемась улевель стяконь ды Пазонь алтамоськак допрок чаво.15Коесь тарги мельганзо Пазонь кеж; косо арась Кой, тосо арась сонзэ колсемаяк.

16Секскак алтамось максозь кемеманть коряс: Пазонь чанстень казнекс улеманзо кисэ. Истя Пазонь алтамось улезэ кеме Авраамонь весе эйкакшонзо-нуцьканзо туртов – аволь ансяк сетненень, кить топавтыть Коенть, истя жо сетнененьгак, кить кемить Авраам ладсо. Сон весенень миненек тетя,17кода ёвтазь Сёрмадовкссо: «Мон теитинь тонь ламо раськень тетякс». Истямокс сон улияк Пазонть сельме икеле, Пазонть, конанень сон кемсь, кона велявты кулозтнень эрямос ды кона Эсь валсонзо свал теи од, мезесь икеле эзь ульне.18Зярдо уш а мезе лангс ульнесь кемемс-нежедемс, Авраам ялатеке седейнежедькс марто кемсь: сон карми улеме ламо раськень тетякс, неть валтнэнь коряс: «Тонь эйкакштнэде-нуцькатнеде кармить улеме истя жо пек ламо».19Ды сонзэ кемемась эзь лавшомгадо, куш сон содась: сонензэ малав уш сядо иеть, цёрань виезэяк маштсь, ды нинзэяк потмозо умок чувтомозель.20Сон эзь кавтолдозеве, ялатеке кемсь Пазонь алтамонтень ды кемеманть вельде пештявсь вийсэ. Сон шнась Пазонть21ды пек кемсь: Пазонть ули виезэ теемс сень, мезе алтась.22Те кемеманть коряс Пазось ловизе Авраамонь чумовтомокс.

23Сёрмадовксонь неть валтнэ «ловизе чумовтомокс» ёвтавить аволь ансяк Авраамнень,24истя жо миненеккак. Пазось минеккак ловсамизь чумовтомокс, зярдо минь кемтяно Сенень, Кие вельмевтизе кулозьстэ Иисусонь, минек Азоронть.25Пазось максызе Христосонь куломас пежетьстэ ливтеманок кисэ ды кулозьстэ вельмевтизе минек чумовтомокс ловоманок кисэ.


предыдущая глава Глава 4 следующая глава