Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКОНЬ КОРЯС ЕВАНГЕЛИЯ

Глава 15

Иисус Пилат икеле

1Валске марто сеске попонь покштнэ, прявтнэ, Койс тонавтыцятне ды Инепромксонь весе лиятнеяк пурнавсть вейс ды састь ве мельс: сынь сюлмсизь Иисусонь, ветизь ды максызь Пилатнэнь.2Пилат кевкстизе Иисусонь: «Тон евреень Инязорось?» Сон каршозонзо мерсь: «Те тон истя кортат».3Попонь покштнэ Иисус лангс таргсесть ламо чумондомат.4Секс Пилат таго Сонзэ кевкстизе: «Мекс мезеяк каршо а ёвтат? Неят, зяро чумот Тонь лангс невтить».5Иисус тень каршояк мезеяк эзь ёвта. Пилат натой дивась.

Варавва олякстомтозь – Иисус судязь

6Ломантнень вешемаст коряс эрьва покшчинень Пилат нолдыль пекстазтнеде вейке.7Сестэ пекстазельть ялганзо марто Варавва – сынь масторонь прявтнэнь каршо вейсэ кепедевемстэ маштсть ломань.8Ломантне састь ды кармасть вешеме Пилатонь кедьстэ сень, мезе сон свал тейниль тенст.9Сон кевкстинзе: «Ули меленк, нолдаса тенк евреень Инязоронть?»10Сон секс истя мерсь, содась, попонь покштнэ максызь Иисусонь сонзэ кедьс сельмест сявадомань кувалма.11Попонь покштнэ ломантнень абунгавтсть, седе паро Иисусонь таркас вешемс Вараввань.12Пилат таго кевкстсь: «Мезе сестэ монень теемс сень марто, конанень тынь мертядо евреень Инязоро?»13Сынь каршозонзо серьгедсть: «Крёст лангс вачкодик Сонзэ!»14Пилат кевкстинзе: «Эно кодамо зыянонть Сон тейсь?» Сынь седеяк пек сеересть: «Крёст лангс Сонзэ!»

15Сестэ Пилат, ломантнень мелест топавтомга, нолдызе тенст Вараввань, Иисусонь жо мерсь локшосо керямс ды максомс вачкодемс крёст лангс.

Ушмантнэнь нарьгамост

16Ушмантнэ совавтызь Иисусонь азоркудонь пирявкс потмонтень, лиякс преторияс, ды пурнызь весе лия ушмантнэнь.17Лангозонзо оршавсть якстере оршамо, прязонзо путсть пупиця куракшонь тарадсто кодазь каштаз18ды кармасть мартонзо нарьгазь шумбракстнеме: «Шумбра улезэ евреень Инязорось!»19Чавсть Эйсэнзэ пря ланга палкасо, сельгенесть лангозонзо, икелензэ пракшность пульзядо, сюконякшность Тензэ.20Кода лангсонзо нарьгамодонть пешкедсть, каявтызь лангстонзо якстере оршамонть ды оршавтызь Эсь оршамопелензэ. Мейле ливтизь Сонзэ крёст лангс вачкодемс.

Иисусонь крёст лангс вачкодемазо

21Ки лангсо сынь вастсть вакскаст ютыця киринеянь ломаненть, Симононь, Александр марто Руфонь тетяст, кона сыль паксясто. Ушмантнэ кармавтызь сонзэ крёстонь кандомо.22Иисусонь ветизь таркантень, конань лемезэ Голгофа, смустезэ «Пря ловажань тарка».23Макснесть Тензэ симемс смирна марто човорязь вина, ансяк Сон эзь симе эйстэнзэ.24Иисусонь крёст лангс вачкодизь, ды ушмантнэ, жеребейсэ каязь, явизь эсь ютковаст Сонзэ оршамонзо, кинень мезе саты.

25Шказо ульнесь валскень вейксэ част, зярдо Сонзэ вачкодизь крёст лангс.26Велькссэнзэ сёрмадозель Сонзэ чумозо: «Евреень Инязоро».27Мартонзо крёст лангс вачкодсть кавто салыцят-маштницят, вейкень вить пелензэ, омбоценть керш пелензэ.28Истя топавтовсь Сёрмадовксось, косо ёвтазель: «Зыянонь теиця юткскак Сонзэ совавтсызь».

29Вакска ютыцятне, пряст чаравтозь, згилясть лангсонзо: «Я-а! Пазонь кудонь калавтыця ды колмо чис одов стявтыця!30Идик ней Эсь прят, валгт крёстонть лангсто!»31Истя попонь покштнэяк Койс тонавтыцятнень марто, згилязь, кортасть вейкест-вейкест марто: «Лиятнень идекшнесь, ансяк Эсь прязо Тензэ а идеви.32Кадык ней Израилень Инязорось, Пазонь кучовт Идицясь, валги крёстонть лангсто! Зярдо минь несынек тень, сестэ карматано кемеме Тензэ». Мартонзо крёст лангс вачкодезтнеяк згилясть лангсонзо.

Иисусонь куломазо

33Чинь куншкане весе масторонть келес теевсь чопода, ды истя ульсь колмо часонь перть.34Колмоце чассто Иисус верьга вайгельть пижакадсь: «Элой! Элой! Лама сабактани?» Смустезэ: “Пазом! Пазом! Мекс Монь кадымик?”35Маласо зярыя аштицятне тень маризь, кортасть: «Кунсолодоя, Сон Илиянь терди».36Вана вейке чийсь, начтсь чапамо винасо ведьпанго, пезнавтызе палка пес ды венстизе Иисуснэнь симемс. «Аштеде, вансынек, сы-арась Илия крёст лангсто валгстомонзо», – мерсь сон.37Иисус пек пижакадсь, ды лиссь оймезэ.38Се шкастонть Пазонь кудосо коцтонь пирявксось сезевсь кавтов верде саезь алов.

39Сядонь прявтось, кона аштесь каршозонзо, неизе, кода истя пижакадомадонть мейле лиссь оймезэ, ды мерсь: «Алкукс, те ломанесь ульнесь Пазонь Цёра!»40Сесэ ульнесть ве ёндо ваныця аваткак. Сынст ютксо ульнесь Магдалань Мария, веженсь Яковонь ды Иосиень аваст Мария ды Саломия.41Сынь Иисусонь Галилеясо улемстэяк мартонзольть ды лездасть Тензэ. Ульнесть сесэ ламо лия аваткак, конат састь мартонзо Ерусалимс.

Иисусонь калмамозо

42Чизэ чопотетсь. Те чись ульнесь пеця, оймсема чинь анокстамо чи.43Секс сась Ариматея ошонь Иосиф, кона ульнесь Инепромксонь пек лововикс ломань, кона сонськак учось Пазонь Инязорксчинть. Сон апак пеле совась Пилатнэнь ды вешизе Иисусонь уловонть.44Пилат дивась Иисусонь куроксто куломантень, тердизе сядонь прявтонть, кевкстизе сонзэ: «Арази Сон кенерсь куломо?»45Ды зярдо сядонь прявтось кемекстызе Сонзэ куломанть, Пилат мерсь максомс уловонть Иосифнень.46Иосиф рамась лияназонь коцт, валгстызе уловонть крёстонть лангсто, тапаризе сонзэ коцтсонть ды путызе калмос, кона чувозель кевпандос. Калмос совамо таркантень Иосиф кевердсь кев.47Магдалань Мария ды Иосиень авазо Мария вансть ды неизь, козонь Сонзэ путызь.


предыдущая глава Глава 15 следующая глава