Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 18

Павол Коринф ошсо

1Теде мейле Павол кадызе Афинанть ды тусь Коринфев.2Тосо сон вастсь еврей, лемезэ Акила, чачомань коряс Понтсто. Сон Прискилла нинзэ марто сась аволь умок Италиясто секс, мекс Клавдий кесаресь кармавтынзе весе еврейтнень кадомс Рименть. Павол сась сыненст.3Сынь Павол марто ёроковольть вейке тевсэ – ульнесть коцткудонь теицят, – ды секс Павол кадовсь кедьсэст вейсэ важодеме.4Эрьва оймсема чистэнть сон кортнесь синагогасо, снартнесь совавтомс кемемас еврейтнень ды гректнень.

5Зярдо Македониясто састь Сила ды Тимофей, Павол, оймеялтонть ветямонзо коряс, невтсь еврейтненень: Иисус – те Пазонь кучовт Идицясь.6Ансяк зярдо еврейтне кармасть сонзэ каршо молеме ды сёвнозь кортамо, сон оршамонзо лангсто сорновтызе пуленть ды мерсь тенст: «Тынь тынсь чумот эсенк ёмамосонк! Мон ваньксан, икеленк а чуман. Ней туян тонавтомо лия раськенсетнень».

7Павол лиссь синагогастонть ды совась Пазонь ловиця ломаннень, Юстуснэнь, конань кудозо синагоганть вакссоль.8Крисп, синагогань прявтось, ды весе кудораськезэ кемезевсть Азоронтень. Кемезевсть ды нававтызь пряст Коринф ошонь ламо лия эрицятнеяк, конат кунсолыльть Паволонь.

9Весть веть Азорось мерсь Паволнэнь неявкссо: «Иля пеле! Седе товгак кортак, иля чатьмоне.10Мон – тонь марто, секс киньгак виезэ а саты теемс тонеть зыян. Те ошсонть ламо Монь кемевикс ломанень».11Ды Павол эрясь тосо, Пазонь валонтень тонавтозь, омбоце пель ие.

12Зярдо Акайясо путозель губернаторокс Галлион, еврейтне вейсэндявсть Паволонь каршо ды ветизь сонзэ судс.13Сынь кармасть чумондомонзо: «Те цёрась терди ломантнень Пазонть ловомо аволь минек Коенть коряс».14Павол мезеяк эзь кенере ёвтамо, кода Галлион пшкадсь еврейтненень: «Еврейть! Улиндеряй те тевсэнть коень кодамояк коламо эли покш зыян, сестэ монь улевель тувталом кунсоломс тынк.15Молиндеряй тесэ пелькстамось-спорямось кодамо-бути тонавтомадо, лемтнеде ды тынк Койденть, юкснеде неть сюлмотнень тынсь. Те тевсэнть мон тенк а карман судиякс».16Ды сон панинзе сынст судямонь кудостонть.17Сестэ гректне кундызь Состенэнь, синагогань прявтонть, ды пек чавизь видьстэ судямонь кудонть кустема лангсо. Галлион эзь яво тенень кодамояк мель.

Антиокияв Паволонь велявтомазо

18Павол ульнесь Коринфсэ таго сатышка ламо чить. Мейле сон ёвтась туемань валт, кадынзе кемиця ялгатнень ды венчсэ тусь Сирияв. Мартонзо тусть Акила ды Прискиллаяк. Кенкреясо, туемадонзо икеле, Павол нарынзе черензэ секс, мекс макссь Пазонтень алтамонь кеме вал.19Зярдо састь Эфесэв, Павол кадынзе Акилань ды Прискиллань. Сонсь совась синагогав ды кармась кортнеме еврейтнень марто.20Сынь энялдсть: “Кадовт минек марто зярыя шкас”. Ансяк Павол эзь кадово.21Туемстэнзэ сон мерсь: «Монень эряви ютавтомс сыця покшчинть Ерусалимсэ. Тей мон таго сан, бути карми улеме Пазонть мелезэ». Ды венчсэ тусь Эфесстэ. Акила Прискилла марто кадовсь Эфессэ.22Кесариясо сон валгсь венчстэнть ды тусь ялго Ерусалимев, косо вастовсь тосонь кемицятнень марто, мейле тусь Антиокияв.23Павол эрясь тосо зярыя шка. Мейле сон сыргась тосто, ошсто ошс ютызе Галатиянь ды Фригиянь ёнкстнэнь, косо кемекстась весе Иисусонь мельга молицятнень кемемаст.

Аполлос тонавты Эфессэ

24Эфесэв те шкане сась вейке еврей, лемезэ Аполлос. Сон чачоманзо коряс ульнесь Александриясто, парсте содылинзе Пазонь Сёрмадовкстнэнь, кортамосояк ульнесь кол.25Сон тонавтозель “Азоронть кинтень”, псистэ ды видестэ ёвтнесь Азородонть, куш сонсь содылизе ансяк Иоаннонь нававтоманть.26Синагогасояк сон ушодсь кортамо апак пеле. Зярдо Акила ды Прискилла маризь Аполлосонь, сынь сонзэ тердизь эстест ды седе домкасто панжизь тензэ “Азоронь кинть”.27Зярдо Аполлос сайсь мель молемс Акайяв, кемиця ялгатне лездасть тензэ ды кучсть тосонь кемицятненень мартонзо сёрма, конань эйсэ энялдсть парсте вастомадонзо. Тов сазь, сон пек лездась сетненень, конат Пазонть чанстензэ кувалма кармасть кемеме.28Аполлос весень икеле виевстэ лангс ливтизе еврейтнень авиде тонавтоманть. Пазонь Сёрмадовкстнэнь вельде сон кемевиксстэ невтсь весенень: Иисус – те Пазонь кучовт Идицясь.


предыдущая глава Глава 18 следующая глава