Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 17

Идем ракша лангсо ласте аштиця авась

1Вана сась монь малас вейкесь сисем ангелтнэстэ, конатнень ульнесть сисем ваканост, ды кортазевсь монь марто: «Сак малав, мон невтьса тонеть, кодамо чумонь пандома учи содавикс усксевиця аванть, кона эри-ашти ламо лейтнень чирева.2Сонзэ марто ускурясть масторлангонь инязортнэ, ды сонзэ ускурямонь винадонть симсть иредемезэст мода лангонь эрицятне».3Мейле Пазонь Оймеялтось саимим Эсь виензэ алов, ды ангелэсь пачтимим чаво модас. Тосо мон неинь ава, кона ласте аштесь валдо якстере идем ракша лангсо. Идем ракшанть весе рунгозо сёрмалезель Пазонь покордыця лемтнесэ. Ракшанть ульнесть сисем прянзо ды кемень сюронзо.4Авась оршазель чопода якстере ды валдо якстере оршамосо, сонзэ лангсо цивтёрдсть сырнеть, питней кевнеть ды ведьэрьгинеть. Кедьсэнзэ сон кирдсь сырнень кече, кона пештязель сонзэ ускурямонь нулгодькссэ ды аванькссэ.5Конясонзо сёрмадозель лемезэ, конасонть кекшезь смустесь: “Ине Вавилон, весе масторлангонь ускурицятнень ды нулгодькстнэнь аваст”.6Ды мон неия: авась иредезель Пазонь ломантнень, Иисуснэнь кемемаст кисэ маштнезтнень, вердест.

Сонзэ неезь, мон абунгадынь дивамодонть.7Ангелэсь кевкстимим: «Мекс тон абунгадыть? Мон панжса тонеть аванть ды сисем прясо ды кемень сюросо идем ракшанть, конань лангсо авась, салавачист.8Идем ракшась, конань тон неик, зярдо-бути ульнесь, ней жо сон арась. Сон таго лиси тоначинь потмакстомо отьмастонть, ды куроксто стардсы сонзэ куломась-ёмамось. Мода лангонь эрицятне, конатнень лемест менелень-масторонь теевемадо икеле апак сёрмадо эрямо книгантень, абунгадыть, зярдо несызь те идем ракшанть, кона ульнесь, ней арась ды таго карми улеме.9Тень чарькодемс эряви превень домкачи. Сисем прятне – те сисем шушмот, конатнень лангсо озадо ашти те авась.10Теде башка, неть прятне – сисем инязорт: сисемтнестэ вететне умок кулость, котоцесь нейгак инязор. Сисемецесь те шкас эзь са, ды зярдо сы, тензэ пек а куватьс улемс инязорокс.11Идем ракшась жо, конась зярдо-бути ульнесь ды ней арась, те сонсь кавксоце инязорось ды теке марто сеть сисемтнень ютксто вейкесь, ды куроксто стардсы сонзэ куломась-ёмамось.12Кемень сюротне, конатнень тон неить, – те лия кемень инязорт, конат те шкас эзть оза инязоронь таркас. Сыненст максови инязорксчись идем ракшанть марто вейсэ вейке часос.13Весе кементнень вейке бажамост, ды эсест виест ды азорксчист сынь макссызь идем ракшантень.14Сынь ды идем ракшась сыргавтыть тюрема Вирезэнть каршо. Ансяк Вирезэсь изнясынзе сынст, эдь Сон азортнэнь Азорось ды инязортнэнь Инязорось. Ды Сонзэ марто молить Сонзэ тердевть, кочкавт ды кемевикс ломанензэ».

15Ангелэсь поладсь седе тов: «Лейтне, конатнень тон несыть ды конатнень чирева эри-ашти ускуриця авась, те ломанть ды раськеть, буеть ды кельть.16Неть кемень сюротне, конатнень тон неить, ды идем ракшась кежейгадыть те ускуриця аванть лангс ды сезнесызь оршамонзо, кадсызь сонзэ кепе-штапо. Сынь азарьстэ порьсызь сонзэ рунгонзо ды пултасызь толсо.17Эдь Пазось путсь инязортнэнь седейтнес бажамо топавтомс Сонзэ арсеманзо. Секскак сынь, эсь ютковаст ве мельс празь, макссызь эсест инязорксчист идем ракшантень се шкас, зярс а топавтовить Пазонь валтнэ.18Те авась, конань тон неик, ине ош, кона ашти инязоравакс весе масторлангонь инязортнэнь лангсо».


предыдущая глава Глава 17 следующая глава