Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТВЕЕНЬ КОРЯС ЕВАНГЕЛИЯ

Глава 18

Кие сехте ине?

1Зярыя шкань ютазь тонавтницятне мольсть Иисус ваксс, кевкстизь: «Кие весемеде покш Менельсэнть Инязорксчисэнть?»2Сестэ Иисус тердсь эйкакш, аравтызе куншказост3ды мерсь: «Видестэ мерян тенк: а лиякстоминдерятадо ды а улиндерятадо мелень-превень коряс эйкакшонь кондямокс, Менельсэнть Инязорксчинтень а совавтадо.4Кие путсы эсь прянзо те эйкакшонть кондямокс вишкинекс-сэтьмекс, се Менельсэнть Инязорксчисэнть ули сехте покшокс.5Кие саи эстензэ Монь лемем кисэ вейке истямо эйкакш, се Монь сайсамам.

6А вана кие совавты пежетьс куш вейкешка неть Монень кемиця вишкинетнень-асодавикстнэнь ютксто, сенень седе паро улевель, поводевельтькак кирьгазонзо покш яжамо кев ды ваявтовлизьгак иневедень сэрей таркас.7Зыян масторлангонтень, косо ламо эрьва кодат кундсемкат-килькшт, конат правтыть ломантнень пежетьс! Истят тевтне, нама, свал эрсить, а вана кодамо зыян се ломанентень, кона лиятнень правты пежетьс!8Бути тонь кедеть эли пильгеть совавты эйсэть пежетьс, керик сонзэ ды ёртык! Ве кедтеме эли ве пильгевтеме пингеде пингень эрямонтень совамось ули теть седе паро, кавто кедь ды кавто пильге марто пингеде пингень толс ёртомадонть.9Бути тонь сельметь совавты эйсэть пежетьс, таргик сонзэ ды ёртык! Ве сельме марто пингеде пингень эрямонтень совамось ули теть седе паро, кавто сельме марто тоначинь амадниця толс ёртомадонть.

10Ванодо, вейкедеяк неть вишкинетнень эйстэ илядо велявто-безарде. Кемевтян эйсэнк: менель лангсо сынст ванстыця ангелэст свал аштить Монь менелень Тетянь чаманзо икеле».

šмазь реведе валвелявкс

11«Ломантнень Цёрась сась ёмазтнень вешнеме ды идеме.12Кода тынь арсетядо: мезе карми тееме ломанесь, конань сядо ревестэнзэ вейкесь ёми? Нама, сон кадсынзе вейксэньгемень вейксэтнень ванома тарказост пандо лангс ды туи ёмазенть вешнеме.13Муиндерясы сонзэ, кемеде тень: сонзэ кисэ карми седеяк пек эрьгелеме вейксэньгемень вейксэ апак ёмазтнень коряс.14Истя менелень Тетянккак арась мелезэ ёмавтомс куш киньгак неть вишкинетнень эйстэ».

Пежетень теиця кемиця ялга

15«Теиндеряй малавиксэть тонь каршо пежеть, мольть тензэ ды эсь юткованк мерть теде сонензэ. Кунсолындерятанзат, сестэ тон муик эсь малавиксэть.16А кунсолындерятанзат, сестэ сайть мартот вейке эли кавто лия ломанть, эдь Пазонь Сёрмадовкссо ёвтазь: “Кадык эрьва чумондомась ули кемекстазь кавто эли колмо неицянь-содыцянь валсо”.17Сынсткак а кунсолындерясынзе, сестэ ёвтак тевдензэ кемицянь курос. Кемицянь куронтькак а кунсолындерясы, сестэ сон улезэ теть, теке Пазонь а содыця ломань эли каявксонь-налогонь пурныця.

18Видечи кортан тенк: мезе тынь сюлматадо масторлангсо, се ули сюлмазь менель лангсояк; мезе нолдатадо масторлангсо, се ули нолдазь менель лангсояк.19Ды кортан тенк: бути масторлангсо тынк ютксто кавто ломанть ве мельсэ вешить мезеяк, сестэ весе тень менелень Тетям макссы тенст.20Эдь косо пурнавить куш кавто эли колмо ломанть Монь лементь кисэ — Монгак тосо улян сынст марто».

Маштодо чумонь нолдамо-простямо

21Сестэ Петра мольсь Иисус ваксс ды мерсь тензэ: «Азоро! Бути малавиксэм яла сови пежетьс монь каршо, сестэ зяроксть монень эряви нолдамс пежетензэ? Натой сисемксть?»22Иисус мерсь каршонзо: «Аволь ансяк сисемксть, а вана сизьгемень сисемксть.

23Менельсэнть Инязорксчизэ моли истямо тев ёнов: ульнесь инязор, кона арсесь вешемс пандомат эсензэ тевень ветиця важотнень пельде.24Зярдо сон ушодсь пандовкстнэнь ловомо, ветясть тензэ ве важо, конанень эрявсь тензэ пандомс кемень тёжат талантт.25Ансяк важонтень пандомс ульнесь а мейсэ, ды инязорось мерсь саезенть пандомга миемс урексчис сонсензэ, нинзэ ды эйкакшонзо весе уликсчинзэ марто.26Сестэ важось прась пильгезэнзэ, энялдозь тензэ кортась: “Инязор! Учок зярскак, весе теть пандсынь!”27Инязорось ульсь седеймарикс се важонтень, олякстомтызе сонзэ ды пандомантькак нолдызе.28Важось лиссь, вастызе лия важо ялганзо, конанень эрявсь тензэ пандомс сядо динарт. Тона кундызе ялганзо кирьгадо, кармась эйсэнзэ повамо, сонсь кортась: “Велявтыть весе, мезе саить!”29Ялгазо, кумажа лангс празь, энялдсь тензэ: “Учок зярскак, весе теть пандсынь!”30Ансяк тонань арасель мелезэ учомс. Сон мольсь ды пандовксонть велявтомазонзо озавтовтызе сонзэ пекстамо кудос.31Тень неизь лия важо ялганзо, конатнень саинзе покш мельсапаро. Сынь мольсть ды ёвтнизь инязоронтень весементь, мезе теевсь.32Сестэ инязорось тердизе те важонть ды мерсь тензэ: “Нулгодькс важо! Тонь энялдомат коряс мон весе пандовксот-долкот нолдыя.33Арази аволь эряво тонетькак улемс истямо седеймарикс эсь важо ялгатень, кодамо седеймарямо мон путынь тонеть?”34Инязорось пек кежиявтсь ды максызе сонзэ муцямс пекстамо кудос весе пандовксонть велявтомазонзо.

35Истямо ладсо Монь менелень Тетямгак теи тынк марто, а нолдындерясынк седейсэнк эсь малавиксэнк пежетензэ».


предыдущая глава Глава 18 следующая глава