Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 3

1Сестэ кодамо питнейчист еврейтнень лия раськетнень коряс ды кодамо лезкс керявтоманть эйстэ?2Нама, лезксэсь покш весеме ёндо! Васенцекс, Пазось кемсь лангозост ды максызе тенст Эсь кулянзо.3Мезе сень эйстэ, бути конат-конат сынст ютксто ульнестькак Пазонтень акемевиксэкс? Арази сынст акемевиксчись ёртсы-ёмавтсы Пазонь кемевиксчинть?4Нама, арась! Пазось свал ашти Эсь валонзо лангсо, мик сестэяк, бути “весе ломантне кенгелицят”. Сёрмадовксонть эйсэ Паздонть ёвтазь истя:
«Тонь Валот свал кармить лововомо видекс,
ды Тон изнясыть сетнень, конат чумондыть Тонь».
5А бути минек авидечись теи седеяк неявиксэкс Пазонь видечинть, мезе миненек сестэ ёвтамс? Арази Пазось ули авидечисэ, зярдо Сон кеждязь панды минек чумонок? Мон тесэ кортан ломанень арсемань коряс.6Нама, аволь! Бути те улевель истя, сестэ Пазонтень кодаяк а судяволь те масторлангось.7Бути монь кенгелемась теи седеяк неявиксэкс Пазонь алкуксчинть, ды теньсэ седеяк кастови Сонзэ инексчись, мекс сестэ монь судямс кода пежетень теицянть?8Мекс сестэ а меремс: «Карматано тееме зыян паронть лисеманзо кисэ»? Конат-конат кенгелицятне-сялдыцятне, алкукскак, чумондыть минек истя кортамонок кисэ. Неть ломантнень чумост пандови тевест коряс!

Ве ломаньгак арась чумовтомо

9Кода эно сестэ? Арази минь, еврейтне, аштетяно седе паро таркасо лиятнень коряс? Допрок аволь! Минь уш икеле невтинек, кода еврейтне, истя лия раськетнеяк – весе вейкетьстэ аштить пежетень виенть ало.10Тенде ёвтазь Сёрмадовкссо истя:
«Ве ломаньгак арась чумовтомо,
11вейкеяк арась чарькодиця, ды кияк а вешни Пазонть.
12Весе велявтсть Пазонть эйстэ, весе колазь.
Арась паронь теиця – арась вейкеяк.
13Сынст кирьгапарест – теке панжадо калмот,
сынст кель прясост – манчема,
турваст лангсо – куловтыця валт, теке гуень яд,
14курго потмост пештязь сэпеде ды сюдомадо.
15Сынь чиезь чиить верень валомо,
16ды мельгаст весемесь кадови тапазь, яжазь.
17Сынь а маштыть ладязь эрямо.
18Сынь эзть тонадо Паздо пелеме».
19Минь содатано: весе се, мезде корты Коесь, ёвтазь сетненень, кить эрить-аштить сонзэ ало. Сестэ киньгак а панжови кургозо каямс вал эсензэ кисэ, ды весе масторлангонь ломантне чумот Пазонть икеле!20Эдь вейкеяк ломань Коень топавтоманть вельде а ловови Пазонть икеле чумовтомокс. Коенть вельде ломантне ансяк кармить содамо-чарькодеме эсест пежетест.

Пазось лови ломаненть чумовтомокс кемеманть кисэ

21Вана ней Пазось панжизе ломантненень чумовтомокс ловоманть, кона максови аволь Коенть вельде. Тень эйстэ уш яволявтнесть пазмарицятнеяк, Коеськак.22Те чумовтомочись казеви ломантненень Иисус Христоснэнь кемемаст кисэ. Сон сы весе лангс ды весенень, кить кемить Тензэ, киньгак апак яво.23Эдь весе совасть пежетьс ды арась эйсэст Пазонь иневалдонть сияждома.24Ды ялатеке, Пазонь чанстенть коряс, весенень максови казнекс чумовтомочи Христос Иисус вельде, кона сынст идинзе-раминзе олячис.25Сонзэ аравтызе Пазось улемс ладямонь аноксокс: Сонзэ верьсэ ванськавтовить весе, конат кемить Тензэ. Истя Пазось невти Эсь видечинзэ. Сон эзь пандо чумо икелень теевть пежетнень кисэ,26Эсь куватень кирдеманзо коряс. А вана неень шкасто Сон невти Эсь видечинзэ: Сон Сонсь виде ды лови видекс-чумовтомокс эрьванть, кие кеми Иисуснэнь.

27Ули-арась минек ней каштангалемань тувталонок? Арась, весе тувталтнэ ёмавтозь. Кодамо жо коесь тень теизе? Коесь, кона веши тевть? – Аволь. Тень теизе кемемань коесь.28Секскак минь кемекстатано: ломанентень максови Пазонть икеле чумовтомочи ансяк кемеманть вельде, допрок аволь Коень топавтоманть вельде.29Ды арази Пазось ансяк евреень Паз? Арази Сон лия раськетнень туртов аволь Паз? Нама, Сон – лия раськетненьгак Паз,30секс мекс Пазось – вейке. Сон лови Эсензэ икеле чумовтомокс кемемаст коряс керявтозтненьгак ды истя жо кемемаст вельде апак керявтозтненьгак.31Лисни: минь кемеманть эйсэ ёмавттано-полавттано Коенть? – Кодаяк арась. Мекевланк, минь Коенть кемекстатано.

Авраамонь кемемазо


*а 3:25 анокс – жертва


предыдущая глава Глава 3 следующая глава