Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 12

Петрань пекстамозо ды идемазо

1Малав секе шкастонть Ирод инязорось кармавтсь пансемс кемицятнень ды кой-конатнень юткстост кундсемс.2Сон маштовтызе торосо Яковонь, Иоаннонь лелянзо.3Зярдо Ирод неизе, Яковонь куловтомась тусь еврейтнень мельс, сон кундавтызе Петраньгак. Те тевесь ульнесь Ламбамсто сюкоронь покшчистэнть.4Петрань кундызь ды ёртызь пекстамо кудос. Ванстыцякс аравтсть ушманонь ниле курот, эрьва куросонть ниле ушмант. Ирод арсесь ливтемс Петрань раськенть икелев судямс евреень Инечиде мейле.5Зярдо Петра пекстамо кудосоль, кемицянь курось псистэ ознось кисэнзэ Пазонтень.

6Раськень судямос ливтемадонзо икеле вестэнть Петра удыль кавто ушман ютксо, кшнинь тертьсэ сюлмсезь. Пекстамо кудонть кенкш лангсояк аштесть ванстыцят.7Апак учо сась Азоронть ангелэзэ, ды пекстамо кудось пештявсь валдосо. Ангелэсь тулкадизе Петрань бокас ды пувтызе. «Стяк седе курок!» – мерсь сон, ды кшнинь тертне сеск прасть Петрань кедтнестэ.8«Карксык панарот ды карсек», – таго мерсь ангелэсь. Петра истя тейськак. Седе тов кортась ангелэсь: «Оршик ланга оршамот ды мольть мельган».9Петра лиссь ангелэнть мельга пекстамо кудостонть. Весе, мезе ангелэсь тейсь, ульнесь алкуксокс, ансяк Петра теде эзь чарькоде. Секскак арсесь, сон неи неявкс эли он.10Сынь ютасть ванстыцянь васенце куронть вакска, ютызь омбоценть, пачкодсть кшнинь ортантень, кона ветясь ошов. Ортась сонсь панжовсь икелест. Сынь лиссть, мольсть вейке ульцява, ды апак учо ангелэсь ёматотсь.11Зярдо Петра чарькодизе мартонзо теевезенть, сон мерсь: «Ней мон алкукс чарькодия, мезе мартон лиссь! Азорось кучизе Эсь ангелэнзэ ды идимим Иродонь кедьстэ ды весемеденть, мезе учость еврейтне!»

12Тень чарькодезь, Петра мольсь Мариянь кудос, Иоаннонь аванстэнь. Те Иоаннонтень лиякс мерильть Марк. Тов пурнавсть озномо ламо ломанть.13Петра вачкодсь ортас. Панжомо лиссь Рода важавась.14Сон Петрань содызе вайгелень коряс ды чиезь тусь мекев, кенярдомадонть ортантькак стувтызе панжомс. «Петра ортанть икеле!» – кудос совамсто серьгедсь Рода.15«Паряк, превстэ лисить?» – мерсть кудосотне. Ансяк Рода таго кортась: «Петра ортанть икеле». «Те сонзэ ангелэзэ», – кортасть кудосотне.16Петра те шкане яла вачкоесь ортас. Зярдо сынь, окойники, панжизь ортанть ды неизь Петрань, весе пек дивазевсть.17Сон кедьсэ невтезь тердинзе чатьмонеме ды ёвтнизе, кода Азорось сонзэ ливтизе пекстамо кудостонть. «Ёвтадо теде Яковнень ды лия кемиця ялгатненень», – мерсь тенст Петра ды тусь лия таркав.

18Валске марто ушмантнэнь ютксо кепететсь покш талакалема – кияк эзь сода, мезе лиссь Петра марто.19Ирод инязорось кармавтсь парстине сонзэ вешнемс, ансяк вешнематне мезеяк эзть максо. Сестэ сон кевкстневтинзе ушмантнэнь ды мерсь маштомост. Мейле Ирод тусь Иудеясто Кесарияв ды эрясь тосо зярыя шка.

Иродонь куломазо

20Ирод пек кежейгадсь Тирэнь ды Сидононь эрицятнень лангс. Тонат ве мельсэ састь мартонзо вастовомо. Сынь таргизь эсест пелев Бластонь, инязоронть малавикс важонзо, ды вешевтсть Иродонь кедьстэ сэтьмелув, эдь Тирэсь ды Сидонось пряст андыльть Иродонь масторонть кши-салсо.21Путозь чистэнть Ирод оршизе инязоронь оршамопелензэ, озась инязоронь тарказонзо ды ушодызе кортамонзо пурнавозтнень икеле.22Ломантне прянь вечкевтезь кармасть сеереме: «Те корты Пазось, – аволь ломань!»23Ансяк Ирод эзинзе лоткавто сеерицятнень ды эзь ёвта шнамо вал Пазонтень, ды сеске Азоронть ангелэзэ вачкодизе сонзэ, ды Ирод, сукссо сэвезь, кулось.

24Пазонь валось яла кассь ды сравтовсь.25Варнава ды Савла кандызь ярмактнень, конат максозельть тенст, ды мурдасть Ерусалимстэ Антиокияв Иоанн марто, конанень лиякс мерильть Марк.


предыдущая глава Глава 12 следующая глава