Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 22

Эрямо ведень лей

1Мейле ангелэсь невтизе монень эрямо ведень ванькс леенть, кона цивтёрдсь прок пачкнеиця крусталь ды чудсь Пазонть ды Вирезэнть инязоронь озамо тарканть алдо.2Ошульцянть куншкава, ды леенть кавто чирева кассь эрямо чувтось. Сон максы умарть кемгавтовоксть иезэнзэ, эрьва ковсто, ды сонзэ лопатнеде шумбралгавтовить весе масторлангонь раськетне.3Кодамояк сюдозь тев тесэ уш а ули. Те ошсонть карми аштеме Пазонть ды Вирезэнть инязоронь озамо таркась, ды весе Пазонь важотне кармить важодеме Тензэ.4Сынь несызь Пазонть чаманзо, ды Пазонь лемесь карми улеме сёрмадозь сынст коняваст.5Тосо а карми улеме ве, ды сыненст а карми эрявомо лампань валдояк, чивалдояк, эдь сыненст валдокс карми улеме Азоро Пазось. Ды сынь кармить улеме инязорокс пингеде пингес.

Иисус Азорось курок сы

6Ней ангелэсь мерсь монень: «Неть весе валтнэ видеть ды кемевикст. Ды Азоро Пазось, кона максы Эсензэ Оймеялтонзо пазмарицятненень, кучизе ангелэнзэ невтемс Эсензэ важотненень сень, мезесь куроксто топавтови».7«Кунсолодо, Мон курок сан!» – корты Иисус. «Уцяскав се, кие эри те книгань валтнэнь коряс, конат ёвтнить неень шкадонть ды сыця шкадонть».

8Мон, Иоанн, весементь тень мария ды неия. Тень марямодо ды неемадо мейле мон пульзинь ангелэнть пильгс, кона невтизе монень весементь, ды сюкониксэлинь тензэ.9Ансяк ангелэсь мерсь монень: «Вант, истя иля тейне! Мон Пазнэнь истямо жо важодицян, кодамат тонгак, ды пазмарицятнеяк, тонь кемиця ялгатне, ды весе лиятнеяк, конат эрить те книгань валтнэнь коряс. Пазонтень сюконяк!»10Ды сон таго корты монень: «Илить сёпо те книганть валонзо, конат ёвтнить неень шкадонть ды сыця шкадонть. Эдь сынст топавтома шкаст эль сы!11Те шканть самс берянь ломанесь седе товгак тейнезэ зыян, нулгодьксэсь тейнезэ седеяк нулгодькс тевть; паро ломанесь седе товгак тейнезэ паро тевть, ды се, кона иневанькс, седеяк теевезэ иневаньксэкс».

12«Мон курок сан! –, корты Иисус, – ды весе берянень ды паронь пандомась карми улеме Монь марто. Самсто эрьвантень Мон пандса тевензэ коряс.13Мон – Альфа ды Омега, Васенцесь ды Меельцесь, Ушодксось ды Прядовксось».

14Уцяскавт сетне, кить топавтыть Сонзэ кармавтовкстнэнь! Сыненст мереви совсемс ортатнева ошонтень ды ярсамс эрямо чувтонть умардензэ.15Ош ушос кадовить кискатне, муницятне-орожиицятне, ускурицятне, ломанень маштницятне, аволь алкуксонь пазнэнь сюконицятне ды весе сетне, кить вечкить кенгелемат ды сынсь кенгелить.

16«Мон, Иисус, кучия кемикуротнева Эсень ангелэм яволявтомс тынк туртов те видечинть. Мон – Давид инязоронь буень поладыксэзэ, Давидэнь юрсто-корёнсто Лисевкс ды валдо теште, валскень зоря теште».17Пазонь Оймеялтось ды одирьваськак кортыть Иисуснэнь: «Сак!» Ды сеяк, кие мари, мерезэ: «Сак!» Ды кинь сась симемазо, сазо! Ды кинь ули мелезэ, саезэ эрямо веденть стякодо!

Меельце валт

18Мон, Иоанн, кеместэ кармавтан эрьвантень, кие мари те книганть валонзо, конат ёвтнить неень шкадонть ды сыця шкадонть: бути кияк путы эсензэ валт неть валтнэс, сенень Пазось путы неть зыянтнэнь, конатнеде сёрмадозь те книгасонть.19Ды бути кияк ёрты кодаткак валт те книгастонть, кона ёвтни неень шкадонть ды сыця шкадонть, се ломаненть Пазось ёртсы эрямо книгастонть, а совавтсы Эсензэ иневанькс ошонтень ды мезеяк а максы тензэ сень эйстэ, мезде сёрмадозь те книгасонть.

20Се, кие ёвты-яволявты весе теде, корты: «Содадо, Мон курок сан!» Аминь, улезэ истя! Сак, Иисус Азоро!

21Минек Иисус Христос Азоронть чанстесь улезэ весеменк тынк марто! Аминь.


предыдущая глава Глава 22 следующая глава