Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 9

Израиль ды Пазонь алтамотне

1Мезе мон ней ёвтан – те видечи. Мон Христосонь ломанян ды секс а кенгелян. Тень кемексты монь оймеёжось, конань вети Иневанькс Оймеялтось.2Пек покш монь ризксэм, ды седейсэнь палы алотксиця сэредькс3монь раськень ялгатнень-оятнень кисэ, конат монень малавикст верень коряс. Мон маласан се мелентень: сынст кисэ седе паро монень эстень улемс сюдозь ды явозь Христос эйстэ.4Сынь жо израилень ломанть: те сынст теинзе Пазось Эсензэ эйкакшокс, сыненст невтизе Эсь инексчинзэяк. Сынст марто Сон сюлмась вейсэньлувт, макссь тенст Кой, истя жо Пазнэнь видестэ ознома-сюконямо ды ламо алтамоткак.5Сынст ульнесть кезэрень пингень ине тетятнеяк, те раськенть ютксо ломанекс чачсь Христоскак. Сон весемеде ине, пингеде пингес шназь-чанстязь Паз! Аминь.

6Тень коряс а лисни, буто Пазось эзизе топавто Эсь алтамонзо. Эдь аволь весе, кить Израильстэ, алкукс Пазонь кочкавт ломанть.7Ды аволь весе Авраам эйстэ чачицятне-касыцятне – Сонзэ алкуксонь эйкакшонзо. Эдь Пазось мерсь Авраамнень: «Тонь раськесь туи-рашты ансяк Исаконь пельде».8Лиякс, Авраамонь пельде аволь весе чачозь эйкакштнэ лововить Пазонь эйкакшокс, ансяк сетне, конатнень чачомаст ульнесь алтазь Пазонть пельде.9Авраамнень те алтамось ульнесь вана кодамо: «Мон таго сан тонеть теке шкастонть иень ютазь, ды Саррань карми улеме цёразо».10Истя ульнесь аволь весть. Ревеккань* кавтаськеть цёратнень ульнесь секе тетяст, минек покштясь Исак.11-12Зярдо эйкакштнэ эзть чачокшнояк ды эзть кенере тееме парояк, беряньгак, уш сестэ Пазось Ревекканень ёвтась: «Покшось карми улеме вишкинентень важокс». Теньсэ Пазось невтизе: Сон кочкась Эсь мельсэнзэ, ансяк тердеманзо коряс, аволь ломаненть тевензэ коряс.13Сёрмадовкссонть истя ёвтазьгак:
«Яковонь мон кочкия – Исав Монень а эряви».
14Мезе эно ёвтамс тень коряс? Нать Пазось теи авидестэ? Кодаяк аволь!15Моисейнень Пазось мерсь:
«Кинень ули мелем путомс седеймарямо,
сенень путангак.
Кинь ули мелем жалямс, сень жалясаяк».
16Лисни, весе те тееви Пазонь седеймарямонть коряс, аволь ломанень мелень эли виень коряс.17Сёрмадовкссо Пазось корты фараононтень*: «Мон тонь теитинь инязорокс вана мекс: невтемс тонь лангсо Монь виенть, ды весе масторланганть теемс содавиксэкс Монь лементь».18Лиякс меремс, Пазось Эсь мелензэ коряс вейке ломанентень путы седеймарямо, лиянть Эсь мелензэ коряс тейсы калгодо седеекс.

Пазонь кежесь ды седеймарямось

19Кияк тынк эйстэ, паряк, ней монь кевкстьсамам: «Сестэ мекс эно Пазось чумонды ломантнень? Арази киньгак саты виезэ молемс Сонзэ меленть каршо?»20А вана кият тон истямось, пайстомо ломань, кона пельксты-спори Пазонть марто? Арази чакшось мери чакшонь теицянтень: «Мекс тон монь истямокс теимик?»21Мезе, арази чакшонь теицянть арась олязо теке сёвоньстэнть теемс питней кедьге ды истяконь кедьгеяк?22Истя тейсь Пазоськак: Сон бажась невтемс Эсь кежензэ ды виевчинзэ. Ялатеке Сон кувать кирдсь неть “кедьгетнень”, конатне Сонзэ кеждясть ды конатнень эрявсь ансяк тапамс.23Теде башка Сон путсь мель невтемс Эсь покштояк покш инексчинзэ неть “кедьгетнень” лангсо, конатнень Сон Эсь седеймарямонзо кувалт умок уш анокстынзе инексчинтень.24Седеймарямонь кедьгетне – те минь. Те минек тердимизь Пазось – ды аволь ансяк еврейтнень, истя жо лия раськенсетненьгак.25Тень эйстэ Сон корты Осия пазмарицянть вельде:
«Раськенть, кона икеле ульнесь аволь Монсень,
ней ловса Монсень раськекс,
авечкевиксэнть – вечкевиксэкс.
26Ды секе таркасонть, косо Пазось мерсь тенст:
“Тынь аволь Монсетне”, –
ней сынст ловсызь эриця Пазонь эйкакшокс».
27А вана Израиленть коряс Исайя ранги:
«Куш Израилень ломантнеде улевельтькак вельть ламо, кода иневедень чувар,
ялатеке идезь улить аламот, ансяк кадовикстнэ».
28Эдь Азорось тевенть тейсы педе пес ды курок топавтсы видечинь коряс.
Апак кавтолдо Сон сонзэ прядсы мирэнть-масторонть лангсо.
29Сестэ тееви истя, кода икелев ёвтызе Исайя:
«Бути Весеменькирди Азорось аволь кадо миненек
буень-раськень зярыя поладыцят,
сестэ минек марто улевель секе жо,
мезе теевсь Содомонь ды Гоморрань эрицятнень марто».

Израиль ды Кенярксов кулясь

30Мезе эно ёвтамс тень коряс? Лия раськетне, конат эзть вешне Пазонть икеле чумовтомочи, ловозь чумовтомокс, ансяк те чумовтомокс ловомась – кемеманть кисэ.31Секе шкастонть Израилень раськесь вешнесь кой, конань вельде Пазонть икеле лисемс чумовтомокс, ды те коенть эзизе муе.32Мекс? Сень кувалма, мекс сынь арсесть нежедемс коень тевтнень лангс, аволь кемеманть лангс. Истя те раськесь пупордявсь “пупордявома кевс”,33конадо Пазось ёвтась Сёрмадовкссо:
«Кунсолодоя: Мон путан Сионс Кев, конань эйс пупордявить,
Кевпандо, конань эйс эшкевить.
Ансяк кияк Сонензэ кемицятнеде а ули совавтозь визьксчамас».


предыдущая глава Глава 9 следующая глава