Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 9

Коринф ошсо лезксэкс ярмаконь пурнамо

1Ерусалимсэ Пазонь ломантненень лездамодонть монень сёрмадомскак тыненк а эряви.2Мон содаса тынк анокчинк те пурнамонтень ды мон тынк шныдизь Македониянь кемицятнень икеле ды ёвтынь тенст: «Акайя ёнксонь кемицятне уш мелят анокстызь пряст лезксэнь максомантень». Тынк истямо покш мелень паломась ламотнень сынст юткстояк сыргавтынзе те тевентень.3Ней мон ялатеке кучан тенк неть кемиця ялгатнень сень кисэ: илязо лисе стякокс монь тынк шнамось те тевенть коряс. Кода мон уш сыненст кортакшнынь, ней тыненк эряви улемс анококс эсь лезксэнть марто.4Бути мейле монь марто сыть тыненк македониянсетне, ды тынь – аволь анокт, сестэ уш ули тенек визьксчама истямо покш кемемачисэ прянь шнамонть кисэ! Тынк визькстэнть мон уш а кортангак!5Секскак мон ловия эрявиксэкс эстеденек икеле кучомс тенк неть кемиця ялгатнень, конатне икелевгак анокстасызь казненть, конань тынь алтынк. Сестэ сон алкукс ули максозь паро мельсэ, аволь минек ёндо кармавтомань коряс.

6Кирдеде мельсэнк: кие видьмень ванстозь види, се аламо пурныяк, а вана кие сюпавсто-важовсто види, сюпавсто пурныяк.7Кадык эрьвась эйстэнк максы зяро, зняро мери седеезэ, апак нусмакале ды апак кармавто, эдь Пазось вечки кеняркс марто максыця.8Ды Пазонть ули виезэ тыненк каземс ланга чудицякс эрьва кодамо чансть. Сестэ тынк свал ды эрьва мейсэ карми улеме весе эрявиксэнк, кода эсенк туртов, истя жо ланга чудицякс саты виенк эрьва паро тевскак.9Кода ёвтазь Сёрмадовкссо:
«Сон сюпавсто явши кажовтненень,
ды сонзэ паро тевтне а стувтовить пингеде пингес».

10Пазось, кона максы видьметь видицянень ды анды кшисэ ломантнень, тыненккак максы видьметь, кастсынзе сынст ды ламолгавтсы паро тевень тееманк.11Истя, тынь весемесэ карматадо улеме сюпалгавтозь, ды сестэ тынк свал карми улеме весеменк, мейсэ сюпавсто-важовсто лездамс лиятненень. Секс ламот кармить ёвтамо сюкпря Пазонтень тынк казнетнень кисэ, конатне максовить минек вельде.12Эдь лезксэсь, конань тынь макстадо, аволь ансяк шождалгавтсы Пазонь ломантнень арасьчист, истя жо сонзэ кисэ Пазонтень валозь валови сюкпрянь чудикерькс.13Те важодемасонть тынь тевс нолдтнетядо эсенк кемеманк ды невттядо, кода тынь максынк прянк Христосто Кенярксов кулянтень. Сестэ тынк казненть саицятне шнасызь Пазонть тень кисэ ды сень кисэяк, кода сюпавсто тынь явтадо эсь парочистэнк сыненсткак ды весе лиятнененьгак.14Тенде башка сынь кармить озномо тынк кисэ ды бажамо весе седейсэст неемс тынк, секс мекс Пазось казидизь тынк Эсензэ аонкставикс чанстьсэ.15Сюкпря Пазонтень валсо аёвтавикс Сонзэ казненть кисэ!


предыдущая глава Глава 9 следующая глава