Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 11

Павол ды кенгелиця апостолтнэ

1Вай, кирдевлинккак тынь монь кором, куш натой мон аламодо чаулан! Энялдан тенк, кирдинк эно!2Эдь мон мелявтозь ванстан эйсэнк Пазонь покш мелявкс марто. Мон тынк ладидизь максомс вейке Мирденень – Христоснэнь, конанень монь мелем ванстомс тынк кода ванькс, чумос апак совавто тейтерь.3Мон ялатеке пелян: тынккак превенк-арсеманк салавить-колавить Христоснэнь седейшкавань вечкеманть эйстэ – истя, кода гуесь эсь ёжовчисэнзэ манизе Евань.4Эдь тынь парсте кирдтядо сетнень корост, кить сыть ды ёвтнить тенк аволь се Иисустонть, конадо минь тыненк ёвтнинек. Сынь максыть тенк допрок аволь се Оймеялтонть, кона уш тынк эйсэ, ды допрок аволь се Кенярксов кулянть, конань минь тыненк пачтинек!5Мон, ялатеке, а лован эсь прям мейсэяк седе берянекс неть “покш апостолтнэнь” коряс.6Паряк, монь аволь сырнень келем, ансяк монь содамочинь домкат. Эряви ёвтамс, весемесэ тынь минек парсте содасамизь.

7Мон эзинь веше кедьстэнк питнень пандома, зярдо пачтинь тенк Пазонь пельде Кенярксов кулянть. Тынк кепедеманк кисэ мон алкиньгавтыя эсь прям. Арази мон теньсэ теинь пежеть?8Эряви меремс, мон салынь лия кемикуротнень: тыненк важодемань-лездамонь кисэ мон саинь ярмакт сынст пельде. Зярдо мон ульнинь тынк кедьсэ, мон араселинь киненьгак стака канстокс, куш арасьчимгак ульнесь.9Весе эрявиксэнть монень макссть кемиця ялгатне, конат састь Македониясто. Мон зярдояк араселинь ды икелепелевгак а улян тыненк стака канстокс!10Ды теньсэ мон каштангалян! Божан-пежетькстан Христосонь видечисэнть, конась эри монь седейсэ: весе Акайянть келес мон киненьгак а лоткавтован те прянь шнамодонть!11Мекс эно монь арась мелем улемс тенк канстокс? Паряк, мон тынк а вечктядызь? Мекевланк, Пазось соды, кода мон тынк пек вечктядызь!

Мон седе товгак карман тейнеме истя, кода тейнинь.12Теньсэ мон сайса-нельгса прянь шнамо тувталост сетнень, конат покшкавтнезь кортыть, келя сынь теить Пазонь тевенть истя жо, кода миньгак.13Неть ломантне – кенгели апостолт, манчиця важодицят, конатне ансяк невтить эсь пряст Христосонь апостолокс.14Ды те аволь кодамояк дивсема. Эдь сонсь Сатанаськак невтнекшнесы прянзо валдонь ангелэкс.15Истямо ладсо, тененьгак а мезть дивсемс, зярдо сонзэ важонзояк невтить эсь пряст видечинтень важодицякс. Сынст песь, ялатеке, ули истямо: максозь ули тенст эсь чумост кисэ.

Паволонь майсеманзо

16Таго кортан тенк: илядо лово монь превтемекс-чавокс! Ды бути ловтадояк монь превтемекс, сестэ максодо монень зярскак улемс истямокс ды моненьгак аламонь-аламонь шнамс прям.17Се, мезе мон ней тыненк ёвтан, нама, аволь Азоронть мелензэ коряс. Монь кортан алкукскак теке превстэ лисезь ломань, бути истямо покш кемема марто шнан эсень прям.18Зярс ламот шныть пряст те масторлангонь ломантнень ладсо, сестэ монгак шнаса прям.19Тынь тынсь ловтадо прянк пек превеекс, секскак паро мельсэ кирдтядо превтеметнень корост!20Тынь кирдтядо сетнень корост, кие саи эйсэнк урекс кедензэ алов, тарги-нельги пельденк, покорды эйсэнк, покшкавтни прянзо тынк икеле, ды кие кавани эйсэнк чама ланга.21Эсень визьксчис ёвтан: минек эзь сато виенек истя тейнемс тынк марто!

Ней мон тень кортан превстэ лисезь ладсо: сень эйсэ, мейсэ лиятнень ули смелчист шнамс пряст, моньгак ули смелчим шнамс прям.22Сынь еврейть? Монгак! Сынь Израилень ломанть? Монгак! Сынь Авраамонь раськень поладыцят? Монгак!23Сынь Христоснэнь важодицят? Паряк, мон уш допрок превстэ лисинь ды ялатеке ёвтан: мон сындест пек Сонензэ важодян! Мон сындест пек ламо вий путынь Сонензэ важодемантень, сындест ламоксть ульнинь пекстамо кудосо, сындест ламоксть чавозян, сындест сеедьстэ ульнинь кулома лангсо.24Еврейтне ветексть керимизь локшонь колоньгемень вейксэ вачкодькссэ,25рименсетне колмоксть чавимизь палкасо. Весть ульнинь чавозь кевсэ, колмоксть ваякшнынь венчсэ, чи ды ве ютавтынь азаргалиця иневедьсэ.26Эсень ламо якамон перть мон ульнинь пелемачисэ лейс ваямодо, салыцядо-нельгицядо, пелемачисэ эсь раськенсетнеде ды лия раськенсетнедеяк. Ульнинь пелемачисэ ошсо, ломантеме таркасо ды иневедьсэ. Истя жо пелемачисэ ульнинь кемицякс прянь невтицятнеде.27Мон кирдинь стакасто важодема ды сизема, апак удо ламо веть, вачочи ды симемань само. Сеедьстэ ютавтынь чить апак ярса, якшамосо ды штапочисэ.28Весе тенде башка, монень эрьва чистэ сакшность ломанть, ды савсь тень мелявтомс весе кемикуротнеде.29Бути кие лавшо, сестэ монгак мартонзо лавшан. Мон пиян-палан эрьванть кисэ, кинь совавтсызь пежетьс.

30Бути монень сави шнамс прям, сестэ мон прям шнаса эсь лавшочисэнь.31Улезэ шназь-чанстязь пингеде пингес минек Иисус Христос Азоронть Тетязо ды Пазозо! Сон соды: мон тесэ а кенгелян.32Зярдо мон ульнинь Дамаск ошсо, сестэ Арета инязоронть тевень ветицязо кундыксэлимим монь ды кармавтокшнось ванстомс ошонь ортатнень. А монь вальминева нолдымизь кептересэ ошонь пирявксонть кувалт, ды истя мон оргодевинь сонзэ кедь алдо.


предыдущая глава Глава 11 следующая глава