Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЕТРАНЬ ОМБОЦЕ СЁРМАЗО

Глава 1

1Симон-Петра, Иисус Христосонь важось ды апостолось, кучи шумбракстнемат сетненень, конатненень, кода миненеккак, максозь питнейде питней кемемась – минек Пазонть ды Идицянть Иисус Христосонь весенень паро мелензэ коряс.2Кадык яла ламолгадыть тынк чанстесь ды седейоймамось Пазонть ды минек Иисус Азоронть содамост-чарькодемаст вельде.

Пазонь тердевтне ды кочкавтнэ

3Иисус эйсэ Пазонь виесь казизе миненек весе сень, мезе эряви Пазонть мелензэ коряс эрямонтень. Эдь минь чарькодинек Сонзэ, кие минек тердимизь Эсь инексчисэнзэ ды вадрячисэнзэ.4Истя Сон казсь миненек ине ды питнейдеяк питней алтамот. Сынст вельде тынь олякстомтсынк прянк се прамонть-ёмамонть эйстэ ды апаро мельтнень эйстэ, конат азорксчисэ масторлангсонть, ды вейсэндявтадо Пазонь обуцянтень.

5Секскак весе вийсэнк бажадо невтемс эсенк кемемасонк паронь теема, паронь теемасонть жо невтеде содамочи.6Содамочисэнть невтеде парсте прянь кирдема, прянь кирдемасонть – цидярдома, цидярдомасонть – Пазонтень максозь эрямо.7Пазонтень максозь эрямосонть невтеде кемиця ялгатненень вечкема, кемиця ялгань вечкемасонть – седейшкавань вечкема.8Бути те весе тынк эйсэ ули ды ламолгали, сестэ тынь аволь стяко содасынк минек Иисус Христос Азоронть, ды эрямонк а ули лезэвтемекс.9Кинь эйсэ весе те арась, се сокор, васов а неиця. Сон стувтызе: зярдо-бути ванськавтозель икелень пежетензэ эйстэ.10Секс, кемиця ялган, яла седе пек бажадо теемс кемекс Пазонь пельде тердеманк ды кочкамонк. Бути тынь карматадо тееме истя, сестэ зярдояк а пупордятадо.11Истя тынк туртов келейстэ панжови совамо кенкшесь минек Азоронть ды Иисус Христос Идицянть пингеде пингень Инязорксчинтень.

Петра сыргозти паро мельть

12Тень кисэ монь мелем зярдояк а лоткамс ледстнемеде мелезэнк неть тевтнень, куш тынь содасынккак сынст ды кеместэ аштетядо те виде тонавтомасонть, кона тыненк пачтязь.13Мон лован видекс-эрявиксэкс сыргозтнемс тынк истямо мельс ледстнематнесэ, зярс эрян масторлангсо эсень рунгонь кудынесэнть.14Содан: курок сави кадомс эсень те кудыненть, кода теде монень ёвтась минек Иисус Христос Азорось.15Секс мон бажан тееме весементь, мезе монь вийсэ: кадык тынь монь туемадо мейлеяк кирдьсынк весе тень мельсэнк.

Христосонь инексчинзэ неицятне

16Эдь минь эзинек моле ёжовсто поназь-кодазь ёвкстнэнь мельга, зярдо пачтинек тенк куля минек Иисус Христос Азоронть вийдензэ ды самодонзо. Мекевланк, минь эсь сельмсэнек неинек Сонзэ инексчинзэ.17Эдь шнамось ды инексчись Сонензэ максозельть Тетя Пазонть пельде, зярдо сехте покш Инексчинть пельде каятотсь Тензэ вайгелесь: «Те Монь вечкевикс Цёрам, Сон Монь седейкенярксом».18Те вайгеленть, кона каятотсь менельстэ, минь минсь маринек, зярдо ульнинек мартонзо Пазонь пандонть лангсо.

19Те весе теи минек туртов седеяк кемевиксэкс пазмарицятнень ёвтавт кулянть. Ды тынь видестэ тейтядо, зярдо кирдтядо те кулянть кода валдо, кона сияжды чоподасо, зярс а сы те валдо Чись ды Валскень зоря тештесь а карми сияждомо тынк седейсэ.20Васняяк, мельсэнк кирдеде сень: пазмарицянь вейкеяк вал Пазонь пельде Сёрмадовкссонть а панжови ломанентень эсь превсэнзэ.21Эдь зярдояк пазмарицянь валтнэ эзть ульне ёвтазь ломанень мелень коряс. Сынст ёвтнесть Пазонь иневанькс ломанть, конатнень ветясь Иневанькс Оймеялтось.


предыдущая глава Глава 1 следующая глава