Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 10

Иисус кучи сизьгемень тонавтницят

1Теде мейле Азорось кочкась сизьгемень лия тонавтницят ды кучинзе сынст кавтонь-кавтонь Эсензэ эйстэ седе икеле эрьва кодамо ошка ды велева, ков Сонсь пурнась молеме.2Сон мерсь сыненст: «Сюрось чачсь ламо, ансяк нуицятнеде аламо. Секскак энялдодо нуемань Азоронть икеле, кучозо Эсензэ паксяв седе ламо важодицят.3Азёдо! Ванодо: Мон кучан эйсэнк, кода вирезтнэнь верьгиз юткс.4Илядо сае ки лангов мезеяк: ярмакткак, кансткак, омбонст карсемапельтькак, ды киява молемстэ илядо лотксе ки мартояк шумбракстнеме.5Зярдо соватадо киньгак кудос, васняяк шумбракстнемстэ арседе эрицятненень сэтьмелув.6Бути те кудосонть эри ломань, кона анок эрямс сэтьмелувсо, сестэ тынк сэтьмелувось кадови сонзэ марто. Бути эри тосо аволь истямо ломань, сестэ тынк сэтьмелувось велявты мекев эстенк.7Эрядо те кудосонть, ярсадо ды симеде весемеде, мезде тынк тосо иляст каваня. Эдь важодицянтень пандыть важодеманзо кисэ. Кудосто кудос илядо яксе.8Зярдо тынь соватадо ошс ды тынк тосо васттадызь, ярсадо теде, мезде эйсэнк каванить.9Шумбралгавтодо сэредицятнень, конат тосо улить, ды ёвтнеде весенень: “Пазонь Инязорксчись сась тынк малав”.10Бути соватадо кодамояк ошов ды тынк тосо а васттадызь, лиседе сонзэ кужотнес ды ютамсто кортадо:11“Минь сорновтсынек пильгестэнек тынк ошонь пулентькак, кадовозо сон эсенк марто! Ялатеке содадо: Пазонь Инязорксчись сась тынк малав”.12Мерян тенк: Пазонь судонь чистэнть натой Содомонь эрицятненень ули седе шождыне се ошонь эрицятнень коряс».


Зыян а янксиця Галилеянь оштнэнень

13«Зыян теть, Хоразин ош! Зыян теть, Бетсаида ош! Бути тамашатнень, конатне тыненк невтезельть, неевлизь Тир ды Сидон оштнэнь эрицятне, сынь пежеттест янксемань невтемакс умок оршавольть ризнэмань оршамот ды аштевельть озадо кулов лангсо.14Секскак тынденк шождыне карми улеме судямонь чистэнть Тирэнь ды Сидононь эрицятненень.15Ды тонгак, Капернаум ош, менель видьс кепедевезь, тоначинь потмакстомо отьмас ёртозь улят!

16Се, кие кунсолы тынк, кунсолы Моньгак ды кие тынк каршо моли, се моли Монь каршояк. Содадо! Кие Монь каршо моли, се моли Монь Кучицянть каршояк».


Сизьгемень тонавтницятнень мекев самось

17Сизьгемень тонавтницятне мекев састь Иисуснэнь, кенярдозь кортасть: «Азоро! Мик идемевстнеяк теить минек мереманть коряс, зярдо минь кармавттано сынст Тонь лементь кундазь».18Иисус каршост кортась: «Мон неия, кода Сатанась ёндолкс прась менель лангсто.19Истя, Мон максынь тыненк вий пильгесэ тапамс гуйтнень, скорпионтнэнь ды максынь азорксчи Душманонь весе виенть лангсо. Секскак кодамояк зыян тыненк а ули тень кисэ.20Ансяк аволь сенень кенярдодо, мекс аванькс оймеялтнэ тынк кунсолыть. Кенярдодо вана тенень: тынк леменк сёрмадозь менель лангсо!»


Иисусонь кенярксозо

21Те шкастонть Иисус кенярдозевсь оймеялтсо ды мерсь: «Ёвтан Теть сюкпря, Тетяй, менелень ды масторонь Азоро! Сюкпря Теть сень кисэ, мекс Тон сёпить нень превейтнеде ды ёроковтнеде ды панжить сетненень, конат прок вишка эйкакшт. Алкукс, Тетяй, истямо ульнесь Тонь паро мелесь!»22Иисус велявтсь тонавтницянзо ёнов ды ёвтась: «Тетям максызе весементь Монь кедь алов, ды ансяк Сон ськамонзо алкукс содасы Эсь Цёранзо. Тетянтькак содасы ансяк Цёрась ды сеть, конатненень Цёранть мелезэ панжомс Сонзэ».23Мейле Иисус велявтсь Эсензэ тонавтницятнень ёнов ды пшкадсь ансяк сыненст: «Уцяскавт сельметне, конат неить сень, мезе нетядо тынь!24Эдь кортан тыненк: ламо пазмарицянь ды инязоронь ульнесь мелест неемс сень, мезе тынь нетядо, ансяк эзизь нее ды марямс сень, мезе тынь марятадо, ансяк эзизь маря».


Самариянь чевте седей ломанде валвелявкс

25Вейкесь Койс тонавтыцятнестэ лиссь икелев, снартневтиксэлизе-варчавтниксэлизе Иисусонь ды секскак кевкстизе: «Тонавтыця, мезе монень теемс пингеде пингень эрямос совамга?»26Иисус каршонзо мерсь: «Койсэнть мезе сёрмадозь? Мезе тон тосто ловнат?»27Тонась каршонзо мерсь: «Вечкть Азоронть, эсь Пазот, весе седейсэть, весе оймесэть, весе вийсэть, весе превсэть-содавкссот. Вечкть малавиксэть, кода эсь прят».28Иисус мерсь тензэ: «Видестэ тон кортыть. Тейть истя ды соват эрямос».29Ялатеке Койс тонавтыцясь невтиксэлизе эсь прянзо виде оймекс ды кевкстизе Иисусонь: «Кие эно монь малавиксэм?»30Тень каршо Иисус ёвтась тензэ: «Ве ломань ютась Ерусалимстэ Ерихонов. Молемстэ каявсть лангозонзо нельгицят. Сынь нельгизь сонзэ кедьстэ весементь, мик оршамопелензэяк, тапсизь сонзэ ды пельскулозекс кадызь, сынсь жо тусть.31Лиссь истя, те кияванть савсь ютамс вейке попнэнь. Сон неизе пайстомонть ды кинть омбоце ёнга ютась ваксканзо.32Истя тейсь левинсеськак: те таркантень пачкодезь, сон неизе пайстомонть – ды истя жо кинть омбоце ёнга ютась ваксканзо.33Савсь ютамс те кияванть Самариянь вейке эрицянтеньгак. Зярдо сон пачкодсь се таркантень ды неизе пиштяканть, нейке ризнэзевсь седеезэ.34Сон мольсь ваксозонзо, аржонзо винасо ды ойсэ ваднинзе, тапаринзе. Мейле озавтызе эсензэ осёлонзо лангс, ускизе инжень кудос ды тосо якась мельганзо.35Омбоце чистэнть, туемстэ, сон таргась кавто динарт, максынзе инжень кудонь азоронтень ды мерсь тензэ: “Якак мельганзо, ды ютавтындерят седе ламо ярмакт, мон мекев самсто макссынь теть”.36Кие неть колмотнестэ ульнесь, тонь койсэ, алкуксонь малавиксэкс пиштякантень, кона понгонесь нельгицятненень?»37Койс тонавтыцясь мерсь каршонзо: «Се, конась путсь тензэ седеймарямо». Сестэ Иисус мерсь тензэ: «Азё, ды тонгак истя тейнек».


Марта ды Мария

38Седе тов ютамсто Иисус тонавтницянзо марто пачкодсть вейке велес. Тосо тердизе Сонзэ инжекс эсензэ кудос ава, конань лемезэ Марта.39Сонзэ ульнесь сазорозо, Мария. Мария озась Иисусонь пильге пес ды кунсолось сень, мезде Сон кортась.40Марта капшазь анокстась покш каванямо инжетнень туртов. Сон аламос лоткась Иисусонь ваксс ды кевкстизе Сонзэ: «Азоро, нать, Тонеть ялатеке, мекс монь сазором ськамон кадымим весе тевтнень тееме? Сестэ мерть тензэ, кадык лезды монень».41Иисус мерсь каршонзо: «Марта, Марта! Тон ламодо мелявтат ды майсят.42Эрявиксэсь ансяк вейке. Мария кочкизе эстензэ сех паро таликанть, конась а саеви кедьстэнзэ киненьгак».



предыдущая глава Глава 10 следующая глава