Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 7

Мелькиседек – инязор ды поп

1Мелькиседек ульнесь Салим ошонь инязор ды Верепазонь поп. Сон вастызе Авраамонь, зярдо се велявтыль ниле инязортнэнь изнямодо мейле, ды чанстизе-баславизе сонзэ.2Авраам максызе тензэ тюремстэ весе саезенть кеменце пельксэнть. Васенцекс Мелькиседек ульнесь “видечинь инязор”. Те сонзэ лементь смустезэ. Теде башка сон ульнесь Салимень инязорокс, лиякс, “сэтьмечинь инязорокс”.3Мезеяк апак сёрмадо сонзэ тетядонзо, авадонзо, раськень лувдонзо, кияк а соды сонзэ чачомадонзо, куломадонзо. Сон невтезь Пазонь Цёранть кондямокс: кадови попокс пингеде пингес.

4Арседея, кодамо сон ине! Сонензэ мик Авраам, минек ине покштясь, максызе тюремстэ саезенть сехте паро кеменце пельксэнть.5Левинсетнень, конатненень максови попоксчи, ули кармавтовксост: Моисеень Коень коряс мереви сыненст пурнамс кеменце пелькс израилень ломантнень пельде, лиякс эсест братост пельде, куш сетне истят жо Авраамонь буень поладыцят.6Мелькиседек жо, куш эзь лисеяк Левинь раськестэ, саизе Авраамонь кедьстэ кеменце пельксэнть ды чанстизе-баславизе сонзэ, конанень уш максозельть Пазонь алтамотне.7Нама, весе минь содатано: чанстицясь седе ине чанстявицянть коряс.8Поптнэ пурныть кеменце пельксэнть, куш сынь ансяк кулыця ломанть, а вана Мелькиседек, кона саизе Авраамонь кедьстэ кеменце пельксэнть, эри свал, те кемекстазь Сёрмадовкссо.9Лиякс ёвтамс истя: сонсь Левияк, конань раськень поладыцянзо пурныть кеменце пельксэнть, пандызе кеменце пельксэнть Авраам вельде.10Эдь Леви сестэ эзь чачокшнояк ды ансяк ульнесь ине покштянзо эйсэ, зярдо Мелькиседек вастызе Авраамонь.

11Бути левинсетнень попоксчись ветяволь асатыкстэмечис – эдь Коесь ульнесь максозь израилень ломантненень те попоксчинть вельде – сестэ мекс жо эрявсь лия поп, кона аравтозь Мелькиседек ладсо, аволь Арон ладсо?12Эдь попоксчинь полавтомась веши, нама, коенть полавтомаяк.13Ды минек Азорось, киде тесэ кортави, лиссь лия раськестэ, аволь левинсестэнть, ды кияк Сонзэ раськестэнть алтарь икеле попокс эзь важодекшне.14Весе содыть, минек Азорось лиссь Иудань раськестэ, а вана Моисей мезеяк эзь ёвта те раськенть попоксчидензэ.

Лия, Мелькиседекень кондямо поп

15Весе те тееви седеяк неявиксэкс, зярдо яволявтсы прянзо лия поп, кона Мелькиседекень кондямо.16Сон путозь попокс акулыця-аёмиця эрямонть вийсэ, аволь се коенть кармавтовкстнэнь кувалт, конась максы попоксчинть ломанень раськень коряс.17Вана кода те кемекстазь Сёрмадовкссонть:
«Тон улят попокс пингеде пингес Мелькиседек ладсо».18Истямо ладсо, ташто кармавтовксось полавтови, секс мекс сон лавшоль ды лезэвтемель.19Эдь Моисеень Коентень мезеяк эзь теевкшне асатыкстэмекс. Сонзэ таркас ней миненек максови седе паро седейнежедькс, конань вельде минь малавгадтано Пазонтень.

20Теде башка, те од попоксчись кемекстазель Пазонь пежетькстамосо!21Эдь икелень поптнэ аравтовильть апак пежетькста, а вана Иисус пежетькстамо марто, секс мекс Сонензэ Пазось ёвтась:
«Азорось пежетькстась ды а янксезеви:
“Тон улят попокс пингеде пингес Мелькиседек ладсо”».22Истямо ладсо, пежетькстамось невти, зяродо седе паро се вейсэньлувось, конань кемекстыцякс кармась улеме Иисус.

23Икелень поптнэде ульнесть ламо, секс мекс куломась сезнесь сынст важодеманть ды тарказост сыльть яла лият ды лият.24Иисус жо карми эрямо пингеде пингес, ды Сонзэ попоксчиськак лиянень киненьгак а максови.25Секскак Сонзэ ули виезэ педе пес ды пингеде пингес идемс сетнень, конат сыть Пазонтень Сонзэ вельде. Эдь Сон эри свал ды озны-энялды сынст кисэ.

26Алкукс истямо Попонь прявтось миненек эрявськак: иневанькс, чумовтомо, асатыкстэме, пежетевтнень эйстэ явозь ды менельде сэрейстэ кепедезь.27Сонензэ а эряви, кода се лия попонь прявтнэнень, кандтнемс Пазонтень эрьва чистэ анокст васня Эсь пежетензэ кисэ, мейле ломантнень пежетест кисэ. Иисус максызе Эсь прянзо аноксокс весть ды свалшкас.28Моисеень Коесь аравты попонь прявтокс асатыкс марто ломанть. Валось жо, конань пежетькстамо марто ёвтызе Пазось Койденть мейле, аравтызе Сонзэ Цёранзо асатыкстэме Попонь прявтокс пингеде пингес.


предыдущая глава Глава 7 следующая глава