Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 10

1Кемиця ялгат, монь сехте покш седей пултыця бажамом – те тиринь Израилень раськенть идемась, ды тень кисэ мон ознан Пазонть икеле.2Мон яволявтнян: сынь пиить-палыть Пазонть мелензэ топавтомадо, ансяк тень коряс сынст арась алкуксонь содамочист.3Сынь эзизь чарькоде, кода Пазось лови ломантнень чумовтомокс, ды бажить кемекстамс чумовтомочист эсест тевест вельде. Истя сынь эзизь максо пряст се чумовтомокс ловомантень, кона Пазонть пельде.4А вана Христос – Коенть топавтыцязо ды пезэ: ней эрьвась, кие кеми Тензэ, се ули ловозь чумовтомокс Пазонть икеле.

Идемась максови весенень

5Моисей сёрмады се чумовтомочиденть, конанень ломантне бажить пачкодемс Коенть вельде: «Ансяк се, кие топавты Коень весе вешематнень, сонзэ вельде карми эрямо».6А се чумовтомочиденть, кона максови кемеманть вельде, Сёрмадовкссо кортави истя: «Иля кевкстне эсь прят: Кие кепедеви менельс?» – лиякс меремс: Христосонь мода лангс валтомга.7«Ды иля кевкстне эсь прят: Кие валги тоначинь потмакстомо отьмас?» – лиякс меремс: Христосонь кулозтнень ютксто велявтомга.8Мезде жо корты Сёрмадовксось:
«Пазонь валось тонь вакссот –
тонь кургсоткак ды тонь седейсэтькак».
Те улияк кемемадо валось, конань минь ёвтнетяно.9Бути тон кармат эсь кургосот весеме икеле ёвтнеме: Иисус – Азоро, ды кармат седейсэть кемеме: Пазось Сонзэ вельмевтизе кулозьстэ, – сестэ улят идезь.10Эдь кие кеми седейсэ – се ловови чумовтомокс, ды кие ёвтни эсь кургосонзо – се идеви.11Сёрмадовксось корты: «Кияк Сонензэ кемицятнеде а ули совавтозь визьксчамас».12Те тевсэнть арась авейкетьксчи еврейтнень ды лия раськенсетнень ютксо. Эдь Азорось весень вейке ды сюпавсто кази весень, кие Сонзэ тердьсы лездыцякс.13Эдь сёрмадозь: «Эрьвась, кие тердьсы Азоронть лездыцякс, – идеви».

14Ансяк кода эно сыненст тердемс лездыцякс Сень, конанень а кемить? Кода сыненст кемемс Сенень, конадо эзть марсе? Кода сынь марясызь, бути кияк сыненст а пачти куля?15Кие карми пачтямо куля, бути сонзэ кияк эзизе кучо? Сёрмадовксось корты: «Вай, кода паро неемс сэтьмелувдо ёвтницятнень, Кенярксов кулянь пачтицятнень, самост!»

Аволь весе кунсолость Кенярксов кулянть

16Ансяк аволь весе парсте вастызь Кенярксов кулянть. Сонсь Исайя корты: «Азором! Кие кемезевсь сенень, мезе марясь минек пельде?»17Истя, кемемась чачи Кулянть марямсто, ды Кулясь ёвтневи Пазонь валонть пачтямсто.18Ней мон кевкстнян: Арази сынь зярдояк эзизь марсе Кулянть? Нама, марсизь! Эдь Сёрмадовкссо кортави:
«Весе масторланганть гайгезевсть сынст вайгелест,
мирэнть-масторонть пес пачкодсть сынст валост».
19Мон таго кевкстнян: Арази Израиль эзь чарькоде? Уш Моисей Пазонть пельде тенст ёвтась:
«Мон сыргозтян эйзэнк сельмень сявадома
раськенть вельде, кона раськекскак а ловови.
Ачарькодиця раськенть вельде
Мон сыргозтян эйзэнк кеж!»
20Исайя Пазонть пельде седеяк смелстэ корты:
«Монь муимизь сетне, конатне Монь эзть вешне.
Мон невтия-яволявтыя прям сетненень,
конатне Мондень эзть кевкстне».
21А вана Израильде сон корты:
«Чинь чоп Мон стяко венстнинь кедень
акунсолыця ды каршо молиця раськентень».


предыдущая глава Глава 10 следующая глава