Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 12

Пазось, кода тетя, тонавты эйсэнек

1Ванодоя, минек перька аштить вельть ламо ломанть, конат невтизь уш эсь кемемаст. Секс, эрде, ёртсынек миньгак весе сень, мезесь пири кинек, шождасто педиця пежетентькак, ды карматано цидярдозь чиеме-пелькстамо минек икелев аравтозь кинть ланга.2Сельмень апак сае карматано свал ваномо Иисус лангс. Сон минек кемеманть лисьмапрясь ды топавтыцясь. Сон сыця кенярксонть кисэ цидярдызе-пиштизе крёст лангсо куломанть, покордамонть лангс апак вано, ды ней озась Пазонть вить кедензэ ёнов.3Эдь арседея, зяро Эсь лангсонзо нарьгамот-кежть Сон кирдсь пежетев ломантнень пельде! Те лезды тыненк а прамс пильге лангсто ды а лавшомгадомс оймесэнк.

4Тыненк зярс эзь савкшно валомс веренк пежетенть каршо тюремстэнк.5Арази тынь стувтынк неть оймавтыця-кемекстыця валтнэнь, конат ёвтазь Сёрмадовкссо тыненк, кода эйкакшонзо туртов:
«Цёрам, иля вано шождасто Азоронь тонавтоманзо-мурнеманзо лангс
ды иля лавшомгале, зярдо Сон тарги лангс тонь теветь.
6Эдь Пазось тонавты-мурни сень, кинь Сон вечки;
Сон чави эрьва эйкакшонть, конань саи Эсензэкс».
7Бути тыненк эряви кандомс-цидярдомс варчавтнемань тонавтомат-мурнемат, сестэ Пазось тейни мартонк, кода Эсь эйкакшонзо марто. Арази эрси истямо эйкакш, конань тетязо аволизе тонавто-мурне?8Бути тынк а тонавтыть-мурнить, кода тейнить весе эйкакштнэнь марто, сестэ тынь муевкстадо, аволь алкуксонь эйкакштадо.

9Зярдо минек масторлангонь тетянок тонавтсть-мурнесть эйсэнек – минь сынст кунсолынек. Сестэ зяроксть седе пек миненек эряви максомс прянок менель лангонь Тетянок кедензэ алов, конань кунсоломась канды эрямо!10Минек масторлангонь тетянок тонавтсть-мурнесть эйсэнек нурька шкас ды эсест чарькодемаст коряс. Ансяк Пазось тень теи минек лезэс: Сонзэ мелезэ максомс миненеккак талика Эсензэ иневаньксчиденть.11Эрьва тонавтомась-мурнемась ней маряви ризксэкс, аволь кенярксокс. Ансяк мейле сон чачты-канды видечинь ды седейоймамонь сюпав нуевкс сетнень эрямосо, конат путозь виде ки лангс те тонавтоманть-мурнеманть вельде.

12Секскак, кемекстынк-витинк новолезь кеденк ды сорныця кумажанк!13Якадо валаня виде киява вана мекс: чамордыцянть пильгезэ илязо лисе эзнестэ, мекевланк, таго теевезэ шумбракс.

Илинк ёрто Пазонь чанстенть

14Бажадо эрямс весе марто ладязь ды истя жо Пазонтень алтазь эрямосо, конавтомо кияк а несы Азоронть.15Ванодо, кияк аволизе кадо-ёрто Пазонь чанстенть. Аволь касо-келейгадо тынк ютксо кодамояк сэпей ундокс-корён, кона кандоволь зыян, ды конаньсэ ламотне теевельть аваньксэкс.16Истя жо илязо уле ютксонк, Исавонь кондямо, ускуриця эли Пазонть эйстэ васоло аштиця ломань. Сон весть ярсамонь кисэ миизе-максызе эсь тарканзо улемс тетянзо васенце цёракс.17Эдь тынь содатадо, кода теде мейле сонзэ ульнесь покш мелезэ саемс чанстямо-баславамо тетянзо пельде, ды сон ульнесь панезь! Мекев велявтомань ки арасель, куш Исав вешсь тень сельведь марто.

18Тынь пачкодиде аволь се пандонтень, конась токави кедьсэ ды палы гувныця толсо, аволь чоподантень, аволь сумборя пелентень ды даволонтень.19Тынь сыде аволь торамонь зэрькстамонтень ды аволь зэрниця вайгелентень. Те вайгеленть марицятне энялдсть: лоткаволь сон кортамодо сынст марто.20Эдь сыненст марявсь акирдевиксэкс се, мезесь ульнесь кармавтозь: «Бути, натой, ракшаяк токави те пандонтень, сестэ сонзэ эряви чавомс кевсэ эли ледемс налсо».21Те неявиксэсь-марявиксэсь ульнесь истямо покш тандавксокс, мик Моисейгак ёвтась: «Мон сорнан пелемадонть».

22Мекевланк, тынь пачкодиде Сион пандонтень ды менелень Ерусалиментень, эриця Пазонь ошонтень, ды тёжат-тёжат ангелтнэнень,23конат пурнавсть кенярдкшномо. Тынь сыде Пазонь васень чачовтнэнь, Сонзэ кочкавтонь вейсэндявксонтень, конатнень лемест сёрмадозь менельсэ. Тынь пачкодиде Пазонтень, весень судиянтень, ды асатыкстэмекс теевезь видечисэ ломанень ойметненень.24Тынь сыде Иисуснэнь, од вейсэньлувонь кемекстыцянтень, ды Сонзэ пурксемань верентень, конась алты-ёвты Авелень верденть седе паронть.

25Истямо ладсо, ванодо, илядо велявто тыненк Кортыцядонть. Сетькак, конат эзизь кунсоло мода лангсо Пазонь мелень пачтицянть, эзть кадово чумонь апак пандо. Седеяк покш чумонь пандома учи минек, бути велявттано Сень эйстэ, кона корты менельстэ.26Сестэ Сонзэ вайгелезэ сорновтызе моданть. Ней Сон Сёрмадовкссо макссь истямо алтамо:
«Мон таго весть сорновтса моданть,
ды аволь ансяк моданть, мик менелентькак».
27Валтнэ “таго весть” невтить: весе теезесь ули сорновтозь ды полавтозь, ды кадови ансяк се, мезесь а чатавтови-а сорновтови.28А вана миненек максови асорновтовиця-ачатавтовиця инязорксчинь мастор. Секскак ёвтатано сюкпря Пазонтень ды карматано важодеме-сюконямо Тензэ домка ловома марто ды мелензэ ванозь, кода Сонензэ вечкеви.29Эдь минек Пазось – те весемень пултыця тол.


*а 12:8 муевкс, муеське – мирденень апак лисе авань чачозь эйкакш


предыдущая глава Глава 12 следующая глава