Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 11

Пазось эзизе кадо Эсь раськензэ

1Секскак мон кевкстнян: Арази Пазось кадызе Эсь раськензэ? Нама, эзизе! Мон монськак израилень ломань, Авраамонь раськень поладыця, Вениаминэнь буестэ.2Эзизе кадо Пазось Эсензэ раськенть, конань Сон умок уш кочкизе Эсензэкс. Арази тынь стувтынк, мезе корты Сёрмадовксось се таркасонть, косо Илия пеняци Пазонтень Израиль лангс:3«Азором, сынь чавнызь Тонь пазмарицятнень, калавтнизь Тонь аноксонь алтартненьгак. Мон кадовинь ськамон, ды моньгак сынь арсить маштомс»?4Мезе мерсь каршонзо Пазось? – «Мон ванстынь Эстень сисем тёжат ломанть, конат эзть пра кумажа лангс аволь алкуксонь Бал пазонть* икеле».5Истя неень шкастояк ванстовсь “кадовкс”, конань Пазось кочкизе Эсь чанстензэ коряс.6Те кочкамось – Пазонть чанстензэ коряс, аволь тевень коряс. Бути те кочкамось теевель ломантнень тевест коряс, сестэ те чанстесь допрок аволь уле чанстекс. А бути те теевель тевтнень коряс, сестэ те уш аволь уле чанстекс, ды сестэ тевеськак уш аволь уле тевекс.7Мезе тень эйстэ лисни? – Израиль эзь пачкоде сень эйс, мезес бажась. Пачкодсть тенень аламот, ансяк кочказтне, а вана лиятнень калгодкстомсть седеест.8Тень эйстэ истя корты Сёрмадовксось:
«Пазось кучсь лангозост оймень-седеень чополгадома:
течинь чис а неить сынст сельместкак ды а марить пилесткак».
9Давид инязороськак корты:
«Кадык сынь понгить кундамкас каванямо шкастост!
Кадык сынь прыть туворс, ды кадык сы тенст чумонь пандома!
10Кадык сынст сельмест вельтявить чоподасо
ды лоткить неемадо!
Пингезэст мендить сынст карязост!»

Лия раськетнень идемась

11Секскак мон кевкстнян: Арази еврейтне пупордясть ды допрок прасть? Нама, эзть! Сынст пупордямонть кувалт идема сась лия раськетненень, ды те сыргозтсь еврейтнень эйсэ сельмень сявадома.12Бути жо еврейтнень пупордямось кандсь масторлангонтень чанстямо-баславамо, ды бути сынст кажовчись макссь лия раськетненень сюпавчи, сестэ седеяк покш ули се чанстямонь сюпавчись, зярдо весе еврейтне велявтыть Пазонтень!

13Ней мон пшкадян тыненк, лия раськень ломанть: мон лия раськетнень апостол ды ёвтан сюкпря Пазонтень монень максозь важодеманть кисэ.14Паряк, истя монень сыргозтеви сельмень сявадома тынк лангс монь масторонь ломантнень эйсэ, ды конат-конат эйстэст идевить.15Бути еврейтнень эйстэ Пазонть велявтомась панжсь лия раськетненень Пазонть марто ладямонь ки, мезе эно ули сестэ, зярдо Пазось сынст мекев сайсынзе? Те ули кулозьстэ вельмема!16Бути чапаксонть васенце пельксэзэ алтазь Пазонтень, сестэ Сонензэ алтазь весе чапаксоськак. Ды бути чувто корёнтнэ-ундокстнэ алтазь Пазонтень, сестэ Сонензэ алтазь тарадтнэяк.

17Конат-конат пирень ойумарьксэнь тарадтнэ ульнесть синтрезь, ды тон, вирень ойумарьксэнь тарад, ульнить педявтозь сынст таркас.* Истя тон вейсэндявить пире ойумарьксэнь ундокстнэнень, конатнень вийсэ эри чувтось.18Секскак тон иля покшкавтне прят сетнень икеле, конат ульнесть синтрезь кода алкуксонь тарадт! А мейсэ тонеть покшкавтнемс прят! Эдь ундокстнэ максыть тонеть вий, аволь тон ундокстнэнень.19Паряк, тон ёвтат: «Неть тарадтнэ ульнесть синдезь монь педявтоманть кисэ».20Те виде. Сынь синдезь акемемаст кисэ, а вана тон сынст таркасо аштят кемемат кувалт. Ялатеке прят пек верьга иля кандо, – пельть!21Бути Пазось эзинзе жаля еврейтнень, кода алкуксонь тарадтнэнь, арсят, тонь жалятанзат?22Вант, Пазось чевте седейгак ды калгодояк. Калгодо Сон Эйстэнзэ потыцятненень, а тонеть чевте седей, бути седе товгак кармат кирдевеме Сонзэ чевте седейсэнть. Бути а кармат, – сестэ Пазось тоньгак керятанзат.23Ды бути еврейтнеяк кадсызь эсь акемемаст, сестэ сынь улить велявтозь тарказост. Пазонть ули виезэ одс педявтомс сынст чувтонтень.24Ды бути тон керязь вирень ойумарьксстэ, конаньсэ ульнить чачомань коряс, ды педявтозь чачома коенть каршо пиренсентень, сестэ Пазонтень седеяк шожда ули мекев педявтомс неть алкуксонь тарадтнэнь эсь чувтост лангс.

Израилень идемась

25Монь мелем, кемиця ялгат, панжомс тенк вейке салавачи, кона вансттадызь тынк ансяк эсь превейчинк лангс нежедемадонть: седеень калгодьксчись, конаньсэ ашти Израилень раськень пельксэсь, те аволь свал шкас. Сон таргави ансяк семс, зярс лия раськень ломантне, конатнень аравтынзе Пазось, а велявтыть Тензэ.26Ды сестэ весе Израилесь ули идезь, кода тенде корты Пазонь пельде Сёрмадовксоськак:
«Олякстомтыцясь сы Сионсто
ды Яковонь раськенть поладыцянзо ванськавтсынзе зыяндонть.
27Ды Мон тейса сынст марто те вейсэньлувонть,
зярдо нардасынь пежетест».

28Еврейтне – Пазонтень душмант, секс мекс эзизь васто Кенярксов кулянть, мезесь моли тынк лезэс. А вана кезэрень пингень ине тетяст кисэ сынь – Пазонтень вечкевикст, секс мекс сынь – Пазонь кочкавт раське.29Пазось а полавтни Эсь казнензэ ды тердеманзо.30Тынь зярдо-бути ульниде Пазонь а кунсолыцякс, ансяк ней тыненк максозь Пазонь седеймарямо еврейтнень а кунсоломаст кис.31Истя еврейтнеяк ней Пазонь а кунсолыцят, ды истя жо сыненсткак ней максови Пазонть седеймарямо – тыненк максозь седеймарямонть кувалт.32Пазось пекстынзе-саинзе весень Сонзэ а кунсоломанть алов, весенень седеймарямонь максомга.33
Вай, кодамо певтеме Пазонь сюпавчись,
кодамо домка Сонзэ превейчись ды содамочись!
Киненьгак а панжовить Сонзэ мельтне-арсематне!
Киненьгак а чарькодевить Сонзэ китне-янтнэ!
34«Кие чарькодинзе Азоронть мелензэ-превензэ,
ды кие ульнесь Сонзэ превспутыцякс?
35Ды кие макссь Тензэ икеле мезеяк,
конань Сонензэ эряволь максомс мекев?»
36Эдь весемесь теезь Сонзэ кувалт
ды эри Сонзэ вельде ды Сонзэ туртов!
Улезэ Тензэ шнамо пингеде пингес! Аминь.


предыдущая глава Глава 11 следующая глава