Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 4

Иоанн неи менель

1Теде мейле мон варштынь ды неинь эсень икельде менельс панжозь кенкш! Ды маринь вайгель, кона икелеяк кортась монь марто ды гайгсь теке торамо. Сон мерсь: «Кепедевть тей! Мон невтьса теть, мезе топавтови теде мейле».2Пазонь Оймеялтось нейке саимим монь Эсензэ виенть алов. Ды мон неинь менельсэ инязоронь озамо тарка, косо озадоль Та-кие.3Озадо аштицясь сияждсь яшмань ды сардоликень питней кевтнень ладсо. Инязоронь озамо тарканть перька ульнесь пиземе чирьке ды цивтёрдсь изумруд ладсо.4Озамо тарканть перька ульнесть лия комснилее инязоронь озамо таркат, ды эрьвасонть озадоль сыре атя. Оршамопелест ульнесть ашот, пряваст – инязоронь сырнень каштазт.5Инязоронь озамо тарканть эйстэ неявсть ёндолонь кивчкаемат, марявсть сееремат ды пурьгинень зэртть. Озамо тарканть икеле палсть толонь сисем пусмот – Пазонь сисем оймеялтт.6Озамо тарканть каршо ульнесь таго-мезе иневедень кондямо, кона цивтёрдсь пачк неиця сулика ды крусталь ладсо.

Инязоронь озамо тарканть перька, сонзэ ёжова, стядо аштесть ниле таго-мезть ракшань-ломанень кондят: сынст рунгост икельгаяк ды удалгаяк вельтязельть ламо сельмесэ.7Васенцесь ульнесь левень кондямо, омбоцесь – од букань кондямо, колмоценть чачозо мольсь ломанень чама ёнов, нилецесь мольсь ливтни куцькан ёнов.8Нилетнестэ эрьванть рунгозо вельтязель сельмесэ мик сёлмо алгаяк. Сёлмост жо ульнесть котонь-котонь. Чинек-венек сынь апак лотксе яла моравтыть:
«Иневанькс, иневанькс, иневанькс
Азоро Пазось, Весеменькирдицясь,
кона свал ульнесь, ули ды карми улеме!»
9Ды эрьваксть, зярдо неть ракшань-ломанень кондятнэ ёвтнить инексчинь, шнамонь ды сюкпрянь валт инязоронь озамо таркасо Озадонтень, пингеде пингес Эрицянтень,10комснилее сыре атятне прыть инязоронь озамо таркасо Озадонть икелев ды сюконякшныть пингеде пингес Эрицянтень. Сынь путыть эсест инязоронь каштазост озамо тарканть икелев ды сеерить:11
«Азоро!
Сэрейчить-покшчить коряс Тонеть максови
весе инексчись, шнамось ды кирдемавиесь!
Эдь Тон теик весементь,
ды Тонь мелеть коряс эри весемесь
ды теезельгак весемесь Тонь мелеть коряс».


предыдущая глава Глава 4 следующая глава