Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 21

Од менель ды од мода

1Вана мон неия од менеленть ды од моданть. Эдь васень менелесь ды васень модась допрок ёмасть, ды иневедеськак ёмась-арась.2Ды мон, Иоанн, неия Пазонь иневанькс ошонть, од Ерусалименть. Сон валгиль менельстэ Пазонть пельде, оршазь теке одирьва, кона учни эсь мирдензэ.3Ды мон маринь виев вайгель менельстэ:
«Ванодо, Пазонть эрямо тарказо ней ломантнень ютксо!
Пазось ней свал карми эрямо сынст марто,
ды неть ломантне теевить Сонзэ раськекс.
Сонсь Пазось карми улеме мартост, сынст Пазокс.
4Сон нардасы сынст сельместэст эрьва сельведненть.
Куломась а ули, ды а кармить улеме ризнэмаяк,
авардемаяк, пиштемаяк,
эдь весе таштось ёмась-арась пингеде пингес».

5Инязоронь озамо таркасо Аштицясь мерсь: «Вана, мон тейса весементь одокс». Ды поладсь: «Сёрмадык, эдь неть валтнэ видеть ды кемевикст».6Сон таго мерсь монень: «Весемесь топавтовсь! Мон – Альфа ды Омега, Ушодксось ды Прядовксось. Сенень, кинь сы симемазо, Мон стякодо максан симемс эрямо ведень лисьмапрястонть.7Кие изни, сенень Мон максса казнекс весе тень. Мон улян тензэ Пазокс, сон Монень – эйкакшокс.8Вана мезе ули лиятнень марто: пелицятнень ды кемемань кадыцятнень, нулгодькс тевень тейницятнень ды ломанень маштницятнень, ускурицятнень, муницятнень-орожиицятнень ды аволь алкуксонь пазнэнь сюконицятнень, ды весе кенгелицятнень ёртсызь чумост кис кирвитолсо ды палыкандалсо палыця эрькентень, кона улияк омбоце куломакс».

Од Ерусалим

9Мейле вейкесь неть сисем ангелтнэстэ, конат кандсть сисем вакант, пештязь меельце сисем зыянтнэсэ, сась монень ды кортазевсь: «Сак малав, мон невтьса теть Вирезэнь одирьванть-нинть».10Ды Пазонь Оймеялтось саимим Эсь виензэ алов ды ангелэсь пачтимим монь покштояк покш ды сэрей пандо пряс. Тосто сон невтизе монень ине ошонть, Пазонь иневанькс Ерусалименть, кона валгиль менельстэ Пазонть пельде.11Сон сияждсь Пазонь иневалдосонть, ды сонзэ сияждомась мольсь питнейдеяк питней кевень цивтёрдома ёнов, пачкнеиця крусталень кондямо яшма ёнов.12Ошось пирязель кемгавтово орта марто сэрей ошпирявкссо. Ортатнень вакссо аштесть кемгавтово ванстыця ангелт. Ортатнень лангсо сёрмадозельть Израилень кемгавтово буетнень лемест, эрьва ортасонть – вейке лем.13Колмо ортатне вансть чилисемав, колмотне – пелеве ёнов, колмотне – обед ёнов, колмотне – чивалгома ёнов.14Ошпирявксось аштесь кемгавтово кевень юрт лангсо. Эрьва кевенть лангсо сёрмадозель Вирезэнть кемгавтово апостолтнэнь лемтнестэ вейкесь.

15Ангелэсь, кона кортась монь марто, кирдсь кедьсэнзэ сырнень онкстнемапель*, конасонть сон пурнась онкстнеме ошонть, ортатнень ды ошпирявксонть.16Ошось ульнесь квадратонь кондямо: кувалмозо истямо жо, кодамо келезэ. Ангелэсь онкстнизе ошонть онкстнемапельсэнзэ. Ошонть кувалмозо кемгавтово тёжат стадият*, келезэ ды сэрезэ кувалмонть марто вейкеть.17Сон онкстнизе ошпирявксонтькак: эйсэнзэ ульнесть сядо ниленьгемень ниле кенереть ломанень онкстнемапелень коряс; те онкстнемапельсэнть онкстнесь ангелэськак.18Ошпирявксось теезель яшмань питней кевстэ, сонсь ошось теезель ванькс сырнестэ, теке пачкнеиця суликасто.19Ошпирявксонь юртнэ мазылгавтнезельть эрьва кодамо питней кевсэ. Васенце юрт кевесь ульнесь яшма, омбоцесь – сапфир, колмоцесь – калцедон, нилецесь – изумруд,20ветецесь – сардоникс, котоцесь – сердолик, сисемецесь – кризолит, кавксоцесь – берил, вейксэцесь – топаз, кеменцесь – кризопраз, кевейкеецесь – бирюза, кемгавтовоцесь – аметист.21Кемгавтово ортатне теезельть кемгавтово ведьэрьгестэ: эрьва ортась ульнесь вейке ведьэрьгестэ. Ошонь прявтульцясь теезель ванькс сырнестэ, теке пачкнеиця суликасто.

22А вана Пазонь кудо Мон эзинь нее ошстонть. Пазонь кудось тосо – те Сонсь Весеменькирдиця Азоро Пазось ды Вирезэсь.23Ошонть валдомтсь Пазонь сияждыця иневалдось, ды сонзэ лампазо – Вирезэсь. Секскак лия валдовтомапель, кода чись ды ковось, ошонть туртов эзь эряво.24Ошонь сияждыця валдосонть кармить эрямо весе масторлангонь идезь раськетне, мода лангонь весе инязортнэ кандсызь тозонь эсест сюпавчист ды инексчист.25Чинь чоп ошонь ортатне кармить улеме панжозь. Сынь а кармить пекстневеме зярдояк, эдь ве тосо а эрси ды а улияк.26Ды раськетне кандсызь сонзэ эйс весе эсест сюпавчист ды инексчист.27Зярдояк а совави те ошонтень кодамояк аванькс, а совави кияк, кие теи нулгодькс тевть ды кенгели. Совавить ансяк сетне, конатнень лемест сёрмадозь Вирезэнть эрямо книгантень.


предыдущая глава Глава 21 следующая глава