Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 18

Валвелявкс довадо ды а виде судиядо

1Иисус невтиксэлизе тонавтницятненень, кода эряви свал озномс ды а нолдтнемс прянть. Секскак ёвтнесь тенст истямо валвелявкс:2«Вейке ошсо эрясь судия, конась эзь визде ломанде, эзь пеле Паздояк.3Секе ошсонть эрясь дова, конась свал сакшнось сонензэ ды энялдсь: “Идемак монь зыянонь теицядонть!”4Судиянть кувать арасель мелезэ идемс аванть. Ды ансяк мейле сон эстензэ мерсь: “Кадык Паздояк мон а пелян, ломандеяк а виздян,5ялатеке те довась налкставтымим. Секс мон лездан тензэ, лиякс – сонзэ нернемась паньсамам калмос”».6Ды Азорось мерсь: «Марятадо, мезде корты а виде судиясь?7Нать Пазось мезеяк а теи Эсензэ кочкавтнэнь идемаст туртов, конат чинек-венек энялдыть икелензэ? Арази Пазось кармавтсынзе сынст учомо?8Кортан тенк: Сон куроксто идесынзе Эсензэ кочкавтнэнь! Ялатеке зярдо мекев сы Ломантнень Цёрась, муеви а муеви Тензэ масторлангсо алкуксонь кемемась?»


Фарисейде ды каявксонь пурныцядо валвелявкс

9Иисус ёвтнесь истямо валвелявкс сетненень, конат кемсть-нежедсть эсь видечист лангс ды лия ломантнень мезекскак эзизь путне:10«Кавто ломанть совасть Пазонь кудос озномо. Вейкесь – фарисей, омбоцесь – каявксонь пурныця.11Фарисеесь стясь ды ознось эсь пачканзо истя: “Пазом! Сюкпря Теть сень кисэ, мекс мон а истяман, кодат лия ломантне: салыцят, кенгелицят, ускурицят, эли кодамо те вакссон аштиця каявксонь-налогонь пурныцясь.12Мон постован кавксть недлязонзо, максан Тонеть кеменце пельксэнть весеместэ, мезе монень макснить ломантне”.13Каявксонь пурныцясь аштесь ве ёно, сельмензэяк виздсь кепедемс менельс, ды, мештьс кедень вачкоезь, кортась: “Пазом! Ульть седеймарицякс монень, пежетев ломанентень!”14Ёвтан тенк: те ломанесь тусь кудов седе вишкине чумо марто фарисеенть коряс. Эдь эрьвась, кона сонсь кепеди эсь прянзо, се ули валгстозь; кона валгсты эсь прянзо, се ули кепедезь».


Иисус ды эйкакшт

15Иисуснэнь кандтнесть-ветнесть вишкине эйкакшткак, конатнень лангс вешсть путомс кедензэ. Тень неезь, тонавтницятне кармасть кардамост.16Иисус тердинзе эйкакштнэнь Эсензэ икелев ды мерсь: «Мереде эйкакштнэнень сакшномс Монень, илядо карда эйсэст, эдь истятнэнь ули Пазонь Инязорксчист.17Видестэ кортан тенк: кие Пазонь Инязорксчинть а вастсы эйкакш ладсо, се тозонь а совави».


Сюпав ломанесь кевкстни Иисусонь

18Вейке прявтось кевкстизе Иисусонь: «Паро тонавтыця! Мезе монень теемс пингеде пингень эрямонтень совамга?»19Иисус каршонзо мерсь: «Мейс тон Монень “паро” мерят? Паздо башка кияк парокс а эрси.20Тон, нама, кармавтовкстнэнь содасыть: иля ускуря, иля маштне, иля сала, иля кенгеле, ловт ломанькс тетять-авать».21Прявт ломанесь каршонзо мерсь: «Весе тень мон топавтан од пингестэ саезь».22Тень марязь, Иисус мерсь тензэ: «Тонеть вейке ансяк а сатны: азё, весементь, мезеть ули, микшник. Ярмактнень явшить пурныцятнень ланга. Сестэ карми улеме теть сюпавчи менель лангсо. Теде мейле сак ды мольть Монь мельга».23Неть валтнэде нусмакадсь прявт ломанесь, эдь сон ульнесь пек сюпав.24Иисус неизе, кода сон нусмакадсь, ды мерсь: «Вай, кодамо стака сюпавтненень максомс пряст Пазонь Инязорксчинтень!25Сюпав ломанентень пек стака совамс Пазонь Инязорксчинтень, седе шожда верблюдонтень салмукс варява ютамс!»26Сеть, конат тень маризь, кевкстизь Иисусонь: «Кие эно сестэ идеви?»27Иисус тень каршо мерсь тенст: «Мезе а тееви ломанентень, се тееви Пазонтень».28Сестэ Петра мерсь сонензэ: «Вана минь кадынек весементь ды туинек Тонь мельга».29Иисус каршонзо мерсь: «Видестэ кортан тенк: кие Пазонь Инязорксчинть кисэ кадызе кудонзо, тетянзо-аванзо, лелянзо-ялаксонзо, патянзо-сазоронзо, нинзэ эли эйкакшонзо,30сенень мекев максови ламодояк седе ламоксть неень шкасто, ды сыця шкастонть – пингеде пингень эрямо».


Иисус колмоцеде икелев корты Эсензэ куломадо ды вельмемадо

31Иисус тердинзе ве ёнов кемгавтово тонавтницянзо ды мерсь тенст: «Вана минь мольтяно Ерусалимев ды тосо топавтови се, мезде сёрмадозь Ломантнень Цёрадонть пазмарицятнень книгатнесэ.32Сонзэ макссызь лия раськень ломантнень кедьс, конат кармить Сонзэ покордамо, сельгенеме ды лангсонзо згилямо,33кармить локшосо чавомонзо ды теде мейле маштсызь Сонзэ. Ансяк колмоце чистэ Сон кулозьстэ вельми».34Тонавтницятне тень эйстэ мезеяк эзть чарькоде. Иисусонь кортамонь смустесь ульнесь тонавтницятнень туртов пекстазь ды сынь эзть чарькоде, мезде теньсэ арсесь ёвтамо Иисус.


Иисус шумбралгавты сокоронть

35Иисус пачкодсь Ерихон ошонть малас. Те шкане ки чиресэ озадоль сокор пурныця ды вешсь лезкске.36Сон марясь, ваксканзо ютыть ламо ломанть ды кевкстсь: «Мезе те истямось?»37Сокоронтень ёвтасть: «Те юты Назаретэнь Иисус».38Сестэ сокорось серьгедсь: «Иисус, Давидэнь Цёра! Ульть седеймарицякс монень!»39Икеле молицятне кармавтсть эйсэнзэ чатьмонеме, ансяк сон яла седеяк пек пижнесь: «Давидэнь Цёра! Ульть седеймарицякс монень!»40Иисус лоткась ды мерсь: «Ветинк те ломаненть Монь икелев». Зярдо сокорось сась икелензэ, Иисус кевкстизе:41«Мезе мелеть теевтемс Монь кедьстэ?» Сокорось мерсь: «Азоро, теить неицякс сельмень!»42Иисус мерсь тензэ: «Кармак нееме! Кемемат шумбралгавтынзеть тонь!»43Сокорось нейке кармась нееме ды Пазонть шназь тусь Иисус мельга. Зярдо ломантне тень неизь, сынь весе кецясть ды шнасть Пазонть.



предыдущая глава Глава 18 следующая глава