Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 9

Иисус кучи тонавтомо кемгавтово апостолт

1Иисус тердинзе Эстензэ кемгавтово тонавтницянзо, макссь тенст вий ды азорксчи ломаньстэ идемевсень пансеме ды эрьва кодамо ормань менстямо.2Сон кучинзе сынст ёвтнеме Пазонь Инязорксчиденть ды сэредицятнень шумбралгавтомо3ды мерсь тенст: «Илядо сае ки лангов мезеяк: кедьнежеяк, кансткак, кшияк, ярмакткак, оршамонь полавксткак.4Кодамо кудос соватадо, тосо эрядо се шкас, зярс а тутадо те ошстонть.5Косо тынк парсте а васттадызь, те ошстонть лиседе ды чукадинк пильгестэнк мик пулентькак. Кадык те ули сынст чумост невтемакс».6Ды тонавтницятне тусть яксеме велестэ велес, эрьва кува Кенярксов кулянь ёвтнезь ды сэредицянь шумбралгавтнезь.

7Весе неть Иисусонь тевтнеде кулятне пачкодсть Иродонь, Галилеянь тетрархонть, пилес. Сон абунгадсь: веенст кортасть, келя, те Иоанн вельмесь кулозьстэ,8омбонст – Илия валгсь менельстэ, колмонст – вельмесь кезэрень пазмарицятнестэ вейкесь.9Ирод арсесь: «Мон монсь керявтыя Иоаннонь прянзо, кие эно те ломанесь, конадонть монень ёвтнить истят ёвтнемат?» Ды секскак сон пек неиксэлизе Иисусонь.


Иисус анды вете тёжат ломанть

10Апостолтнэ велявтсть Иисуснэнь ды ёвтнесть Тензэ весемеде, мезе сынь тейнесть. Сестэ Иисус саинзе сынст Эсензэ марто ды сынь тусть Бетсаида ошонть эйстэ аволь васов, сэтьме таркав.11Ламо ломанть марясть Иисусонь туемадонть ды сыргасть Сонзэ мельга. Иисус седейшкава вастынзе сынст, кортнесь мартост Пазонь Инязорксчиденть ды шумбралгавтынзе сетнень, конат вешсть шумбрачи.12Чись ульнесь валгома лангсо. Кемгавтово тонавтницятне мольсть Иисусонь малас ды мерсть: «Мерть ломантненень, кадык сынь туить перька велень кудотнева ярсамопелень ды удома таркань вешнеме, эдь минь тесэ чаво таркасо».13Иисус кармавтсь тенст: «Тынь тынсь максодо тенст ярсамопель!» Тонавтницянзо тень каршо мерсть: «Минек ансяк вете кшинек ды кавто калонок. Паряк, миненек молемс ды рамамс весе неть ломантнень туртов ярсамопель?»14Цёра ломантнеде тосо ульнесть ветешка тёжа. Иисус мерсь тонавтницянстэнь: «Ойсевтинк куронь-куронь, ведьгеменень-ведьгеменень».15Тонавтницятне истя тейстькак ды весень ойсевтизь.16Сестэ Иисус саинзе вете кшитнень ды кавто калтнэнь, варштась менельс, ёвтась сюкпря Пазонтень, синтринзе ды макснинзе тонавтницянстэнь явшемс ломантнень ланга.17Весе ярсасть ды пешкедсть. Кадовозь сускомотнеде тонавтницянзо пурнасть кемгавтово куйметь.


Петра яволявты Иисусонь Пазонь кучовт Идицякс ды Иисус икелев ёвты Эсензэ пиштематнеде ды куломадо

18Весть, зярдо Иисус ознось сэтьме таркасо ды мартонзо ульнесть ансяк тонавтницянзо, Сон кевкстинзе сынст: «Киекс ловить Монь эйсэ ломантне?»19Сынь мерсть каршонзо: «Веенст ловить Тонь Нававтыця Иоаннокс, омбонст – Илиякс, лият кортыть – вельмесь кезэрень пазмарицятнестэ вейкесь».20Иисус одов кевкстинзе сынст: «Вана тынь киекс Монь ловсамизь?» Петра мерсь каршонзо: «Тон Христосат, Пазонь кучовт Идицят».21Сестэ Иисус пек кармавтсь тенст киненьгак теде а ёвтнемс.22Ды поладсь: «Ломантнень Цёрантень ламо сави пиштемс. Прявтнэ, попонь покштнэ, Койс тонавтыцятне велявтыть Эйстэнзэ. Сон карми улеме маштозь, ансяк мейле колмоце чистэ Сон кулозьстэ вельми».

23Мейле Иисус мерсь весенень: «Кинь ули мелезэ молемс Монь мельга, се стувтозо эсь прянзо, саезэ эсь крёстонзо ды молезэ мельган.24Кинь ули мелезэ эсь эрямонзо ванстомс, се ёмавтсы сонзэ. Кие жо ёмавтсы эсь эрямонзо Монь кисэ, се ванстсы сонзэ.25Кодамо лезэ ули ломанентень, бути сон сайсы эстензэ весе масторлангонть ды бути теке марто теи эстензэ кулома эли мик оймень ёмамо!26Бути кияк визделгады Монь эйстэ ды Монь валтнэде, сень эйстэ визделгады Ломантнень Цёраськак, зярдо Сон сы Эсь инексчинь сияждомасо, Эсь Тетянзо ды иневанькс ангелтнэнь иневалдосо.27Видечи ёвтан тенк: конат-конат тесэ аштицятнень эйстэ а кулыть, кода несызь Пазонь Инязорксчинь самонть».


Иисусонь лиякстомась

28Кавксошка чинь ютазь теде мейле, кода Иисус ёвтась теде, Сон саинзе мартонзо Петрань, Иоаннонь ды Яковонь ды кузсь мартост пандо пряс озномо.29Ознома шкастонть Иисусонь чама чачозо лиякстомсь, оршамопелензэ теевсть цивтёрдыця ашокс.30-31Апак учо Сонзэ ваксс лиссть кавто ломанть: Моисей ды Илия ды кармасть кортнеме Иисус марто. Сынст перькаяк ульнесь иневалдонь сияждомась. Сынь кортнесть Иисусонь эрямонь прядовомадонть, конась топавтови Ерусалимсэ.32Се шкане Петра ды сонзэ ялгатне кеместэ матедевсть. Зярдо сыргозсть, сынь неизь Иисусонь иневалдонь сияждомасо ды Сонзэ марто аштиця кавто цёратнень.33Зярдо цёратне туиксэльть Иисусонь эйстэ, Петра мерсь: «Тонавтыця, кода паро миненек тесэ улемс. Эрьга, тейтяно колмо кудынеть: вейкенть Тонеть, вейкенть Моисейнень, вейкенть Илиянень». Те шкастонть Петра сонськак эзь сода, мезде кортась.34Петрань эзь прядово кортамозо, кода сась пель ды вельтинзе сынст. Тонавтницятне пек тандадсть, зярдо кекшевсть пеленть эйсэ.35Пеленть потсто каятотсь вайгель: «Те Монь вечкевикс Цёрам. Кунсолодо Сонзэ!»36Зярдо вайгелесь чатьмонезевсь, тонавтницятне неизь Иисусонь таго ськамонзо. Сень, мезе несть тонавтницятне, сынь се шкастонть киненьгак эзизь ёвтне ды кирдсть эсест потсо.


Апаро оймеялтсо колавт цёрынень шумбралгавтомась

37Омбоце чистэнть, зярдо сынь валгсть пандо прясто, Иисусонь вастызь ламо ломанть.38Апак учо кие-бути ломантнень ютксто серьгедсь: «Тонавтыця, энялдан икелеть: лездак монь цёрынем туртов! Сон монь вейкине эйдем!39Сонзэ лангс сеедьстэ кайсеви апаро оймеялтось: цёрынесь апак учо пижакали. Оймеялтось рестеи эйсэнзэ мода лангс, эйдесь пани човт, ды оймеялтось сонзэ кадсы ансяк сестэ, зярдо овсе машты эйденть виезэ.40Мон энялдынь Тонь тонавтницят икеле панемс те оймеялтонть, сыненст жо сон эзь паневе».41Иисус мерсь каршонзо: «Вай, неень пингень акемиця ды колазь ломанть! Зярс Монень эряви улемс тынк марто ды кирдемс коронк?! Ветик тей цёрынькат».42Мик зярдо молиль цёрынесь Иисусонь малас, идемевсесь рестедизе сонзэ: цёрынесь прась мода лангс ды пуворявозь кеверезевсь. Иисус кардызе аванькс оймеялтонть, шумбралгавтызе цёрыньканть ды максызе мекев тетянстэнь.43Весе ломантне абунгадозельть Пазонь истямо вийденть ды инексчиденть.


Иисус таго корты Эсензэ куломадо

Зярдо весе ломантне дивсесть Иисусонь тевтненень, Сон мерсь Эсензэ тонавтницянзо туртов:44«Кунсолодо Монь ды мельсэнк кирдинк сень, мезе Мон тенк ёвтан: Ломантнень Цёрась ули максозь-миезь ломантнень кедь алов».45Ансяк сынь эзизь чарькоде Иисусонь валтнэнь смустест: сон кекшезель эйстэст, ды секскак сынь Сонзэ кортамонзо эзизь чарькоде, ды кевкстемс Сонзэ сынь пельсть.


Кие весемеде покш?

46Тонавтницятнень ютксо лиссь пелькстамо: кие сынст ютксо весемеде покшось.47Сынст седей мельтнень чарькодезь, Иисус сайсь эйкакш, аравтызе сонзэ Эсензэ ваксс48ды кортась тенст: «Кие сайсы эстензэ Монь лемем кисэ те эйкакшонть, се Монь сайсамам. Кие Монь сайсамам, се Кучицямгак сайсы. Кие весемеде вишкине тынк ютксо, – се алкуксокс весемеде покш».


Кие аволь тынк каршо, се тынк кисэ

49Сестэ Иоанн мерсь Иисуснэнь: «Тонавтыця! Минь неинек ломань, кона Тонь лемсэ идемевсть панси. Минь кардынек сонзэ, мекс сон минек марто а яки».50Иисус мерсь каршонзо: «Илинк карда сонзэ: кие аволь тынк каршо, се тынк кисэ».


Самариянь веле

51Зярдо малавгадсь Иисусонь менель лангов кепедевема шкась, Сон апак кавтолдо сайсь мель молемс Ерусалимев.52Эсензэ эйстэ седе икеле Иисус кучсь ёвтыцят, конат мольсть Самариянь вейке велес анокстамо весементь, мезе эрявсь Сонзэ самонть туртов.53Ансяк велень эрицятне Иисусонь эзизь совавто тозо секс, мекс мольсь Сон Ерусалимев.54Тень неезь, Сонзэ тонавтницятне, Яков ды Иоанн, кевкстсть: «Азоро, бути ули мелеть, минь мертяно: валгозо менельстэ толось ды кадык весень маштсынзе кода тейсь Илия?»55Иисус велявтсь сынст ёнов, лоткавтынзе ды мерсь: «Тынь а содатадо, кодамо оймеялтонь тынь.56Эдь Ломантнень Цёрась сась ломантнень оймест идеме, аволь ёмавтомо». Ды сестэ сынь тусть лия велев.


Иисусонь мельга

57Молемстэ сынь вастсть ломань, кона мерсь Иисуснэнь: «Азоро, мон туян Тонь мельга, ков Тон илязат моле».58Иисус каршонзо мерсь: «Ривезтнень ды менель нармунтнень улить пизэст, Ломантнень Цёранть жо арась тарказо, козонь чиремтевлизе прянзо».59Лия ломанентень Иисус мерсь: «Мольть Монь марто». Тонась мерсь: «Азоро, нолдамак монь васняяк кудов тетянь калмамо».60Иисус каршонзо мерсь: «Кадык кулозтне эсь кулозест сынсь калмасызь. Тон жо мольть ды ёвтнек Кенярксов кулянть Пазонь Инязорксчиденть».61Таго вейке ломань мерсь Иисуснэнь: «Мон молян Тонь марто, Азоро! Ансяк мерть монень васняяк молемс кудов ды ёвтамс туемань вал малавиксэнь туртов».62Иисус мерсь каршонзо: «Кона путызе кедензэ сока лангс ды ялатеке ванкшны удалов, се а маштови Пазонь Инязорксчинть туртов».



предыдущая глава Глава 9 следующая глава