Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 8

Иисус – од вейсэньлувонь Попонь прявт

1Ней минь пачкодинек те кортамосонть сехте эрявиксэнтень: минек ули истямо Попонь прявтонок, кона озадо ашти менельсэ Инепазонть инязоронь тарканть вить кедь ёно.2Сон важоди Попонь прявтокс ознома кудосо, Пазонь алкуксонь коцткудосо, конань стявтызе Сонсь Азорось, аволь ломань.

3Эрьва попонь прявтось путови Пазонтень казнень ды аноксонь кандтнеме. Секскак минек Попонь прявтонтеньгак истя жо эрявсь мезе-бути кандомс аноксокс.4Бути Иисус улевель мода лангсо, сестэ Сон аволь уле кодамояк попокс, секс мекс тесэ уш улить истят попт, конатне кандтнить казнеть Моисеень Коень вешематнень коряс.5Ялатеке сынст важодемась – те ансяк менеленсенть ёнов молиця, сонзэ сулеезэ. Истя жо Моисейненьгак, зярдо сон пурнась тееме Пазонь коцткудонть, Пазось мерсь: «Вант, теик весементь сень ладсо, кона невтезель теть пандо прясо».6А вана ней Иисуснэнь максозь попокс важодема, кона пек седе покш мода лангонь поптнэнь важодемадост. Истя жо Сонзэ кемекставт вейсэньлувоськак икеленседенть седе паро, секс мекс сонзэ юрс путозь Пазонь максовт седе паро алтамот.

7Бути васенце вейсэньлувось улевель асатыкстэмекс, сестэ уш лиясь аволь эряво.8Секс Пазось Сёрмадовкссо Эсь ломанензэ кори истя:
«Вана сыть чить, – корты Азорось, –
зярдо Мон ладян-теян од вейсэньлув
Израилень ломантнень ды Иудань ломантнень марто.
9Те вейсэньлувось карми улеме аволь истямо,
конань Мон теекшния покштяст марто се чистэнть,
зярдо Мон саинь сынст кедте
ды ливтинь Египетэнь масторсто.
Ансяк сынь эзть топавто Монь вейсэньлувонть
ды секс Монгак велявтынь сынст эйстэ, – корты Азорось.
10Вана кодамо вейсэньлув Мон теян Израилень ломантнень марто
неть читнеде мейле, – корты Азорось, –
Мон путсынь Эсень койтнень сынст пря потмозост
ды сёрмадсынь сынст седеезэст.
Мон карман улеме сыненст Пазокс,
а вана сынь – Монь раськекс.
11Сестэ уш кияк а карми тонавтомо
эсь малавиксэнзэ эли лелянзо-ялаксонзо истямо валсо:
“Содык-чарькодик Азоронть”.
Эдь сынь весе кармить Монь содамо,
вишкинестэ саезь сехте покшос-инес.
12Мон нолдасынь сынст авидечист,
уш зярдояк а ледстясынь мелезэнь
сынст пежетест ды койтемечист».
13Зярдо Пазось кортась “од вейсэньлувдонть”, сестэ Сон невтсь васенце вейсэньлувонть ташточинзэ. Ансяк весе, мезесь таштоми ды сыреди, пек куроксто ёми.


предыдущая глава Глава 8 следующая глава