Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 14

Вирезэсь ды Сонзэ ломанензэ

1Ды мон неия: вана Вирезэсь стядо ашти Сион пандо прясо ды Сонзэ марто сеть сядо ниленьгемень ниле тёжат ломантне, конатнень конясост сёрмадозь Сонзэ Тетянзо лемесь.2Ды мон маринь менельстэ вайгель, кона ведьпрамонь увноманть кондямоль, пурьгинень ине зэртенть кондямоль. Те вайгелесь марявсь прок кайгасо седицянь седямокс.3Сядо ниленьгемень ниле тёжатне морасть од шнамо моро инязоронь озамо тарканть икеле, ниле ракшань-ломанень кондятнэнь ды сыре атятнень икеле. Те шнамо моронть кияк эзь машто морамонзо, неть ломантнеде башка, конат рамазь-идезь мода лангсто.4Неть сеть, конат эзть удсе ава марто ды ванстызь эсест ваньксчист. Неть сеть, конат свал молить Вирезэнть мельга, ков Сон илязо моле. Сынст рамизь-идизь весе ломантнень ютксто ды васенце казнекс алтызь Пазонтень ды Вирезэнтень.5Сынст кургсто зярдояк эзть лисне кенгелемат, ды сынь свал ульнесть асатыкстэметь, колавкстомот Пазонь инязоронь озамо тарканть икеле.

Колмо ангелт

6Мон таго неинь менель ёжова ливтиця ангел. Сон кандсь пингеде пингень Кенярксов куля, конань сон яволявтызе мода лангонь эрицятненень, эрьва буентень, раськентень, масторонтень ды эрьва кодамо кельсэ кортыця ломантненень.7Сон виев вайгельсэ сеересь: «Пеледе Пазонь мельденть ды шнадо Сонзэ инексчинзэ! Эдь сась те шкась, зярдо Пазось суди масторлангонь эрицятнень! Сюконядо менелень, модань, иневедень ды лисьмапрянь Теицянтень!»

8Те ангелэнть мельга ливтясь омбоце ангел ды яволявтсь: «Лондадсь, лондадсь ине Вавилон ошось! Эсь ускурямосонзо сон симдинзе весе раськетнень Пазонь инекежень винадонть».

9Мельгаст ливтясь колмоце ангел ды виев вайгельсэ сеересь: «Бути кить сюконить идем ракшантень ды сонзэ чопачантень ды путнить эсест коняс эли кедьс идем ракшанть тешксэнть,10сетнеяк кармить симеме Пазонь ацирьгадомань виев, ведь марто апак човоря винадо. Те винанть Пазось Сонсь каизе Эсензэ инекежень вина кечентень. Сетнень пиштевтьсызь толсо ды лакиця палыкандалсо Пазонь ангелтнэнь ды Вирезэнть икеле.11Сынст пиштевтиця толонь качамось карми кепетеме верев пингеде пингес. Кить сюконить идем ракшантень ды сонзэ чопачантень, ды кить кандтнить идем ракшанть лемензэ тешксэнть, сынст а ули оймамост читькак, ветькак.12Теньсэ Пазонь ломантне, конат топавтыть Пазонь кармавтовкстнэнь ды кемемасо молить Иисус мельга, тердевить цидярдомас».

13Мейле мон маринь менельстэ вайгель, кона мерсь монень: «Сёрмадт: Кодат уцяскавт те чистэнть саезь сеть, конат кулыть Азоронтень кемезь!» «Алкукскак уцяскавт! – корты Пазонь Оймеялтось, – кадык сынь оймить эсест стака важодемадост, эдь паро тевест молить мельгаст».

Ине нуема

14Теде мейле мон варштынь ды неинь ашо пель, конань лангсо ашти озадо кие-бути Ломантнень Цёранть кондямо. Сонзэ прясо ульнесь сырнестэ теезь инязоронь каштаз, ды кедьсэнзэ пшти тарваз.15Таго вейке ангел лиссь Пазонь кудосто ды виев вайгельсэ сеересь пель лангсо Озадонтень: «Саик эсеть тарвазот ды нуйть! Нуема шкась сась – масторлангонь сюрось кенерсь!»16Сестэ пель лангсо Озадо аштицясь ёртызе тарвазонзо моданть лангс, ды кенерезь сюрось нуевсь.

17Вана лия ангел лиссь менелень Пазонь кудостонть, сонзэ кедьсэяк ульнесь пшти тарваз.18Ды лия ангел, кона ульнесь прявтокс толонть лангсо, лиссь алтаренть вакссто. Сон виев вайгельсэ серьгедсь пшти тарваз марто ангелэнтень: «Кучить эсеть пшти тарвазот ды пурныть винаумарень цюцькатнень винаумарькстнэстэ, эдь цюцькатне кенерсть».19Ангелэсь ёртызе тарвазонзо моданть лангс, керсинзе винаумарькстнэстэ цюцькатнень ды ёртынзе сынст Пазонь инекежень винань теема покш таркантень.20Ды винаумарень цюцькатне ульнесть тапсезь винань теема таркасонть ош ушосо. Ды вересь чадсь винань теема таркань чиренть велькска ды кепедевсь натой кильдезь лишмень панстнэнень, ды валовсь малав колмосядт вайгельбень келес.


предыдущая глава Глава 14 следующая глава