Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 11

Пазнэнь озномсто прянь ветямодо

1Тееде монь ладсо, кода монгак теян Христос ладсо.

2Мон тынк шнан, кемиця ялгат, секс, мекс тынь свал мельсэнк кирдтядо весе монь тевень-валон ды видестэ топавттадо весе се тонавтоматнень, конатнень мон максынь тенк.3Монь мелем ней ёвтамс тенк: эрьва цёра ломанентень прявтось – Христос, нинтень прявтось – мирде, Христоснэнь прявтось – Пазось.4Эрьва цёра ломанесь, кона озны эли пазмарицякс корты прянь вельтязь, теньсэ вети визьксчамас эсь прявтонзо.5Ды эрьва аваськак, кона озны эли пазмарицякс корты прянь апак вельтя, вети визьксчамас эсь прявтонзо. Сон мейсэяк а явови бреязь пря аванть эйстэ.6Истямо ладсо, бути авась а кандтни прянь вельтямо паця, сестэ кадык черензэяк нарасынзе. Ды бути авантень амазы улемс наразекс эли бреязекс, сестэ кадык вельтясы прянзо.

7Цёрантень а эряви вельтямс прянзо, секс мекс сон невти Пазонь чачонть ды Сонзэ инексчинть, авась жо невти цёранть инексчинзэ.8Эдь аволь цёрась теезь аванть эйстэ, мекевланк, авась цёранть эйстэ.9Ды аволь цёрась ульнесь теезь аванть туртов, мекевланк, авась – цёранть туртов.10Секскак авантень эряви вельтямс прянзо вана мекс: те ули мирдень азорксчи ало аштемань тешкс, ды ангелтнэнень тешкс.11Азоронть икеле, ялатеке, аваськак мезекскак а ашти цёравтомо ды цёраськак – ававтомо.12Куш авась теезель цёранть эйстэ, истя жо эрьва цёраськак чачи аванть эйстэ. Ды сынь кавонест, кода весемесь, лисить Пазонть эйстэ.13Арседеяк тынсь, мазы-амазы авантень озномс Пазонтень прянь апак вельтя?14Эдь сонсь Пазонь теевть лувоськак тынк тонавты: цёрантень кувака чертне – визьксчи,15авантень жо кувака чертне – ине мазычи. Сынь сонензэ максозь, кода вельтямо паця.16Бути киньгак ули мелезэ мартон теде пелькстамс, сенень мерян: те кевкстеманть коряс лия койть-кирдат арасть минеккак ды Пазонь весе кемикуротнесэяк.

Азоронть лемс ярсамонь колсематне

17Максан тенк лия превспутоматкак. Ансяк ней а шнатадызь тынк промксонк ютавтомаст кисэ: сынь тыненк лезэнть таркас кандыть седе ламо зыян.18Васняяк, мон маринь: тынк кемикуронь промкстнэсэ эрсить явновомат, ды аламодо кемангак тенень.19Нама, авейкеть мельтненень тынк ютксо эрявияк улемс. Истя тыненк седе неяви, кить ютксонк кемевикст.20Зярдо тынь пурнавтадо весе кемикуронек, те, нама, аволь Азоронть лемс ярсамо.21Эдь эрьвась эйстэнк ярсамсто уварды эсь ярсамодонзо, вейкенк-вейкенк апак учо. Секс вейкесь кадови вачодо, омбоцесь туи иредьстэ.22Арази тынк арась эсь кудонк, косо ярсавлиде ды симевлиде? Мекс тынь безардтядо Пазонь кемикуродонть ды покордатадо арасьчисэтнень? Мезе тень лангс ёвтамс тенк? Шнамс? Арась, тень кисэ мон тынк а шнатадызь!

Кода видестэ ютавтомс Азоронть лемс ярсамонть

23Монень максозь Сонсензэ Азоронть пельде се, мезес мон ней тынккак тонавтан: Иисус Азорось се вестэнть, зярдо миезель, сайсь кши,24ёвтась Пазонтень сюкпря, синтризе ды мерсь: «Саинк ды ярсадо, те Монь рунгом, кона тынк кисэ синтреви. Истя тейнеде мелезэнк Монь ледстнемга».25Ярсамодо мейле Сон истя жо саизе кеченть ды мерсь: «Те кечесь – Пазонть марто од вейсэньлув, кона кемекстави Монь верьсэ. Эрьваксть, зярдо карматадо эйстэнзэ симеме, тееде тень мелезэнк Монь ледстнемга».26Истя, эрьваксть, зярдо тынь ярстадо те кшиденть ды симтядо те кечестэнть, тынь пачтятадо куля Азоронть куломадо – семс, зярс Сон таго а сы.

27Истя, эрьвась, кие ярсы Азоронть кшиде ды сими Сонзэ кечестэнть эсь прянь ветязь а истя, кода эряви, се теи чумо Азоронть рунгонзо ды верензэ каршо.28Секскак кадык эрьва ломанесь сонсь васня эсь прянзо варчавтнесы, ды ансяк мейле ярсы те кшиденть ды сими те кечестэнть.29Эдь кие ярсы ды сими Азоронть рунгонзо апак лово-чарькоде, се тень эйсэ тарги эсь прянзо лангс чумондома.30Вана мекс тынк ютксо ламо лавшот ды сэредицят, ды кулостькак уш аволь аламо.31Бути минь минсь, васняяк, варчавтневлинек-онкстневлинек эсь прянок, сестэ Азорось минек аволимизь чумондо.32Бути Азорось минек ялатеке чумонды, теньсэ Сон путы минек виде ки лангс. Теньсэ Сон вансты минек меельце судонть эйстэ весе масторлангонть марто.33Истя, кемиця ялган, зярдо вейсэ пурнавтадо Азоронть лемс ярсамос, учодо вейкенк-вейкенк.34Бути кие вачо, кадык икелевгак ярсы кудосо. А эряви теемс тынк промкстнэнь эстенк чумондомакс. Весе лия тевтнеде максан превспутомат сестэ, зярдо мон сан тыненк.


*а 11:21 увардомс – жаднойстэ ярсамс; обжираться


предыдущая глава Глава 11 следующая глава