Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЕТРАНЬ ОМБОЦЕ СЁРМАЗО

Глава 2

Кенгелиця тонавтыцят

1Кода Израилень ломантнень ютксо ульнесть кенгелиця пазмарицят, истя тынк ютксояк кармить улеме кенгелиця тонавтыцят. Сынь салава совавтыть кемикурос ёмавтыця-манчиця тонавтомат ды мик ёртыть-кадыть эсест Христос Кирдицянть, кона идинзе-раминзе олячис. Теньсэ сынсь таргить эсест лангс куроконь ёмамо.2Ды ламот кармить молеме сынст визьксэнь эрямост мельга, ды лиятнеяк сынст кувалт кармить сялдомо-покордамо видечинь кинть.3Неть апештевикс ломантне кармить тынк лангсо пряст сюпалгавтомо эсест понавт-кодавт манчемань ёвтнемасост. Ансяк Пазонь судось сынст туртов умок анокстазь, сон шканть а таргасы, ды сынст ёмамоськак уш а кирдеви.

4Эдь Пазось эзинзе жаля пежетьс празь ангелтнэньгак, конатнень Сон ёртынзе тоначинь чопода отьмас, косо сынь тертязь учить судонь чинть.5Сон эзизе жаля мик кезэрень масторлангонтькак. Сонзэ нулгодьксэв ломанензэ лангс Сон кучсь инечады. Теке марто Сон ванстызе ансяк Ноень, видечинь пачтицянть, ды сисем лиятнень.6Пазось судинзе ёмамос Содом ды Гоморра оштнэнь, толсо пултынзе сынст куловокс. Истя Сон невтизе сыця шкань нулгодькс тевень теицятненень: сынст мартояк карми улеме истя жо.7А вана Сон идизе видечинь коряс эриця Лотонь, кона вельть сизесь койтеме ломантнень визькс мелень топавтомадост.8Неть ломантнень ютксо эрямсто те паро ломанесь несь ды марясь эрьва чистэ сынст апаро тевдест. Секс сонзэ виде оймесь пиштсь ды сэредсь.9Истямо ладсо, Азорось соды, кода идемс видечинь коряс эрицятнень варчавтнематнень эйстэ, ды кода судонь чинть самс апаро ломантнень кирдемс чумост пандоманзо туртов.10Азорось пек кежей сетнень лангс, конатне топавтыть эсест рунгонь визькс мелест ды мезекскак а ловить Пазонть азорксчинзэ.

Кенгелиця тонавтыцятнень пежетест

Неть кенгели тонавтыцятне визькстэметь-акирдевицят, эсь мелест топавтыцят ды а виздить-а пелить сялдомс-амбамс мик менелень вийтненьгак,11куш натой ангелтнэяк, конат сындест кеметь ды виевть, а сялдыть-амбить эйсэст Азоронть икеле.12Неть ломантне сёвныть-покордыть сень, мезенть а чарькодить. Сынь молить превтеме ракша ёнов, конат эрить эсь чачома обуцяст коряс ды чачозь тень кисэ: улемс кундазь ды чавозь. Идем ракшатнень ладсо сыньгак улить маштнезь-чавнозь.13Весе чумонть кисэ, конань сынь тейсть лиятненень, максови тенст чумонь пандома. Сынь витнить-петнить седеест, зярдо чинь куншкане тейнить минень-сюнонь ярсамкат-симнемкат ды пряст лангсо стякшномкат. Сынь нулгодькст ды визьксчамат, ды сыненст мельспаро, зярдо мартонк вейсэ ярсамсто-симемстэ манчить эйсэнк.14Авань неемстэ сынст сельмест палыть визьксэнь мельсэ, ды зярдояк сынь а пештевить пежеттенть. Сынь манчить-кундсить аволь кеме ойметнень. Сынст седеест тонадсть эрьва мезе мельга правтомас. Сынь сюдозь ломанть!15Сынь пурдасть виде кинть лангсто ды кадовсть-тапавсть. Сынь тусть Валаамонь, Босоронь цёранзо, киява: сонензэ вечкевсь манчемань кисэ питнень саемась.16Пазось жо пежетензэ кисэ сонзэ ливтизе лангс. Осёлозо, кортамо а маштыця ракшась, кортазевсь ломанень вайгельсэ ды лоткавтызе пазмарицянть превтеме тевензэ.

Кенгелиця тонавтыцятне судязь

17Неть ломантне теке ведтеме лисьмапрят, сумборя сувонь пельть, конатне пансевить виев вармасо. Сыненст анокстазь пингеде пингень тунь чопода отьма.18Эдь сынь каштангалить стяко прянь шнамосо, сынь таргить-кундсить рунгонь визькс ды аванькс мелест топавтомас сетнень, кить ансяк кармасть явомо манчемасо эрицятнень эйстэ.19Неть кенгели тонавтыцятне алтыть тенст олячи, куш сынсь – прамос-ёмамос ветиця эрямокоень уреть. Эдь ломанесь сенень уре, мезесь сонзэ изнизе.20Минек Иисус Христос Азоронть ды Идицянть содамонзо-чарькодеманзо кувалт неть ломантне туевкшнесть олячис те масторлангонть аваньксчинзэ эйстэ. Бути сынь мейле таго тапавсть теке аваньксчинтень ды ваясть эйзэнзэ, сестэ сынст эрямост кармась улеме седеяк берянь икеленсенть коряс.21Сыненст седе паро улевель допрок а чарькодемс видечинь кинть. Ней сыненст седеяк берянь чарькодемс сонзэ ды ялатеке велявтомс иневанькс кармавтовксонть эйстэ, кона сыненст максозель.22Сынст марто алкукс теевсь се, мезе ёвтазь неть валмеревкстнэсэ: «Кискась сы мекев эсь уксновксонзо лангс» ды «Шлязь тувось таго моли экшелямо рудазс».


предыдущая глава Глава 2 следующая глава