Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 15

Апостолтнэнь ды кемикуронь ветицятнень промксось Ерусалимсэ

1Иудеясто Антиокияв састь ломанть, конат кармасть тонавтомо кемицятнень: «А карминдерятадо киськепень керявтомо Моисеень кармавтоманзо коряс, тынь а идевтядо».2Мельтне явовсть, Павол ды Варнава пелькстазь сёвнозевсть Иудеясто сазь ломантнень марто. Окойники, састь ве мельс: Паволнэнь ды Варнаванень зярыя лия кемиця марто молема те тевенть коряс Ерусалимев апостолтнэнень ды кемицянь куронь прявтнэнень.3Кемицянь курось ильтинзе сынст ки лангов. Сынь ютасть Финикиянь ды Самариянь трокс ды ёвтнесть эрьва кува, кода велявтсть Пазонтень лия раськенсетне. Те кулясь кандыль кеняркс весе кемицятненень.4Вана сынь пачкодсть. Ерусалимень кемицянь курось, апостолтнэ ды кемикуронь прявтнэ сынст вастызь паро мельсэ. Павол ды Варнава ёвтнизь весементь, мезе Пазось тейсь-топавтсь сынст вельде ды кода Сон панжизе кемемас кенкшенть аволь еврейтнененьгак.5Кемицятне, конат ульнесть фарисейтнень ютксто, стясть ды мерсть: «Ней лия раськенсетненень теема киськепень керявтома, ды эряви вешемс пельдест Моисеень Коенть топавтоманзо».

6Апостолтнэ ды кемикуронь прявтнэ пурнасть вейсэнь промкс те кевкстеманть ваномга.7Кувака кортамотнеде мейле Петра стясь ды мерсь: «Кемиця ялгат, тынь содатадо, Пазось юткстонок умок кочкимим монь лия раськень ломантнень туртов Кенярксов кулянть пачтямо. Кадык марясызь сынь те кулянть монь кургсто ды совить кемемас.8Пазось, кона содасынзе ломантнень седеест, невтизе лия раськенсетненень Эсь паро мелензэ, зярдо казизе тенст Иневанькс Оймеялтонть истя жо, кода миненеккак.9Сон эзинзе яво сынст минек эйстэ мейсэяк, ды кемеманть вельде ванськавтынзе сынст седеест!10Мейс эно тынь снартневттядо-варчавтнетядо Пазонь цидярдоманть, зярдо путтадо кемицятнень кирьгас истямо ашко, кона эзь кандовкшно минек покштятненень, а кандови миненеккак?11Минь кемтяно: Иисус Христос Азоронть чанстензэ вельде минь идевтяно, кода идевить сыньгак».

12Сестэ чатьмонезевсь весе промксось, весе кунсолость Варнавань ды Паволонь, конат ёвтнесть, кодат дивань тевть ды тамашат Пазось тейсь сынст вельде лия раськенсетнень ютксо.13Зярдо сынь прядызь ёвтнемаст, сайсь вал Яков. Сон мерсь: «Кемиця ялгат, кунсоломизь.14Симон ёвтнесь миненек, кода Пазось васенцеде невтизе мелявксонзо лия раськенсетнеде ды кода кочкась Эсензэ туртов ломанть сынст ютксто.15Истя жо кортыльть весе неть тевтнеде пазмарицятнеяк Пазонь пельде Сёрмадовкссонть:16
“Мейле Мон сан мекев
ды одов кепедьса Давидэнь каладозь кудонзо,
одс тейса ды витьса сень, мезесь тосо яжазель.
17Кадык вешнесызь Азоронть весе лия ломантне ды раськетне,
конатнень Мон кочкинь Эсень туртов.
Истя корты Азорось, конась теи весе тень.
18Пазось соды Эсензэ тевтнеде пингетнень ушодомадо икеле”».
19Яков поладсь: «Секс, монь койсэ, миненек а эряви тейнемс стакачить лия раськенсетнень туртов, конат арсить самс Пазонтень.20Мекевланк, миненек сёрмадома тенст сёрмасо, мезде эряви кирдевемс: ярсамопельде, конась кандозь казнекс аволь алкуксонь пазнэнь ды секскак теевсь аваньксэкс; усксевемадо, сывельде, конастонть апак нолда вересь, ды верде, ды лиянень а эряви теемс сень, мезе а эряви теемс эстеть.21Эдь Моисеень Коесь пачтяви ды ловнови вайгельсэ эрьва ошонь синагогасо эрьва оймсема чистэ пек умонь шкатнестэ саезь».

Апостолтнэнь промксонь сёрмась лия раськень кемицятненень

22Теде мейле апостолтнэ ды кемикуронь прявтнэ весе кемицятнень марто сайсть мель кочкамс эсест ютксто зярыя ломанть ды сынст кучомс Павол ды Варнава марто Антиокияв. Сынь кочкизь Иудань, конанень лиякс мерильть Барсаба, ды Силань. Неть кавтотне ульнесть кемицятнень ютксо ветицякс.23Мартост макссть сёрма, косо сёрмадозель: «Минь, апостолтнэ ды кемикуронь прявтнэ ды весе тынк кемиця ялгатне, кучтано шумбракстнемат тыненк, Антиокиянь, Сириянь ды Киликиянь кемицятненень, конат лия раськенсетнестэ велявтсть Пазонтень.24Миненек пачкодсть кулят, келя, тыненк састь таго-зяро минек кемикуронь ломанть, конатнень минь эзинек кучне. Сынь талакавтыдизь тынк ды кавтолдовтызь ойменк эсь кортамосост керявтомадо ды Коень топавтомадо кортазь.25Секскак минь пурнавинек вейс ды саинек мель кочкамс зярыя ломанть ды сынст кучомс тыненк минек вечкевикс Варнава ды Павол марто,26конат весе эсь эрямост путызь важодемантень Иисус Христос Азоронть туртов.27Истя минь кучтано тенк Иудань ды Силань валсо кемекстамо минек сёрмадовксонть.28Иневанькс Оймеялтось ды минь сынек ве мельс: а стакалгавтомс тынк канстонк мейсэяк, ансяк эрявикс вешематнеде башка:29Кирдеведе аволь алкуксонь пазнэнь казнекс кандозь ярсамопельде, верде ды сывельде, конастонть апак нолда вересь, ды усксевемадо, ды лиянень а эряви теемс сень, мезе а эряви теемс эстеть. Эрядо неть кармавтовкстнэнь коряс, ды ули тенк паро. Уледе шумбрат!»

30Кучозтне пачкодсть Антиокияв. Тосо сынь пурнызь кемицянь куронть ды максызь сёрманть.31Ломантне ловнызь сонзэ ды кенярдозевсть те седеень оймавтыця кулянтень.32Иуда ды Сила сынсь ульнесть пазмарицякс, ды эсест кортамосост оймавтызь ды кемекстызь кемиця ялгаст.33Сынь ютавтсть тосо зярыя шка. Мейле кемицятне ёвтасть сыненст седейоймамонь валт ды ильтизь апостолтнэнень.34Сила, ялатеке, сайсь мель кадовомс тоско, Иуда мурдась Ерусалимев.35Павол ды Варнава кадовсть зярс Антиокияс, ёвтнесть Кенярксов кулянть ды ламо лия ломантнень марто пачтясть Азоронь валонть.

Паволонь ды Варнавань ютксо пелькстамось

36Зярыя шкань ютазь Павол мерсь Варнаванень: «Адя, таго содавтсынек кемиця ялгатнень весе оштнэва, косо тонавтынек Азоронь валонтень, ды вансынек, кода сынь пряст марить».37Варнава саиксэлизе мартонзо Иоаннонь, конанень лиякс мерильть Марк.38Ансяк Павол ловсь: а эряви саемс сень, кона сынст кадынзе Памфилиясо ды эзь моле мартост вейсэнь тевентень, конань тееме сынь кучозельть.39Тень коряс сынст ютксо лиссь пси пелькстамо, ды сынь явсть вейке вейкедест. Варнава саизе Марконь ды мартонзо венчсэ тусь Киправ.40Павол кочкизе ялгакс Силань. Кемиця ялгатне ильтизь сонзэ Пазонь ванстома марто, ды сон тусь ки лангов.41Павол якась Сириява ды Киликиява, косо кемекстась кемицянь куротнень.


предыдущая глава Глава 15 следующая глава