Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЭФЕС ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 1

1Павол, Пазонть мелензэ коряс Иисус Христосонь апостолось, кучи шумбракстнемат Пазонь ломантненень, конат эрить Эфессэ ды ванстыть Христос Иисуснэнь кемемачист.2Улезэ тенк чансть ды седейоймамо Пазонть, минек Тетянть пельде, ды Иисус Христос Азоронть пельде!

Иисус Христос вельде казезь Пазонь чанстямотне-баславамотне

3Улезэ шназь-чанстязь минек Иисус Христос Азоронть Пазозо ды Тетязо! Сон менель лангсто чанстимизь-баславимизь минек оймеялтонь весе чанстямотнесэ. Тень Сон теизе Христос марто минек вейсэндямонть вельде.4Мирэнть-масторонть теемадо икеле Пазось кочкимизь минек Христос марто вейсэндямонть вельде. Истя минь ультяно Сонензэ алтазекс ды асатыкстэмекс-ачумондовицякс Сонзэ икеле вечкемасо.5Сон истя жо, уш икеле, аравтымизь минек улемс Сонзэ эйкакшокс Иисус Христос вельде. Вана истямо Сонзэ паро мелезэ ды арсемазо.6Эрьга, шнасынек Сонзэ ине чанстензэ-седеймарямонзо кисэ, конатнесэ Сон сюпавсто казимизь вечкевикс Цёранзо вельде!

7Христосонь веренть вельде, Сонзэ марто вейсэндямонть вельде, минь идезь-рамазь олячис, лиякс, нолдазь пежетенек. Истямо певтеме покш Сонзэ чанстесь!8Те чанстенть Пазось валызе минек лангс чудикерькссэ эрьва кодамо превейчисэ ды содамочисэ.9Сон панжизе миненек Эсь салавань арсеманзо, конань Сон Эсензэ паро меленть коряс уш икелев путызе-ладизе топавтомс Христос вельде.10Те арсемась, конань Пазось карми топавтомо, зярдо сы шкась, вана кодамо: вейсэндямс весементь, мезе ули моданть лангсо ды менеленть лангсо, ды максомс Христосонь кедь алов.11Христос вельде миненек максозь уцяска улемс Пазонь кочкавт ломанекс. Те уш икелев ульнесь аравтозь миненек Пазонть арсеманзо коряс, кие весементь топавты Эсензэ мелензэ ды путоманзо коряс.12Секс миненек, кить васенцекс кармасть нежедеме Христос лангс, эряви эрямс Пазонь инексчинть шнамонзо кисэ.

13Тыньгак маринк видечинь валонть, Кенярксов кулянть, конань вельде тынь идезтядо. Ней тынь кемтядо Христоснэнь, ды Сонзэ вельде Пазось максызе тыненк Эсь тешксэнзэ, алтазь Иневанькс Оймеялтонть.14Те Оймеялтось ашти минек туртов алтазь уцясканть кемекстамокс. Оймеялтось истя жо кемевти: Пазось олякстомтсынзе Эсь ломанензэ, Сонзэ инексчинть шнамонзо кисэ.

Паволонь озномазо

15Вана секс монгак, зярдо маринь Иисус Азоронтень тынк кемемадонк ды Пазонь весе ломантнень вечкемадонк,16апак лотксе ёвтнян сюкпря Пазонтень тынк кисэ, мельс ледстнян тынк эсень озноматнесэ.17Кадык минек Иисус Христос Азоронть Пазось, инексчинь Тетясь, кази тыненк превс совавтыця Оймеялт, конась панжсы тенк, кода содамс-чарькодемс Сонзэ.18Кадык Пазось валдомтсынзе седеенк сельмензэ. Сестэ тынь несынк, кодамо седеень нежедемас Сон тынк тердидизь, кодамо сюпав ды мазый се алтазь уцяскась, конань тынь явсынк Сонзэ ломантнень марто,19ды кодамо аонкставиця покш Сонзэ виесь, кона максозь миненек, Христоснэнь кемицятненень. Вана те – се ине виесь,20конань вельде Пазось кулозьстэ вельмевтизе Христосонь ды озавтызе Сонзэ менель лангсо Эсь вить кедензэ ёнов.21Тосо Сон ашти седеяк сэрейстэ весе прявтнэде ды азорксчитнеде, вийтнеде ды ветицятнеде. Сонзэ лемезэяк сэрейде сэрей весе ёвтавиця лемтнеде, аволь ансяк неень шкане, истя жо сыця шкастояк.22Ды Пазось весементь путызе Христосонь пильге алов ды аравтызе Сонзэ, весеме лангсо Азоронть, Кемикуронть прякс.23Кемикурось жо – Христосонь рунгозо ды Сонзэ пешксечизэ, кие Эсензэ эйсэ пешти весень ды весементь.


предыдущая глава Глава 1 следующая глава