Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 1

1Павол, кона Пазонть мелензэ коряс тердезь Иисус Христосонь апостолокс, ды Состен, кемиця ялгась,2кучить шумбракстнемат Коринф ошсо Пазонь кемицянь куронтень, сетненень, конат Христос Иисус вельде алтазь Пазонтень ды тердезь улемс ансяк Пазонь ломанекс. Истя жо кучтано шумбракстнемат весе сетнененьгак, конат тердить лездыцякс минек ды сынст Азоронть, Иисус Христосонь, косо сынь иляст эря.3Чансть ды седейоймамо тенк Пазонть, минек Тетянть, пельде ды Иисус Христос Азоронть пельде.

Павол шны Пазонть

4Мон свал ёвтан сюкпря монь Пазонтень тынк кисэ, се чанстенть кисэ, конань Сон максызе тыненк Христос Иисус вельде.5Эдь Сонзэ вельде Пазось сюпалгавтыдизь тынк эрьва мейсэ: эрьва кодамо валсояк ды эрьва кодамо содамочисэяк.6Христосто кулясь домкасто кемекставсь тынк ютксо.7Секс тынк арась асатыксэнк Оймеялтонь кодамояк казнесэ, зярдо учотадо минек Иисус Христос Азоронть велявтоманзо.8Сон кемекстатадызь тынк педе пес: истямо ладсо тынь ультядо а чумондовицякс минек Азоронть Иисус Христосонь омбоцеде само чистэнть.9Кеместэ кирди валонзо Пазось, кона тердидизь тынк вейсэндямос Эсь Цёранзо, минек Азоронть, Иисус Христос марто.

Явновоматне кемикуросонть

10Энялдан тенк, кемиця ялгат, минек Азоронть Иисус Христосонь лемсэ: уледе вейкенк-вейкенк марто ладямосо тевсэяк, валсояк. Иляст уле юткованк явновомат-пелькстамот! Кадык тынк вейсэндятадызь вейкеть мельтне-превтне, ды вейкеть арсематне!11Мон жо маринь Клоянь ломантнень пельде: тынк ютксо, кемиця ялган, молить пелькстамот.12Мон кортан вана мезде: веенстнэ юткстонк кортыть: «мон – Паволонь», лиятне: «мон Аполлосонь», «мон Кефань» эли «мон Христосонь».13Мезе те истямось?! Нать Христос явовсь пельксэнь пелькс? Нать Павол кулось крёст лангсо тынк кисэ? Нать тынь нававтозь Паволонь лемс? Нама, те аволь истя.

14Сюкпря Пазонтень, мон эзинь нававто киньгак тынк эйстэ, Криспте ды Гайде башка.15Секскак киньгак арась тувталозо кортамс: мон нававтыдизь монь мельга молицякс.16Нама, истя жо мон нававтыя Стефанасоньгак кудораськензэ марто. Лиянь киньгак нававтынь эли эзинь, мельсэнь а ашти.17Христос жо монь кучимим Кенярксов кулянть пачтямо, аволь нававтомо. Сонзэ а эряви пачтямс ломанень превейчинь кельсэ-валсо. Лиякс ёмавтови Христосонь крёстонть виезэ.

Христос – Пазонь вий ды превейчи

18Крёст лангсо кулозденть кулясь – те превтемечи сеть ломантненень, конат молить ёмамонь киява. Миненек жо, конат молить идемань киява, те кулясь – Пазонь вий.19Пазонь пельде Сёрмадовкссонть ёвтазь:
«Мон ёмавтса превейтнень превейчист,
ды Мон маштса чарькодицятнень чарькодемаст».
20Сестэ, косо ней неть превейтне? Косо неть содыцятне? Косо те масторлангонть домкасто арсицятне-кортыцятне? Арази Пазось эзизе невте: масторлангонть превейчись – те превтемечи?21Эсь превейчисэнзэ Пазось тейсь истя: ломантненень эсь превейчист вельде эзь панжово-чарькодеве Пазось. Секс Сон кочкинзе идемс кемицятнень се “превтемечинь” кулянть вельде, конань минь пачтятано.22Еврейтне вешить тамашань тешкст, гректне вешнить содамочить.23А вана минь пачтятано куля крёст лангс вачкодезь Христосто. Те кулясь еврейтненень – покордамо, гректненень – превтемечи.24Ансяк сетненень, конатнень тердинзе Пазось, кода еврейтнень, истя гректненьгак, Христосось – те Пазонь вий ды Пазонь превейчи.25Мезесь сыненст неяви Пазонь “превтемечикс”, се пек седе превей ломанень превейчиденть, ды Пазонь “лавшочись” – пек седе виев ломанень вийденть.

26Кемиця ялгат, ледстинк мелезэнк, кодамокс тынь ульниде сестэ, зярдо тынк ансяк тердидизь Пазось. Аламот тынк ютксто ульнесть, ломанень вановтонь коряс, превейть, аламот ульнесть виевть-лововикст ды чачозь содавикс кудораськестэ.27Тень таркас Пазось кочкизе сень, мезесь, ломанень вановтонь коряс, ловови превтемекс. Теньсэ Сон вети визьксчамас те масторлангонь превейтнень. Пазось кочкизе сень, мезесь ловови лавшокс. Истя жо теньсэ Сон вети визьксчамас те масторлангонь виевтнень.28Пазось кочкинзе сетнень, конат, ломанень вановтонь коряс, лововить покордазекс, алововиксэкс ды аэрявиксэкс. Сон тейсь истя вана мекс: теемс чаво таркакс сень, мезенть масторлангось лови эрявиксэкс.29Истямо ладсо, кадык вейкеяк ломань а шны прянзо Пазонть икеле!30Эдь те Сон сюлмидизь тынк Христос Иисус марто, конань Сон теизе минек туртов превейчикс! Сонзэ вельде минь ловозь чумовтомокс Пазонть икеле, алтазь Сонензэ ды идезь-рамазь олячис.31Истямо ладсо топавтови Пазонь Сёрмадовкссо ёвтазесь:
«Кинь ули мелезэ шнамс эсь прянзо,
кадык шнасы Азоронть эйсэ!»


предыдущая глава Глава 1 следующая глава