Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 26

Паволонь идема валозо Агриппань икеле

1«Тонеть максови вал эсь прят идемга», – яволявтсь Агриппа. Павол кепедизе кедензэ ды кармась кортамо:2«Агриппа инязор! Мон лован эсь прям уцяскавкс: монень течи максозь тонь икеле ёвтамс идема вал еврейтнень чумондомаст каршо.3Эдь тон вадрясто содасыть еврейтнень весе коест-кирдаст ды пелькстамо кевкстемаст. Секскак энялдан: кунсоломак мелень явозь.

4Еврейтне парсте содасызь весе эрямо ким. Од пингестэ саезь мон свал эринь эсень раськенть ютксо Ерусалимсэ.5Сынь умок монь содасамизь ды улиндеряй мелест, сынь ёвтасызь, кода мон эринь фарисеекс, лиякс меремс, топавтынь минек кемемань сехте казямо койтнень-кирдатнень.6Ней вана мон аштян суд икеле сень кис, мекс кеман-нежедян Пазонть алтамонзо лангс, конань Сон максызе минек покштятненень-тетятненень.7Самай теке алтамонть топавтовоманзо учозь, минек раськень кемгавтово буеть-кант чинек-венек седейшкава озныть-сюконить Пазонтень. Те кемеманть-нежедеманть кисэ, Агриппа инязор, еврейтне течи эйсэнь чумондытькак!8Мезень кувалма весе тыненк маряви акемевиксэкс истямо тевесь: Пазось вельмевти кулозтнень?

9Монгак икеле ловилинь: эряви тюремс весе вийсэ Назаретэнь Иисусонь каршо.10Истя мон тейниньгак Ерусалимсэ. Попонь покштнэнь пельде максозь азорксчисэнть, мон озавтнинь пекстамо кудова Пазонь ламо ломанть, ды зярдо кучильть сынст куломас, монгак максылия вайгелем тень кисэ.11Мон ламоксть пиштевтилинь эйсэст синагогатнесэ, кармавтылинь Иисусонь сялдомо-покордамо. Мон кирдинь лангозост истямо кежбеке, яксинь пансемест, натой, минек масторонь томбале оштнэваяк».

Павол ёвтни Христос марто вастомадонзо

12«Весть теке тевенть коряс мон туинь Дамаск ошов, попонь покштнэнь пельде максозь азорксчинть ды кармавтовкстнэнь марто.13Ки лангсо, чинь куншкане, инязор, мон неинь менельстэ валдо, кона сияждсь чиденть валдосто. Сон валдомтымим монь ды мартон молицятнень.14Весе пракшность мода лангс, ды мон маринь вайгель, кона мерсь монень евреень кельсэ: “Савла, Савла! Мекс тон пансят Эйсэнь? Стака теть молемс пшти сялгонть каршо”.15Мон кевкстия: “Тон кият, Азоро?” – “Мон Иисусан, конань тон пансят”, – мерсь Азорось.16“Стяк. Мон аравтытинь Монень важодицякс ды ёвтницякс седе, мезе тон ней Мондень неить ды икелепелевгак неят, зярдо Мон лисян икелеть.17Мон идетян тонь эсь раськеть ды лия раськенсетнень кедьстэ, конатненень кучан эйсэть.18Тон панжсыть сельмест, велявтсыть чоподастонть валдонтень, Сатанань кедензэ алдо Пазонтень. Монь эйс кемемаст кувалма улить нолдазь-простязь сынст пежетест, ды карми улеме тенст тарка-талика Пазонь кочкавт ломантнень ютксо”».

Павол ёвтни эсензэ тевде

19«Секскак, Агриппа инязор, мон эзинь молевть менельстэ кучозь неявксонть каршо.20Мон пачтинь Кенярксов кулянть васняяк Дамаск ошсо, мейле Ерусалимсэ, Иудеясо ды лия раськетнень ютксояк. Мон тердинь весень кадомс пежетест, велявтомс Пазонтень ды невтемс тевсэ эсь янксемаст-велявтомаст.21Секс еврейтне кундымизь Пазонь кудосо ды маштыксэлимизьгак.22Ялатеке Пазось течис монень лезды, ды нейгак мон аштян тесэ ды ёвтнян видестэ весе ломантненень, содавикстнэнень ды асодавикстнэнень. Мон кортан ансяк седе, мезде икелев ёвтасть пазмарицятне ды Моисей.23Сынь сёрмадсть: Пазонь кучовт Идицянтень сави пиштемс ды васенцекс кулозьстэ вельмемс. Сон пачтясы идемань валдочинть Эсь раськенстэнь ды лия раськетнененьгак!»

24Зярдо Павол ёвтыль идема валонзо, Фест верьга вайгельть серьгедсь: «Тон превстэ лисить, Павол! Ламонь содамось тонь пачтинзеть превстэ лисемас!»25Павол тень каршо мерсь: «Вечкевикс ине Фест, мон превстэ эзинь лисе. Монь валон видеть ды ёвтазь валдо превсэ.26Агриппа инязорось весементь тень содасы, секс мон апак пеле кортан сонензэ тень эйстэ. Мон содан, мезеяк сонзэ эйстэ арасель кекшезь, эдь весе те теевсь аволь анеявикс таркасо.27Тон, Агриппа инязор, кемат – а кемат пазмарицятненень? Мон содан – кемат».28Агриппа мерсь: «Тон, паряк, арсят моньгак курок теемс христианокс?»29Павол мерсь каршонзо: «Курок эли а курок, мон ознан Пазонтень тонь кисэяк, весень кисэяк, кить течи кунсолыть эйсэнь: теевлиде монь кондямокс – ансяк неть тертнеде башка!»

30Зярдо сон ёвтызе тень, инязорось стясь, мартонзо стясть ошонь прявтось, Вереника ды весе, кить ульнесть мартост тосо.31Сынь лиссть, эсь ютковаст истя кортазь: «Те ломанесь эзь тее мезеяк, мезень кисэ сонзэ эряволь пекстамс тюрьмас эли куловтомс».32Агриппа мерсь Фестнэнь: «Те ломанесь, нама, олякстомтомаль, бути а вешевель сон кесарень суд». Секс прявтось кучизе сонзэ кесарентень.


предыдущая глава Глава 26 следующая глава