Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 19

Павол Эфессэ

1Се шкастонть, зярдо Аполлос ульнесь Коринфсэ, Павол, пандов таркатнень ютамодост мейле, сась Эфесэв. Тосо сон вастовсь зярыя кемиця марто.2«Тынк лангс валовсь Иневанькс Оймеялтось, зярдо кармиде кемеме Иисуснэнь?» – кевкстинзе Павол. «Кодамояк Иневанькс Оймеялтто минь эзинек марсеяк», – мерсть тонат.3Сестэ Павол кевкстинзе: «Эно кодамо нававтомасо-лемдемасо тынь нававтозь?» «Иоаннонь нававтомасонть», – мерсть сынь.4Павол мерсь: «Иоаннонь нававтомазо ульнесь пежетнень эйстэ велявтомань нававтомакс. Сон тердсь Израилень ломантнень кемемс сенень, кинень самаль сонзэ мельга: Христос Иисуснэнь».5Зярдо кемицятне теде марясть, сынь нававтызь пряст Иисус Азоронть лемс.6Ды зярдо Павол путынзе эрьвань пряс кедензэ, Иневанькс Оймеялтось валгсь лангозост, сынь кармасть кортамо лия кельсэ ды пазмарицянь валсо.7Весемезэ эйстэст ульнесь кемгавтовошка ломань.

8Павол тонавтсь синагогасонть пецек колмо ковт, апак пеле кортнесь тосо ломантнень марто Пазонь Инязорксчиденть ды снартнесь совавтомс эйсэст кемемас.9Ялатеке конат-конат кевензавтызь седеест ды эзть сае кемемань мель, весемень икеле сёвность Азоронть кинзэ. Сестэ Павол нетнень кадынзе. Сон явинзе эйстэст кемицятнень ды чистэ чис тонавтсь сынст Тиранонь тонавтома кудосонть.10Истя мольсь кавто иень перть. Секскак Асиянь весе эрицятне, кода еврейтне, истя гректнеяк, маризь кулянть Иисус Азородонть.

11Пазось тейнесь Паволонь вельде эрьва кодат тамашат.12Истя Паволонь лангсто сайнильть ливезь пацинетнень ды важодема икельгапацятнень, путнильть сынст сэредицятнень лангс ды теде пиштицятнень ормаст ютыльть, апаро оймеялтнэяк лисильть эйстэст.13Сестэ евреень конат-конат оймеялтонь якиця-пакиця пансицятне кармасть ледстнеме Иисус Азоронь лементь апаро оймеялтсо колазтнень шумбралгавтомга. Сынь кортнесть: «Кармавттано тенк Иисусонь лемсэ, конадо ёвтни Павол: лиседе те ломаньстэнть!»14Истя тейсть евреень Скева попонь покшонть сисем цёранзояк.15Ансяк апаро оймеялтось тень каршо мерсь тенст: «Иисусонь содаса, Паволонь коряскак марсинь, а тынь кить истятнэ?»16Ды цёрась, конань эйсэ ульнесь апаро оймеялтось, каявсь лангозост ды истя чавинзе, сынь мик штапо ды весе веревть менсть кудостонть.17Зярдо теде кармасть содамо еврейтне ды гректне, конат эрильть Эфессэ, сынь пек тандадсть ды Иисус Азоронть лемензэ кармасть седеяк верев кепедеме.18Сетнень эйстэ, конат кармасть кемеме, ламот сыльть ды весемень икеле видькстыльть берянь тевдест.19Ламот, конат теде икеле теильть мунямонь-орожиямонь тевть, кандылизь ве таркас мунямонь книгаст ды весень икеле пултылизь сынст. Зярдо ловизь пултазь книгатнень питнест, весемезэ лиссь ведьгемень тёжа драхмат.20Истя виевстэ сравтовсь ды кемекставсь Азоронь валось.

Эфессэ шалтось

21Весе неть тевтнеде мейле Павол, Оймеялтонть мереманзо коряс, сайсь мель молемс Македониянь ды Акайянь трокс Ерусалимев. «Ерусалимденть мейле монень эряви улемс Римсэяк», – кортась сон.22Сон кучинзе Македонияв кавто лездыцянзо, Тимофеень ды Эрастонь, сонсь жо зярыя шкас кадовкшнось Асиясо.

23Те шкане Эфессэ кепедевкшнесь покш шалт Азоронть кинзэ каршо.24Сиянь чавиця вейке гизай, лемезэ Димитрий, сиясто тейниль Артемида авапазонь вишкине озкскудынеть. Те максыль покш сюпавчи сынст тейницятненень.25Димитрий пурнынзе сынст ды те тевсэнть лия важодицятненьгак ды мерсь тенст: «Ялгат, тынь содатадо, те тевесь парсте лезды миненек.26Теке марто тынь неиде ды мариде, кода те Паволось Эфессэнтькак, весе Асиясонтькак эсензэ кортамотнесэ манчезь велявтсь ламо ломанть эсензэ кемемантень. Сон корты, келя, ломанень кедьсэ теевть пазтнэ – аволь алкуксонь пазт.27Те тандавтни аволь ансяк сень кувалма, мекс минек тевесь ёмавтсы паро лемензэ. Теде башка ине Артемиданть озкскудозо ёмавтсы питнензэ. Ды весе те прядови вана мейсэ: минек ине авапазонок, конанень сюкони весе Асиясь ды Римень весе мастороськак, ёмавтсы эсензэ инексчинзэ».

28Тень марязь, сынь весе ацирьгадсть ды кармасть рангомо: «Эфесэнь Артемидась инеде ине!»29Курок весе ошоськак лажнозевсь. Весе ломантне ёртозь ёртовсть амфитеатрав, каподизь ды ускизь мартост Паволонь ялгатнень Гаень ды Аристарконь, конат састь Македониясто.30Павол сонсь арсесь лисеме ломантнень юткс, ансяк кемицятне эзизь нолда.31Теде башка зярыя ломанть Асиянь прявтнэнь юткстояк, конат ульнесть Паволонь ялгакс, кучсть тензэ энялдома а лисемс амфитеатрав.32Те шкане пурнавозтне пачк талакадомасольть: веенст пижнесть вейке, омбонст – лия. Ламотне тунь эзть сода, мейс тей пурнавсть.33Еврейтне ломантнень ютксто ливтизь Александрань. Сон аволдась кедьсэнзэ ды бажась чарькодевтемс ломантнень, мейсэ тевесь.34Ансяк зярдо чарькодсть, сон еврей, весе кармасть ве вайгельсэ сеереме: «Эфесэнь Артемидась инеде ине!» Ды истя сынь сеересть кавтошка часонь перть.35Сестэ лиссь ошонь прявтось. Сон энгамтынзе ломантнень ды мерсь: «Эфесэнь эрицят, арази весе масторлангсонть а содыть: Эфессэ ванстови ине Артемидань озкскудось ды чачось, кона прась менельстэ?!36Тень коряс а мезть пелькстамс. Энгамодо ды эрязкалезь мезеяк илядо тее.37Неть ломантне, конатнень тынь ветинк тей, а чумот: сынь Артемидань озкскудостонть мезеяк эзть сала ды тынк авапазонтькак эзизь сялдо-покорда.38Улиндеряй Димитриень ды сонзэ ялганзо киньгак лангс чумондомаст, минек тень туртов улить судонь теемань чить ды судиця ломанть. Вейкест-вейкест лангс пеняцицятне кадык молить тов.39Улиндеряйть тынк кодаткак лия кевкстеманк, максынк ваномост раськень промксонтень, кона ютавтови коень коряс.40Ванодо, течинь тевенть кувалма аволимизь чумондо минек прявтнэнь каршо кепедевеманть кисэ. Эдь миненек стака улевель толковамс сыненст те шалтонть тувталонзо». Неть валтнэде весе пуромозь ломантне энгамсть ды тукшность эсь кудоваст.


предыдущая глава Глава 19 следующая глава