Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 12

Христос марто вейсэндязь эрямо

1Кемиця ялгат, секскак Пазонть ине седеймарямонзо кисэ энялдан тенк: максынк Пазонтень весе эсь прянк, кода эриця анокс, кона алтазь Тензэ ды тукшны Сонзэ мельс. Те улияк Пазонтень тынк оймень-седеень алкуксонь важодеманк.2Илядо эря истя, кода ней эрить те масторонть лангсо. Мекевланк, мереде Пазонтень полавтомс потмоёжонк, одкстомтомс превенк-содавксонк. Сестэ тынь чарькодьсынк Пазонть мелензэ: мезесь вадря, Сонзэ мельс туиця ды асатыкстэме.

3Пазонть пельде максозь чанстенть коряс мон кортан эйстэнк эрьвантень: илядо арсе эсь прядонк эрявикстэнть ламо. Мекевланк, арседе эсь прядонк апак покшкавтне, се кемеманть лувсо, конань Пазось максызе эрьвантень.4Эрьга, невтемакс саинк рунгонть: минек сон вейке, ансяк эйсэнзэ ламо пелькст, ды эрьва пельксэнть эсензэ тевезэ.5Истя миньгак: кадык минь ламонек, ансяк Христос марто вейсэндязь минь – вейке рунго, ды вейке-вейкенек марто сюлмавозь вейс, кода рунгонь башка пелькст.6Пазонть пельде максозь чанстенть коряс, минек эрьванть ули кодамояк казненек. Кинь ули пазмарицякс кортамонь казнезэ, се кадык ютавтсы сонзэ тевс эсь кемеманзо коряс.7Кинь ули лиятненень лездамонь казнезэ, кадык се лезды. Кинь ули тонавтыцянь казнезэ, се кадык тонавты.8Кинь ули седей мелень кемекстамо казнезэ – се кадык лиятнень кемексты, кинь максыцянь – се кадык максы сюпавсто-важовсто, кинь ветицянь – се кадык вети тевтнень мелень путозь. Кинь ули паронь теема казнезэ – се кадык паронть теи кецязь.

9Улезэ тынк вечкеманк седейстэ лисиця. Туеде зыяндонть, педядо паронтень.10Вечкеде вейке-вейкенк лелянь-сазоронь лембе вечкемасо, эстеденк пек ловодо ялганк эйсэ.11Кадык а лавшомгады тынк бажамонк паронтень; палыця седейсэ важодеде Азоронтень.12Кенярдодо – тынк ули седейнежедьксэнк, стакачитнесэ цидярдодо, апак лотксе ознодо.13Лездадо Пазонь ломантненень, зярдо сынь арасьчисэ, ды уледе свал инжень вастыцякс.14Чанстядо-баславадо тынк пансицятнень, илядо сюдо сынст, ансяк чанстядо.15Кенярдодо кенярдыцятнень марто ды авардеде авардицятнень марто.

16Эрядо вейкенк-вейкенк марто ве мельсэ. Илядо уле верьга прянь кандыцякс, эрядо ялгаксчисэ истяконь ломантнень марто. Илядо покшкавтне эсь превейчисэнк.17Киненьгак кеж кежсэ илядо пандо, тееде сень, мезесь паро весе ломантнень сельмест икеле.18Эсь ёндонк тееде весементь: эрядо ладямосо весе ломантнень марто.19Вечкевикс ялгат! Эсь кисэнк кеж илядо пандо. Кадынк те тевенть Пазонь ацирьгадомантень. Эдь сёрмадозь: «Кежень пандома тевесь – Монь, ды Мон пандсаяк, корты Азорось».20Мекевланк, тееде истя, кода ёвтазь Сёрмадовкссонть: «Бути тонь душманот вачо, андык сонзэ, бути симемазо сась, симдик сонзэ. Истя теезь, тон пурнат сонзэ пряс палыця тонолт».21Иля изняво кежентень, – изник сонзэ паросо.


предыдущая глава Глава 12 следующая глава