Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ФИЛЕМОННЭНЬ ПАВОЛОНЬ СЁРМАЗО

Глава 1

1Мон, Павол, кона ашти пекстазь Иисус Христосонь кисэ, ды Тимофей, кемиця ялгась, кучтано шумбракстнемат минек марто вейсэнь тевсэ важодицянтень, вечкевикс Филемоннэнь,2ды кемицянь куронтень, кона пурнавкшны тонь кудосо, истя жо Апфиянень, вечкевикс кемиця сазоронтень, ды вейсэнь тевень теиця минек Аркип ялгантень.3Улезэ тенк чансть ды седейоймамо Пазонть, минек Тетянть, пельде ды Иисус Христос Азоронть пельде!

Филемононь вечкемазо ды кемемазо

4Мон ёвтан сюкпря эсень Пазонтень свал, зярдо эсь озномасон ледстнян мельс тонь,5секс мекс мон маринь тонь кемемадот Иисус Азоронтень ды вечкемадот Пазонь весе ломантненень.6Ды мон ознан: кадык минек вейсэнь кемеманок лезды тонеть седе домкасто содамс-чарькодемс весе се паронть, конась тыненк максозь Христос Иисус марто вейсэндямонть вельде.7Тонь вечкемась, кемиця ялгам, монь пек кенярдовтымим ды ладсимим-кемекстымим, секс мекс тонь вельде Пазонь ломантнень седеест оймасть-виензасть.

Павол энялды Онесимень кисэ

8Христос марто вейсэндямонть кувалт монь ули вием кармавтомс тонь тееме сень, мезе эряви.9Ансяк мон ялатеке лован седе парокс пшкадемс теть энялдома марто, секс мекс вечктян тонь. Те мон, Павол, уш сыре ломанян ды ней Иисус Христосонь кисэ пекстазян,10энялдан тонеть Онесимень кисэ, кона теевсь Пазнэнь кемицякс монь вельде ды истя жо монень цёракс тесэ, пекстамо кудосо.11Зярдо-бути сон ульнесь тонеть лезэвтемекс, а вана ней сон кармась улеме лезэвекс тонетькак ды моненьгак. Мон кучса сонзэ мекев.12Тон жо вастык сонзэ кода монь седейбельксэм.13Монь ульнесь пек покш мелем кадомс сонзэ эсень марто: тонь таркас сон лездаволь монень тесэ, косо мон пекстазян Кенярксов кулянть пачтямонзо кисэ.14Ансяк монь арасель мелем теемс мезеяк тонь апак кевкстне. Кадык тонь паро тевесь ули теезь эсеть мелеть коряс, аволь вийсэ кармавтомань коряс.15Паряк, Онесим секскак ульнесь явозь тонь эйстэ зярыя шкас: улемс тензэ тонь марто теде мейле пингеде пингес.16Ней сон уш ули аволь кода уре, а уренть коряс ламодо седе питней, кода вечкевикс кемиця ялга. Сон монень пек вечкевикс, кодамо жо сестэ вечкевиксэкс сон карми улеме тонеть, кода ломань ды кода Азоронтень кемиця ялгат!

17Истямо ладсо, бути тон ловат монь вейсэнь тевень теиця ялгакс, сестэ вастык Онесимень истя, кода вастовлимик монь.18Ды бути сон тонь икеле тейсь кодамояк чумо эли ули теть кодамояк долкозо, сестэ тень ловик монь лангс.19Вана мон, Павол, сёрмадан эсь кедьсэнь: мон тень пандса тонеть. Мон уш а кортан седе: тонгак монь икеле долксат мик эсь прясот.20Истя, кемиця ялгам, ней максык монень те лезксэнть Азоронть кисэ. Кенярдовтык-оймавтык монь седеем кода Азоронтень кемиця ялга!

21Мон сёрмадан теть, секс мекс кеман: тон монь кунсолосамак. Содан, тон теят, натой, седеяк пек ламо монь вешеманть коряс.22Теде башка, анокстак монень лоткамо тарка. Мон кеман: Пазось тынк озноманк кисэ макссамам-казьсамам монь тыненк.

Меельце паро мельтне-арсематне

23Тонеть кучить шумбракстнемат Эпафрас, ялгам, кона монь марто пекстазь Христос Иисусонь кисэ,24истя жо Марк, Аристарк, Демас ды Лука, монь марто вейсэнь тевсэ важодиця ялгатне.25Минек Иисус Христос Азоронть чанстесь улезэ мартонк! Аминь.


предыдущая глава Глава 1 следующая глава