Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ФИЛИППА ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 3

Чумовтомочи Пазонть икеле

1Меельце пелев, монь кемиця ялган, кенярдкшнодо, эдь тынь эрятадо Азоронть марто вейсэндязь! Монень текень жо зярыяксть сёрмадомс тенк а стака, а вана тынк те идетядызь ламо зыянтнэде.2Ванстодо прянк апаро важодицятнеде, неть кискатнеде-пинетнеде, цёрань киськепень колсицятнеде-керсицятнеде!3Алкуксонь керявтозтне – те минь, секс мекс минь важодтяно-сюконятано Пазонтень оймеялтсо. Минь кенярдозь каштангалетяно Христос Иисус марто вейсэндямосонть ды допрок а нежедтяно неявикс койтнень-кирдатнень лангс.4Монь, нама, улевель тувталом нежедемс мик неявиксэнть лангскак. Бути кияк лия арси: сонзэ ули тувталозо нежедемс неявиксэнть лангс, сестэ монь седеяк ламо тувталон арсемс истя!5Мон керявтозян кавксоце чистэ, чачозян Израилень раськесэ, Вениаминэнь буесэ, верень коряс ванькс еврей. Евреень Коенть топавтомань коряс мон ульнинь фарисей,6важодема бажамом коряс – Кемикуронть пансиця-калавтыця. Коень максовт чумовтомочим коряс мон ульнинь асатыкстэмекс.

7Ансяк весе сень, мезенть мон икеле неинь эсень изнявксокс, мон ней лован ёмавксокс – Христосонь кисэ.8Алкукскак, мон лован ёмавксокс весементь, секс мекс мезеяк арась истямо, конась улевель Христос Иисусонь, монь Азоронть, чарькодемадонзо питней. Сонзэ кисэ мон ёмавтыя весементь ды весе тень мон ёртыя шукшпряс сень кисэ: саемс эстень алкуксонь сюпавчинть, лиякс, Христос марто вейсэндямонть.9Сестэ весе кармить содамо: мон Сонзэ ломанян. Истя монь карми улеме чумовтомочим, ансяк уш аволь се, конась саеви эсеть вийсэ, Коенть топавтома вельде. Аволь, монь ули чумовтомочим Христоснэнь кемеманть вельде, чумовтомочим, конань максы Пазось те кемеманть кисэ.10Монь мелем вейке: домкасто содамс-чарькодемс Иисус Христосонь ды се виенть, кона Сонзэ вельмевтизе кулозьстэ. Истя жо мелем явомс Сонзэ майсематнень-пиштематнень ды теевемс Сонзэ кондямокс мартонзо вейсэ куломасонть.11Сестэ карми улеме седейнежедьксэм: паряк монгак пачкодян кулозьстэ вельмемантень.

12Истя мон кортан аволь секс, буто мон уш пачкодинь пентень эли теевинь асатыкстэмекс. Мон ялатеке икелев панян прям те казненть эстень изнямонзо-саеманзо кисэ, секс мекс Христос Иисус монь уш изнимим-саимим Эстензэ.13Нама, кемиця ялгат, мон а лован, келя мон уш изния-саия те казненть. Мелем ансяк вейке: стувтомс сень, мезесь кадови удалов, ды весе вийсэ бажамс сенень, мезесь ашти икеле.14Мон налтокс ливтязь ливтян казненть мельга. Те казнесь – од эрямось, конанень Пазось минек тердимизь Христос Иисус вельде.15Лисни: весень минек, конат виевть эсь кемемасост, арсематнеяк ды мельтнеяк улест истят! А вана бути мейсэяк меленк аволь вейкеть минек марто, Пазось тыненк панжсы теньгак.16Эрьга, карматано седе товгак истя арсеме ды шаштомо те кияванть, конань ланга минь ютынек те шкаскак.

17Кемиця ялгат! Уледе весе монь ладсо теицякс! Ванодо сетнень лангс, конат теить минек максовт невтевксэнть коряс.18Эдь ламотне, конатнеде мон уш ламоксть кортакшнынь ды нейгак натой сельведь марто таго кортан, эрить, кода Христосонь крёстонть душмант.19Сынст пест – кулома-ёмамо, сынст пазост – пекест, сынь пряст шныть сеньсэ, мезде эряволь визделгалемс, сынь арсить ансяк те масторлангонть тевтнеде.20А вана минек тиринь масторонок – менель лангсо, тосто минь пек учотано минек Иисус Христос Азоронть кода Идицянть.21Сон Эсь вийсэнзэ полавтсынзе-лиякстомтсынзе минек кулыця лавшо рунготнень ды тейсынзе сынст Эсензэ пингеде пингес а кулыця рунгонть кондямокс. Те виенть вельде Сонензэ кедь алов саеви весемесь.


предыдущая глава Глава 3 следующая глава