Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 10

Корнелиень неявксозо

1Кесариясо эрясь ломань, лемезэ Корнелий. Сон ульнесь сядонь прявтокс полксо, конанень мерильть Италиянь полк.2Сонськак, кудораськензэяк ульнесть паро коень ды Пазонь мельде пелиця ломанть. Корнелий пек ламо лездась кажов еврейтненень, свал ознось Пазнэнь.3Весть чикуншкадо мейлень колмошка чассто сон неявкссо ваньксстэ неизе Пазонь ангелэнть, кона совась сонензэ кудос ды мерсь тензэ: «Корнелий!»4Корнелий пштистэ ды тандадозь варштась сонзэ лангс ды кевкстизе: «Мезе, азор-парочи?» Ангелэсь мерсь: «Тонь озноматне ды кажовтненень лезкстнэ ледсть Пазонть мельс.5Кучт ней ломанть Иоппия ошов тердемс Симононь, конанень мерить Петра.6Сон ашти инжекс кедень теиця Симононь кудосо, кона иневедь чиресэ. Сон ёвты тонеть валт, конатнень вельде идеват тонгак, весе кудораськетькак».7Кортамодо мейле ангелэсь тусь. Корнелий тердсь кавто кудоважот ды паро коень ушман, кона ульнесь сонзэ кемевикс ванстыцятнень эйстэ вейкекс.8Сон ёвтнизе тенст весементь, мезе мартонзо теевкшнесь, ды кучинзе Иоппияв.

Петрань неявксозо

9Омбоце чистэнть, зярдо Корнелиень кучовтонзо, ки ланга молезь, пачкодсть ошонть малав, Петра чикуншкане кузсь кудолато лангс озномо.10Сон вачомсь ды вешсь ярсамопель. Зярс-мейс анокстасть ярсамопель, сонензэ кучозель неявкс.11Сон несь панжадо менель ды мезе-бути сонензэ верде валгиця покштояк покш коцтонь столешникень кондямо, конань ниле педе сюлмазь нолдыльть мода лангс.12Те коцтонть лангсо ульнесть эрьва кодат ниле пильгесэ мода лангонь ракшат, идем ракшат, ёзмолдыцят ды менелень нармунть.13Ды сон марясь вайгель: «Стяк, Петра, печкить ды сэвить сынст».14«Зярдояк, Азоро!» – мерсь Петра. «Мон зярдояк мезеньгак берянде ды аванькстэ эзинь ярсне».15Сестэ вайгелесь таго гайгезевсь: «Иля мерькшне аванькс сенень, мезенть Пазось теизе ваньксэкс».16Весе те истя ульнесь колмоксть, мейле коцтось мекев кепедезель менельс.

17Зярс Петра аштесь абунгадозь ды арсесь, кодамо те неявксонть смустезэ, Корнелиень пельде кучозтне, ломанень кевкстнезь, муизь кедень теиця Симононь кудонть ды лоткасть ортанть икелев.18Сынь кармасть кевкстнеме, тесэ а тесэ Симон, конанень мерить Петра.19Те шкане Петра яла аштесь ды арсесь неезь неявкстонть. Сестэ Оймеялтось мерсь тензэ: «Вана, тонь вешнить колмо ломанть.20Стяк, валгт алов ды азё мартост апак кавтолдо, эдь те Мон сынст кучинь».21Петра валгсь алов ды мерсь Корнелиень пельде кучозь ломантненень: «Мон се, конань тынь вешнетядо. Мейс тынь сыде?»22Сынь тень каршо мерсть: «Минек кучимизь Корнелий сядонь прявтось. Сон видекоень ды Пазонь мельде пелиця ломань, весе еврейтне шныть эйсэнзэ. Пазонь кучовт ангел мерсь сонензэ тердеметь эстензэ ды кунсоломот, мезе тон ёвтнят тензэ».23Сестэ Петра сынст тердинзе кудос ды вастынзе кода инжетнень.

Петра Корнелиень кудосо

Омбоце чистэнть Петра ды Иоппиянь зярыя кемицят тусть сынст марто.24Вейке чинь ютазь сынь састь Кесарияв. Корнелий уш учось эйсэст, тердинзе малавикс раськензэ ды ялганзо.25Зярдо Петра совась кудос, Корнелий сонзэ вастызе сюконязь, мик прась пильгезэнзэ.26Петра кепедизе сонзэ ды мерсь: «Стяк, монгак ломанян».27Корнелий марто кортазь, Петра совась кудос, косо ломантнеде пурнавсть байтяк.28Петра мерсь тенст: «Тынь парсте содатадо, минек Коенек а мери евреентень лия раськень ломань марто вастневемеде ды кудозонзо совсемеде. Теке марто Пазось невтизе монень: киньгак берянекс ды аваньксэкс а ловома.29Секскак, зярдо тердимизь, мон сынь, трокс валонь апак ёвта. Ней мереде кевкстеменк: кодамо тевс мон тердезян?»

30Корнелий тень каршо мерсь: «Ниле чиде икеле мон те шкане пост кирдилинь ды ознылинь эсь кудосон, шказо ульнесь чикуншкадо мейлень колмо част. Апак учо икелень лиссь валдо оршамосо ломань.31“Корнелий”, – мерсь сон, – “Пазось маринзе озномат ды ледстинзе кажовтненень лезксэть.32Кучт эно ломанть Иоппияв Симононь мельга, конанень лиякс мерить Петра. Сон лоткась инжекс кедень теиця Симононь кудос, кона иневедь чиресэ. Сон сы ды ёвты теть”.33Мон сеске кучинь тонь мельга, ды тон парсте теить, бути сыть. Ней весе минь тесэтяно, Пазонть икеле, ды меленек ули кунсоломс весементь, мезе Пазось кармавтсь тонеть ёвтамо миненек».

Петрань кортамозо Корнелиень кудосо

34Петра кармась кортамо: «Ней мон алкукс чарькодьса, Пазось а яви ломантнень.35Пелиндеряй ломанесь Паздо, теиндеряй видечинь коряс, кодамо раськень сон илязо уле, Пазось васты сонзэ мельспаросо.36Тынь содатадо кулядонть, конань Пазось кучизе Израилень раськентень. Сон кучизе те Кенярксов кулянть седейоймамодо Иисус Христосонь вельде, конась улияк весеменень Азорокс.37Тынь содатадо сень эйстэяк, мезе лиссь весе Иудеясонть, Галилеясто саезь, нававтомадонть мейле, конас тонавтсь Иоанн.38Содасынк, кода Пазось вадизе-кочкизе Назаретэнь Иисусонь ды макссь Тензэ Иневанькс Оймеялт ды вий. Иисус якась эрьва кува, паро тевень теезь ды шумбрачинь максозь весенень, кить понгсть Идемевсень азорксчинть алов, эдь Сонзэ марто ульнесь Пазось.39Минь неицят-содыцят весементь, мезе Иисус тейсь Ерусалимсэ ды евреень весе масторонь келес. Сынь маштызь Сонзэ, чувтонь крёстос вачкодезь.40Пазось ялатеке колмоце чистэ вельмевтизе Сонзэ кулозьстэ, ды Иисус, Пазонь вийсэ-мельсэ, лиснесь ломантненень.41Сонзэ неизе аволь весе израилень раськесь, неинек ансяк минь, Пазонь кочкавт неицятне-ёвтницятне! Минь ярснинек ды симнинек Сонзэ марто седе мейле, зярдо Сон вельмесь кулозьстэ!42Сон миненек кармавтсь ёвтнемс ломантненень Паро кулядонть ды кемекстамс: Сон улияк Се, кинь Пазось путызе эректнень ды кулозтнень судямо.43Сонзэ эйстэ ёвтнить весе пазмарицятне: эрьвантень, кие кеми Иисуснэнь, нолдавить пежетензэ Сонзэ лементь вийсэ».

Лия раськень ломантнень лангс валови Иневанькс Оймеялтось

44Зярдо Петра кортась неть валтнэнь, весе сонзэ кунсолыцятнень лангс валгсь Иневанькс Оймеялт.45Петра марто сазь кемицятне, конат керявтозельть, дивсесть, мекс Иневанькс Оймеялтось валозель мик аволь еврейтнень лангскак.46Эдь сынь маризь, кода тонатне кортыть эрьва кодамо лия кельсэ ды инелгавтнить Пазонть. Сестэ Петра мерсь:47«Кинь ули виезэ кардамс неть ломантнень ведьсэ нававтомадонть? Эдь сыненст максозь Иневанькс Оймеялтось истя жо, кода миненеккак!»48Ды сон кармавтсь неть ломантнень нававтомс Иисус Христосонь лемс. Мейле сынь энялдсть Петрань икеле кадовомс мартост зярыя чис.


предыдущая глава Глава 10 следующая глава