Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ВАСЕНЦЕ СЁРМАЗО

Глава 12

Иневанькс Оймеялтонь казнетне

1Ней, кемиця ялгат, монь мелем максомс тыненк виде чарькодема Иневанькс Оймеялтонь казнетнеде.2Тынь тынсь содатадо, зярдо ульниде виде Пазонь а содыцякс, сестэ теке кодамо-бути акирдевиця вий ветнесь эйсэнк аволь алкуксонь вайгельтеме пазтнэнень.3Секскак, монь мелем парсте чарькодстемс тенк вана мезенть: бути ломаненть вети Пазонь Оймеялтось, сестэ сон зярдояк а мери: «Ульть сюдозь Иисус!» Ды ломанесь мери Иисуснэнь «Азоро» ансяк сестэ, зярдо сонзэ вети Иневанькс Оймеялтось.

4Улить чанстень эрьва кодамо казнеть, ансяк весе сынь – теке жо Оймеялтонть пельде.5Улить эрьва кодамо важодематкак, ансяк весе сынь – теке жо Азоронть.6Улить Пазонь виень эрьва кодат невтема тевтькак, ансяк весе кемицятнень вельде весементь теи-невти теке жо Пазось.7Весень лезэс Пазось эрьванть эйсэ Оймеялтонть яволявты аволь вейкетьстэ.8Вейкентень Оймеялтось максы превейчинь валт; омбоцентень теке жо Оймеялтось максы содамочинь валт;9колмоцентень теке жо Оймеялтось максы кемема. Кинень-бути теке жо Оймеялтось максы сэредицянь шумбралгавтомань казнеть;10лиянень – тамашань-дивань теема вий; лиянень – пазмарицякс кортамонь казне; лиянень – оймеялтнэнь явома. Кинень-бути максови асодавикс кельсэ кортамонь казне, а вана лиянень – неть кельтнень смустест панжома.11Весе тень теи вейке ды теке жо Оймеялтось: эрьвантень максы-яви башка казне, кода Сонзэ мелезэ.

Вейке рунгонть ламо пельксэнзэ

12Христос, кода ломанень рунгоськак, ашти зярыя башка пельксстэ. Куш рунгось теезь ламо пельксстэ, сон ялатеке вейке.13Истямо ладсо, весе минь: еврееськак ды лия раськенсеськак, уреськак ды олясоськак, – нававтозь вейке Оймеялтсо улемс вейке рунгокс. Ды весе минь симдезь вейке ды теке жо Оймеялттонть.

14Эдь рунгоськак ашти ламо пельксстэ, аволь ансяк вейкестэ.15Бути пильгесь меревель: «Мон аволь кедь, ды секс мон аволь те рунгонть пельксэзэ», арази сон сестэ а карми улеме рунгонь пельксэкс?16Бути пилеськак меревель: «Мон аволь сельме, ды секс мон аволь те рунгонть пельксэзэ», арази сон сестэ а карми улеме рунгонь пельксэкс?17Бути весе рунгось аштевель вейке сельместэ, кода сестэ сон маряволь? А бути весе рунгось – пиле, кода сестэ сонензэ чинесь-танстесь содаволь?18Пазось жо, эсь мелензэ коряс, аравтнинзе рунгосонть весе пелькстнэнь таркаваст.19Ды бути весе аштевель ансяк вейке пельксстэ, сестэ косо улевель рунгось?20Ансяк ней лисни истя: пелькстнэде ламо, а рунгось – вейке.

21Секскак, сельмесь а мереви кедентень: «Тон монень а эряват!» Ды пряськак а мереви пильгетненень: «Тынь монень а эрявтадо!»22Мекевланк, сеть рунгонь пелькстнэ, конатне миненек неявить-марявить седе лавшокс, сынь седеяк эрявикст.23Ды сеть пелькстнэ, конатне миненек неявить-марявить аволь питнеекс, сынст минь седеяк парсте тапарятано-вельтятано.24Ды амазы таркань пелькстнэнь оршавтано-кекшнетяно седеяк вадрясто, мезенть а эряви теемс мазытнень марто. Сонсь Пазось сюлминзе рунгонь пелькстнэнь эсь ютковаст истя: Сон макссь седе покш питне сеть пелькстнэнень, конатне миненек марявить седе аволь питнеекс.25Пазось истя теизе вана мекс: илязо уле рунгосонть явновома-пелькстамо, мекевланк, весе пелькстнэ вейкетьстэ мелявтовольть вейкест-вейкест эйстэ.26Бути пишти-майси вейке пелькс, сестэ мартонзо пиштить-майсить весе лия пелькстнэяк. Бути шнави вейке пельксэсь, сестэ мартонзо кецнить весе лия пелькстнэяк.

27Весе тынь вейсэ – Христосонь рунго. Эрьвась эйстэнк Сонзэ рунгонзо пелькс.28Кемикуросонзо Пазось эрьванть путызе эсь тарказонзо: васенце таркасонть – апостолтнэ, омбоцесэнть – пазмарицятне, колмоцесэнть – тонавтыцятне. Мейле молить сеть, кинень максозь вий тейнемс диват-тамашат, седе тов сетне, кинь ули шумбралгавтомань казнезэ, лезксэнь максомань, ветицякс улемань эли асодавикс кельсэ кортамонь казнест.29Арази весе апостолт? Весе пазмарицят? Весе тонавтыцят? Весе тейнить тамашат?30Арази весень шумбралгавтомань казнест? Весе кортыть асодавикс кельсэ? Эли весень ули казнест панжомс неть кельтнень смустест?31Тынь пек бажадо чанстень сехте покш казнетненень! Ды ней мон невтьса тенк сехте паро кинть.


предыдущая глава Глава 12 следующая глава