Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКОНЬ КОРЯС ЕВАНГЕЛИЯ

Глава 14

Евреень поптнэ арсить маштомс Иисусонь

1Кавто чинь ютазь улемаль евреень Инечинтень ды Ламбамсто сюкоронь покшчинтень. Попонь покштнэ ды Койс тонавтыцятне вешнесть, кода Иисусонь ёжовчисэ кундамс ды маштомс.2Сынь кортасть: «Ансяк тень эряви теемс аволь покшчистэ, иляст кепете ломантне».

3Зярдо Иисус ульнесь Бетаниясо ды ярсась Симононь кедьсэ, кона икеле сэредекшнесь проказа ормасо, тов сась ве ава алебастрань кедьге марто, конаньсэ ульнесь нардонь ванькс ды пек питней ой. Сон кедьгенть порксызе ды валызе оенть Иисусонь прява.4Конат-конат тосо ацирьгалезь кортасть эсь ютковаст: «Мезекс истя ёмсевтемс оенть?5Сонзэ миемаль колмосядт динардо, ярмактнень явшемальть пурныцянень». Ды пек покордасть аванть.

6Ансяк Иисус мерсь: «Кадынк сонзэ, мекс мелензэ колсесынк? Сон Монень паро тев тейсь.7Пурныцятне свал тынк марто, зярдо меленк ули, паро тейтядо тенст, Мон жо аволь свал.8Сон тейсь, мезе тензэ теевсь: Монь рунгом икелев анокстызе калмамс те ваднемасонть.9Видестэ кортан тенк: весе масторлангсонть, косо ули ёвтнезь Кенярксов кулясь, тосо кундасызь те аванть лемензэ ды ёвтыть седеяк, мезе сон тейсь Монень».

10Сестэ Иуда Искариот, кемгавтово тонавтницятнень ютксто вейкесь, мольсь попонь покштнэнень Иисусонь миеме.11Теде марязь, попонь покштнэ кецясть ды алтасть тензэ ярмакт. Сон теде мейле вешнесь Иисусонь миемань ён шка.

Инечинь чокшнень ярсамо

12Ламбамсто сюкоронь покшчинь васенце чистэнть, зярдо печксильть инечинь вирез, тонавтницянзо кевкстизь Иисусонь: «Косо мелеть ярсамс инечинь ярсамодонть? Минь мольтяно, анокстатано».13Сон кучинзе тонавтницянзо ютксто кавтотнень ды кармавтсь тенст: «Азёдо ошов, тосо каршозонк понги кукшинсэ ведень кандыця цёра, моледе мельганзо.14Козонь сон сови, мереде се кудонь азоронтень: “Тонавтыцясь кевкстни: косо нупалесь, конаньсэ Монень тонавтницян марто ярсамс инечинь ярсамодонть?”15Сон невти тенк вере нупаль, покш, ацазь ды анокстазь. Тосо анокстадояк инечинь ярсамо».16Тонавтницянзо тусть, совасть ошонтень, ды весе теевсь истя, кода тенст ёвтась Иисус. Сынь тосо анокстасть инечинь ярсамо.

17Чокшне Иисус сась тов кемгавтово тонавтницянзо марто.18Ярсамсто Сон мерсь: «Алкукс кортан тенк: вейкесь эйстэнк, Монь марто ярсыцясь, мисамам».19Сынь кармасть ризнэме, вейкест-вейкест мельга Тензэ кортамо: «Нама, те аволь мон?», лияськак: «Нама, те аволь мон?»20Сон мерсь каршост: «Те ули кемгавтовостонк вейкесь, се, конась ней Монь марто ваканс кши навси.21Ломантнень Цёрась Эсь эрямо кинзэ прядсы истя, кода теде ёвтазь Пазонь Сёрмадовкссо. Ансяк кодамо зыян пры се ломаненть лангс, кона мисы Ломантнень Цёранть! Седе паро улевель, бути те ломанесь аволь чачояк».

22Сынст ярсамсто Иисус сайсь кши, чанстизе-баславизе, синтризе ды максызе тонавтницянстэнь, мерсь: «Саинк ды ярсадо, те Монь рунгом».23Мейле сайсь кече, Пазонтень сюкпрянь ёвтазь, максызе тенст. Сынь весе симсть эйстэнзэ.24Сон мерсь тенст: «Те Монь вересь, Пазонть марто од вейсэньлувонь верь, кона валови весень кисэ.25Видестэ кортан тенк: Мон а карман симеме винаумарень винадо се чинть самс, зярдо карман симеме од винадо Пазонь Инязорксчисэнть».

26Мейле сынь моравтсть ды тусть Ойумарькс пандонть лангов.27Тесэ Иисус мерсь тенст: «Те вестэнть тынь весе потатадо Монь эйстэ, эдь Пазонь Сёрмадовкссо ёвтазь истя:
“Мон маштса ваныцянть ды реветне срадыть”.
28Седе мейле, зярдо Мон улян кулозьстэ вельмевтезь, тынденк икеле молян Галилеяв».29Петра мерсь Тензэ: «Кадык весе лиятне потыть Тонь эйстэ, мон ялатеке а потан».30Иисус мерсь тензэ: «Видестэ кортан теть: течи, те вестэнть, атякшось кавксть а кенери моразевемеяк, кода тон колмоксть прят каясак Монь эйстэ».31Петра кемекстазь кортась: «Зярдояк а каяса прям Эйстэдеть, куш куломс тень савозо мартот!» Истя кортасть весе лиятнеяк.

Иисус озны Гетсиманиясо

32Састь Гетсимания лемсэ таркас, Иисус мерсь эсь тонавтницянстэнь: «Аштеде тесэ, Мон молян озномо».33Сон саинзе мартонзо Петрань, Яковонь ды Иоаннонь, кармась тандалеме ды талномо-ризнэме.34Сон мерсь тенст: «Оймем куломс ризны. Аштеде тесэ ды илядо удо».35Сон тусь аламодо ве ёнов, прась мода лангс ды ознось: «Улиндеряй те теевемашка, кадык юты те часось Монь вакска».36Сон кортась: «Абба, Тетяй! Тонеть весе тееви; ютавтык те пиштемань кеченть Монь вакска, ансяк кадык ули Тонь мелеть коряс, аволь Монь мелем коряс».

37Мейле Сон велявтсь, муинзе сынст удомсто. Сон мерсь Петранень: «Симон, тон удат? Ве часкак эзить кирдеве апак удо?38Илядо удо, ознодо, аволиде понго снартнемас-варчавтнемас. Тынк оймесь анок паронтень, ансяк обуцянк-коронк лавшо».

39Сон таго тусь, ознось секе озномасонть.40Зярдо велявтсь, таго стардынзе сынст удомсто: сельмест конявильть. Сынь эзть сода, мезть каршонзо кортамс.41Сась колмоцеде, мерсь тенст: «Тынь яла удотадо ды оймсетядо? Саты! Сась шкась ды Ломантнень Цёрась максозь ули пежетевень кедьс.42Стядо, адядо! Вана Монь миицясь малазонок сась».

Иисусонь кундызь

43Сеске, Сонзэ кортамсто, сась Иуда, кемгавтовотнень ютксто вейкесь. Сонзэ марто састь попонь покштнэнь, Койс тонавтыцятнень ды прявтнэнь пельде кучозь ламо ломанть торо ды цётмар марто.44Сонзэ миицясь икелев кортась мартост тешкстэнть: «Конань мон паласа, се Сон – саинк Сонзэ ды ветинк кеместэ ванстозь».45Зярдо Иуда сась тов, сон видьстэ мольсь Иисус ваксс ды мерсь: «Шумбрачи, тонавтыця!» Ды палызе Сонзэ.46Сетне каявсть лангозонзо ды кундызь Сонзэ.47Сесэ аштицятнень ютксто вейкесь таргизе торонзо, вачкодизе попонь прявтонь важонть ды керизе пилензэ.

48Сестэ Иисус мерсь тенст: «Мекс тынь сыде Монь саеме торо ды цётмар марто, теке салыця-маштниця мельга?49Эрьва чистэ Мон мартонк ульнинь, Пазонь кудосо тонавтынь, ды тынь Монь эзимизь сае. Истя эно, топавтовост Сёрмадовкстнэ».50Сестэ весе тонавтницятне кадызь Сонзэ ды оргодсть.

51Ве од ломань, конань штапо рунгозо вельтязель лияназ коцтонь оршамосо, мольсь мельганзо. Ушмантнэ кундызь сонзэ.52Сон кадызе те оршамонть ды штапо оргодсь кедьстэст.

Иисус Инепромкс икеле

53Ветизь Иисусонь попонь прявтонтень. Промсть тозонь весе попонь покштнэ, прявтнэ ды Койс тонавтыцятне.54Петра мольсь мельганзо васоло ве ёно, совась попонь прявтонь пирявтонть потс овсе кудонзо малас ды тосо ванстыцятнень марто озась толбандя ваксс эжнеме.

55Попонь покштнэ ды весе Инепромксось вешнесть Иисусонь лангс невтевкст сонзэ маштомань тувталонь муемга, ансяк истямо тувтал эзть мукшно.56Сонзэ лангс ламот кенгелесть, ансяк сынст невтевкстнэ ульнесть асатышкат, мольсть карадо каршо.57Мейле муевсть окойники зярыя кенгели яволявтыцят, конат кортасть:58«Минь маринек, кода Сон кортась: “Мон калавтса Пазонь кудонть, конань теизь ломантне, колмо чинь ютазь стявтан лия, ломанень лезкстэме”».59Ансяк истят невтевкстнэяк мольсть карадо каршо.

60Сестэ куншкас стясь попонь прявтось ды кевкстизе Иисусонь: «Мекс чатьмонят? Мекс мезеяк а ёвтат чумондомаст каршо?»61Сон чатьмонсь, валгак эзь ёвта. Попонь прявтось таго кевкстизе Сонзэ: «Алкукс Тон Пазонь кучовт Идицясь, Шназь-чанстязь Пазонть Цёразо?»62Иисус мерсь: «Те – Мон! Тыньгак несынк Ломантнень Цёранть Весеменькирдинть вить ёно озадо аштемстэ ды менелень пельтнень лангсо самсто».63Сестэ попонь прявтось раздинзе эсь оршамонзо, мерсь: «Мезекс тенек лия яволявтыцятне?64Маринк Пазонть лангсо Сонзэ нарьгамонзо? Мезе тень кувалт ёвтатадо?» Весе чумондызь Сонзэ куломас.

65Сестэ конат-конат кармасть сельгенеме лангозонзо, сюлмсизь сельмензэ, вачкоесть Эйсэнзэ, кортасть: «Содык, кие эшкинзеть?!» Ванстыцятнеяк чавсть Эйсэнзэ чама ланга.

Иисусто Петрань прянь каямозо

66Петра яла ульнесь пирявтонть потсо, зярдо ютась ваксканзо попонь прявтонь ве важо ава.67Неизе Петрань толбандянть вакссо эжнемстэ, пштистэ варштась лангозонзо, мерсь: «Тонгак ульнить Назаретэнь ломаненть марто, те Иисусонть марто».68Петра прянзо каязь мерсь: «Мон мезеяк аздан, а чарькодянгак, мезде тон кортат». Мейле ютась пирявтонть потс совамо тарканть малав ды атякшось моразевсь.69Се важо авась сонзэ неизе одов, кармась сесэ аштицятненень кортамо: «Теяк сынст ютксто».70Сон таго каизе прянзо. Аламо шкань ютазь, сесэ аштицятне таго кармасть кортамо Петранень: «Тон алкукс сынст ютксто, тонгак Галилеянь эрицят. Кортавксоткак истямо жо».71Сон кармась сюдомо ды божамо-пежетькстамо: «Мон аздаса те ломаненть, конадо тынь кортатадо!»72Сеске атякшось моразевсь, уш омбоцеде. Петрань мельс сестэ ансяк ледсть Иисусонь ёвтавт валтнэ: «Атякшось кавксть а кенери моразевемеяк, кода тон колмоксть прят каясак Монь эйстэ». Сон кармась риксэ авардеме.


*а 14:12 вирез – реве левкс

*б 14:14 нупаль – икельце кудо; комната


предыдущая глава Глава 14 следующая глава