Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 11

Пазонь кулянь кавто неицят-яволявтыцят

1Ды вана Пазонть пельде монень макссть мандонь кондямо онкстнемапель* ды мерсть: «Азё онкстник Пазонь кудонть ды алтаренть, ловныть тосонь озныцятнень.2Ансяк онкстнемстэ Пазонь кудонть ушо пирявкс потмонть кадык, иляк лово, эдь сон максозь Пазонь а содыця раськетненень. Сынь кармить кирдеме Пазонь иневанькс ошонть эсест пильгест ало ниленьгемень кавто ковт.3Мон кучан ризнэмань оршамопельсэ оршазь кавто неицят-яволявтыцят, ды сынь кармить пачтямо Монь валонть неть тёжа кавтосядт кодгемень читнень перть».4Неть неицятне-яволявтыцятне – прок кавто ойумарькст, кавто лампадкат, конат аштить весе мода лангонь Пазонть икеле.5Бути кие снарты теемс сыненст зыян, кургстост лиси тол ды пултасынзе зыянонь теицятнень. Истя кулы эрьвась, кие снарты теемс сыненст зыян.6Сынст ули виест пекстамс менеленть: пиземе а туи моданть лангс се шканть перть, зярс сынь кармить пачтямо Пазонь валонть. Теде башка, сынст ули виест теемс веденть верекс ды кучомс моданть лангс эрьва кодамо зыян, зяроксть ули мелест.

7Ды зярдо неть кавто неицятне-яволявтыцятне прядсызь Пазонь валонь пачтямо тевенть, тоначинь потмакстомо отьмастонть лисиця идем ракшась каяви лангозост, изнясынзе ды маштнесынзе сынст.8Сон кадсынзе сынст рунгост усксевеме се ине ошонть кужова, косо ульнесь крёст лангс вачкодезь минек Азорось. Те ошонтень оймеялтонь смустень коряс мерить Содом эли Египет.9Колмо пель марто чить весе масторлангонь ломантне, раськетне, эрьва кодамо кельсэ кортыця буетне кармить ваномо сынст кулозь рунгост лангс ды а мерить сынст калмамост.10Мода лангонь эрицятне кецить неть кавтотнень куломаст кувалт, тейнить эстест кенярдома чить, казнить вейкест-вейкест туртов казнеть, эдь неть Пазонь валонть кавто пачтицятне вельть пиштевтсть мода лангонь эрицятнень.11Колмо пель марто чинь ютазь, совась неицятнес-яволявтыцятнес Пазонь кучовт эрямонь оймеялт, ды сынь стясть пильге лангс. Кить тень неизь, пек тандадсть.12Кавто неицятне-яволявтыцятне марясть менельстэ виев вайгель, конась сеересь тенст: «Кепедеведе тей!» Ды ятост сельме икеле сынь пель лангсо кепедевсть менелев.13Се шкастонть сыргась модань виев сорнома, ды каладсь ошонть кеменце пельксэзэ. Сисем тёжат ломанть маштовсть те модань сорномадонть. Кадовикстнэ жо тандадсть ды шнасть менелень Пазонть инексчинзэ.

14Ютась омбоце зыянось. Ды вана капши колмоце зыянось!

Сисемеце торамонь зэрть

15Зэрнезевсь сисемеце ангелэнть торамось, ды менельстэнть каятотсть ламо виев вайгельть, конат сеересть:
«Ней минек Азоронок ды Сонзэ кучовт Идицясь
саизь весе масторлангонть Эсест Инязорксчист алов!
Пазось карми ветямо те Инязорксчинть пингеде пингес!»
16Пазонть икеле инязоронь озамо таркатнесэ аштиця комснилее сыре атятне прасть Пазонть икелев, кармасть сюконякшномо17ды сеересть:
«Сюкпря Теть, Азоро Пазось, Весеменькирдиця,
Се, кие ули, ульнесь ды карми улеме!
Эдь Тон нолдык тевс Эсеть ине виеть
ды саик Эсеть кедьс Инязорксчинть!
18Азаргадсть виде Пазонь а содыцятне,
ды секскак сась Тонь кеженть шкась.
Сась шкась судямс кулозтнень
ды пандомс питне Тонь важот, пазмарицят туртов
ды весе Тонь ломанеть туртов, Тонь мелень ваныцятнень туртов:
кода вишкинетненень, истя инетнененьгак!
Сась шкась куловтомс-ёмавтомс сетнень,
конат куловтыть-ёмавтыть мода лангонь эрицятнень».

19Менельсэ панжовсь Пазонь кудось, ды тосто кармась неявомо Пазонть вейсэньлувонь горобиясь. Ды неявсть ёндолонь кивчкаемат, марявсть сееремат, пурьгинень зэрть, кепедевсь модань сорнома ды сыргась виев цярахман.


предыдущая глава Глава 11 следующая глава