Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 11

Ерусалимень кемицятне кунсолыть Петрань

1Апостолтнэ ды кемицятне Иудеянь весе таркатнесэ марясть: лия раськень ломантнеяк кемезевсть Пазонь валонтень.2Секс, зярдо Петра совась Ерусалимс, киськепень керявтомань кисэ аштиця кемицятне кармасть чумондомонзо.3Сынь кортасть: «Тон совсить апак керявтозень кудос ды ярсыть мартост».4Петра сестэ мельга-мельцек ёвтнизе, кода те лиссь.

5«Мон ознынь Иоппиясо, – ёвтнесь сон, – ды монень кучозель неявкс: верде валгсь мезе-бути, покш коцтонь столешникень кондямо, кона, ниле пева сюлмазь, нолдавсь менельстэ ды валгсь видьстэ тов, косолинь мон.6Мон варштынь потмозонзо ды неинь тосто эрьва кодат ниле пильгесэ кудонь ды идем ракшат, ёзмолдыцят ды менель нармунть.7Мейле мон маринь вайгель, кона кортась монень: “Стяк, Петра, печкить ды сэвить сынст”.8Тень каршо мон меринь: “Зярдояк, Азоро! Мон зярдояк мезеньгак берянде ды аванькстэ эзинь ярсне”.9Вайгелесь менельстэ таго мерсь тень: “Иля мерькшне аванькс сенень, мезенть Пазось теизе ваньксэкс”.10Истя ульнесь колмоксть, мейле коцтось мекев кепедевсь менельс.

11Ды вана секе шкастонть кудонть икелев, косолинь мон, лоткасть колмо ломанть, конат кучозельть монень Кесариясто.12Пазонь Оймеялтось кармавтсь монень апак кавтолдо молемеде сынст марто. Неть кото кемиця ялгангак сыргасть мартон, ды минь сынек Корнелиень кудос.13Сон ёвтнизе тенек, кода кудозонзо совась ангел ды мерсь тензэ: “Кучт Иоппияв Симононь мельга, конанень мерить Петра.14Сон ёвты тонеть валт, конатнень вельде идеват тонгак, весе кудораськетькак”.15Зярдо мон карминь кортамо, сынст лангс валгсь Иневанькс Оймеялтось, кода Сон валгонесь васня минек лангскак.16Сестэ ледсть мелезэнь Азоронть валонзо: “Иоанн нававтсь ведьсэ, а вана тынь ультядо нававтозь Иневанькс Оймеялтсо”.17Чарькодеви, Пазось максызе тенст теке казненть, конань миненеккак, зярдо карминек кемеме Иисус Христос Азоронтень. Секскак монь эзь сато смелчим молемс Пазонть каршо!»

18Зярдо Ерусалимень кемицятне тень кунсолызь, лоткасть Петрань чумондомадо ды кармасть шнамо Пазонть, истя кортазь: «Улема, лия раськетнененьгак Пазось невтсь пежетьстэ лисемань ки, кона вети эрямос!»

Антиокиянь кемицянь курось

19Те шкане кемицятне, конат сралекшнесть Стефанонь маштомадонзо мейле пансематнеде, пачкодсть мик Финикиянть, Кипранть ды Антиокиянть видьс. Ялатеке сынь эзть ёвтне паро кулянть киненьгак, еврейтнеде башка.20Ансяк сынст ютксо ульнесть зярыя кемицят Кипрасто ды Киринеясто, конат Антиокияв самодо мейле кармасть ёвтнеме Кенярксов кулянть Иисус Азоронть эйстэ лия раськень ломантнененьгак.21Сынст марто ульнесь Азоронть виезэ, ды пек ламот кармасть кемеме сынст валтнэнень ды велявтсть Азоронтень.

22Теде кулясь пачкодсь Ерусалимень кемицянь куронтеньгак, ды тосто кучизь Антиокияв Варнавань.23Сон сась, неизе Пазонь чанстенть ды пек кенярдозевсь. Сон кармавтсь од христиантнэнь апак кавтолдо ванстомс Азоронтень кемеманть.24Варнава ульнесь паро ломань. Сон пештязель Иневанькс Оймеялтсо ды кемемасо. Сестэ седеяк ламо ломанть састь Азоронтень.25Мейле Варнава тусь Тарсов Савлань вешнеме. Сон муизе сонзэ ды ветизе Антиокияв.26Цела ие Варнава ды Савла важодсть кемицянь куросонть ды тонавтсть ламо ломанть. Антиокиясо Иисусонь мельга молицятненень васенцеде кармасть мереме христиант.

27Се шкане Ерусалимстэ Антиокияв састь зярыя пазмарицят.28Вейкесь эйстэст, лемезэ Агав, стясь ды Оймеялтонть ветямонзо коряс икелепелев ёвтызе: весе масторлангонть учни покш вачочи. Мейле, алкукскак, истямо вачочи сась Клавдий инязоронть пингестэ.29Секс Иисусонь мельга молицятне сайсть мель кучомс Иудеяв кемиця ялгатненень ярмакт, эрьвась эсь уличинзэ коряс.30Истя тейстькак ды мейле Варнавань ды Савлань вельде кучизь неть ярмактнень Ерусалимень кемицянь куронь прявтнэнень.


предыдущая глава Глава 11 следующая глава